IND vs ZIM: પ્રથમ T20 માં ટીમ ઈન્ડિયામાં મોટો ફેરફાર, અશોક શર્માનું ડેબ્યુ, 4 ખેલાડીઓ બહાર
ભારત અને ઝિમ્બાબ્વે વચ્ચેની ત્રણ મેચની T20 શ્રેણીની પ્રથમ મેચ હરારેમાં શરૂ થઈ છે. ટીમ ઈન્ડિયાએ ટોસ જીતીને પ્રથમ બોલિંગ કરવાનો નિર્ણય લીધો છે. આ મેચમાં એક યુવા ફાસ્ટ બોલરને આંતરરાષ્ટ્રીય ક્રિકેટમાં ડેબ્યૂ કરવાની તક મળી છે, જ્યારે ચાર ખેલાડીઓને પ્લેઇંગ ઈલેવનમાં સ્થાન મળ્યું નથી.
ભારત અને ઝિમ્બાબ્વે વચ્ચેની પ્રથમ T20 મેચ હરારે સ્પોર્ટ્સ ક્લબ ખાતે રમાઈ રહી છે. ભારતીય કેપ્ટન શ્રેયસ અય્યરે ટોસ જીતીને પ્રથમ બોલિંગ કરવાનો નિર્ણય લીધો. ત્રણ મેચની શ્રેણીની શરૂઆત જીત સાથે કરવાની બંને ટીમોની નજર છે.
આ મેચમાં ભારત તરફથી જમણા હાથના ફાસ્ટ બોલર અશોક શર્માએ આંતરરાષ્ટ્રીય ક્રિકેટમાં ડેબ્યૂ કર્યું છે. IPL 2026માં પોતાની ઝડપી બોલિંગથી પ્રભાવિત કરનાર અશોકને હવે ટીમ ઈન્ડિયા માટે પોતાને સાબિત કરવાની તક મળી છે.
અશોક શર્માએ IPL દરમિયાન 154 કિમી પ્રતિ કલાકની ઝડપે બોલિંગ કરીને ચર્ચા જગાવી હતી. ગુજરાત ટાઇટન્સે તેને ₹90 લાખમાં ખરીદ્યો હતો. તેણે 14 ફર્સ્ટ-ક્લાસ મેચમાં 29 વિકેટ ઝડપી છે, જ્યારે IPLની 6 મેચમાં 6 વિકેટ લીધી છે.
ભારતે પ્લેઇંગ ઈલેવનમાં ચાર ફેરફાર કર્યા છે અને ચાર ખેલાડીઓને બહાર રાખ્યા છે. બીજી તરફ ઝિમ્બાબ્વે તરફથી બેન કરન અને ન્યુમેન ન્યામહુરીએ પણ T20 આંતરરાષ્ટ્રીય ક્રિકેટમાં ડેબ્યૂ કર્યું છે.
ભારતની પ્લેઇંગ ઈલેવનમાં વૈભવ સૂર્યવંશી, અભિષેક શર્મા, ઈશાન કિશન, શ્રેયસ અય્યર, તિલક વર્મા, રિંકુ સિંહ, શિવમ દુબે, રવિ બિશ્નોઈ, પ્રિન્સ યાદવ, અશોક શર્મા અને મયંક યાદવનો સમાવેશ થાય છે. (PC:X/BCCI)
