IND vs NZ : ન્યુઝીલેન્ડે ટીમ ઈન્ડિયાને ઘરઆંગણે ટેસ્ટ શ્રેણીમાં હરાવી રેકોર્ડની લાઈન લગાવી દીધી
ન્યુઝીલેન્ડની ક્રિકેટ ટીમે તે કરી બતાવ્યું જે ઓસ્ટ્રેલિયા, ઈંગ્લેન્ડ અને દક્ષિણ આફ્રિકા જેવી મજબૂત ટીમો પણ છેલ્લા 12 વર્ષમાં નથી કરી શકી. કીવી ટીમે ભારત આવીને ટીમ ઈન્ડિયાને ટેસ્ટ શ્રેણીમાં હરાવીને ઈતિહાસ રચ્યો છે. સાથે જ 12 વર્ષ બાદ ટીમ ઈન્ડિયાને ઘરઆંગણે ટેસ્ટ શ્રેણીમાં હારનો સામનો કરવો પડ્યો છે. આ પરિણામ સાથે ન્યુઝીલેન્ડે કેટલાક ખાસ રેકોર્ડ બનાવ્યા છે, જ્યારે ટીમ ઈન્ડિયા અને ભારતીય કેપ્ટને પોતાના ખાતામાં અનિચ્છનીય રેકોર્ડ નોંધાવ્યા છે.
મિશેલ સેન્ટનરે પુણેમાં ટેસ્ટ મેચમાં સૌથી વધુ વિકેટ લેવાનો રેકોર્ડ પણ બનાવ્યો હતો. આ પહેલા આ રેકોર્ડ ઓસ્ટ્રેલિયાના સ્ટીવ ઓ'કીફે 2017માં બનાવ્યો હતો, જેણે પુણેમાં 12 વિકેટ ઝડપી હતી.
સેન્ટનર ભારતમાં એક ટેસ્ટમાં સૌથી વધુ વિકેટ લેનારો બીજો સર્વશ્રેષ્ઠ લેફ્ટ આર્મ સ્પિનર બની ગયો છે. નંબર-1 પર તેનો સાથી એજાઝ પટેલ છે, જેણે 2021માં મુંબઈ ટેસ્ટમાં 14 વિકેટ લીધી હતી.
આ હાર પહેલા ટીમ ઈન્ડિયાએ ઘરઆંગણે સતત 18 ટેસ્ટ શ્રેણી જીતી હતી, જે ક્રિકેટના ઈતિહાસમાં સૌથી લાંબી જીતનો સિલસિલો છે. આ યાત્રા પણ હવે પૂરી થઈ ગઈ છે.
ટીમ ઈન્ડિયાના કેપ્ટન રોહિત શર્માએ આ મેચમાં કુલ 8 રન બનાવ્યા, જે છેલ્લા 16 વર્ષમાં ભારતમાં કોઈપણ ટેસ્ટમાં ટીમ ઈન્ડિયાના કેપ્ટનનો સૌથી ઓછો સ્કોર છે. આ પહેલા 2008માં અનિલ કુંબલેએ સાઉથ આફ્રિકા સામે 5 રન બનાવ્યા હતા.
ટીમ ઈન્ડિયા આ વર્ષે ઘરઆંગણે ત્રીજી ટેસ્ટ મેચ હારી ગઈ છે. આ રીતે 41 વર્ષ બાદ ભારતને ઘરઆંગણે 3 ટેસ્ટમાં હારનો સામનો કરવો પડ્યો છે. આ પહેલા 1983માં પણ ટીમ ઈન્ડિયા 3 ટેસ્ટ હારી ગઈ હતી. (All Photo Credit : PTI)
