IND vs BAN: વરસાદના કારણે બન્યો અજીબ સંયોગ, ટીમ ઈન્ડિયાને 9 વર્ષ પછી આ દિવસ જોવો પડ્યો
કાનપુરના ગ્રીન પાર્ક સ્ટેડિયમમાં ભારત અને બાંગ્લાદેશ વચ્ચે ટેસ્ટ શ્રેણીની બીજી મેચ રમાઈ રહી છે. આ મેચના બીજા દિવસે વરસાદના કારણે બંને ટીમ વોર્મઅપ પણ કરી શકી ન હતી. બીજા દિવસની રમત એક પણ બોલ ફેંક્યા વિના પડતી મૂકવી પડી હતી. છેલ્લા 9 વર્ષમાં આ માત્ર બીજી વખત છે જ્યારે ભારતની ઘરઆંગણે ટેસ્ટ સિરીઝનો બીજો દિવસ એકપણ બોલ ફેંક્યા વિના રદ કરવામાં આવ્યો હોય.
પ્રથમ દિવસ બાદ બેંગલુરુમાં વરસાદના કારણે કોઈ પણ દિવસે રમત રમાઈ શકી ન હતી. હવે કાનપુરમાં પણ આવી જ સ્થિતિ બની છે. ત્રીજા દિવસે પણ વરસાદની સંભાવના છે. મેદાન પહેલેથી જ ભીનું છે, જો વધુ વરસાદ પડશે તો ત્રીજો દિવસ પણ રદ થઈ શકે છે. મીડિયા રિપોર્ટ્સ અનુસાર, ગ્રીન પાર્ક સ્ટેડિયમમાં મેદાનને સૂકવવા માટેની સુવિધાઓ સારી નથી. આ સિવાય ભારતીય ટીમ અહીંની અન્ય સુવિધાઓથી પણ ખુશ નથી.
મેચના પ્રથમ દિવસે કુલ 35 ઓવર નાખવામાં આવી હતી. આ દરમિયાન બાંગ્લાદેશની ટીમે 3 વિકેટના નુકસાન પર 107 રન બનાવ્યા હતા. મોમિનુલ હક 40 રન અને મુશફિકુર રહીમ 6 રન બનાવીને ક્રિઝ પર હાજર રહ્યા હતા. બીજી તરફ, આકાશ દીપ ભારતનો સૌથી સફળ બોલર હતો. તેણે 10 ઓવરમાં માત્ર 34 રન આપ્યા અને 2 બેટ્સમેનોને પોતાનો શિકાર બનાવ્યા. આ પછી રવિચંદ્રન અશ્વિને ત્રીજી સફળતા અપાવી હતી. (All Photo Credit : ICC / BCCI)
Published On - 9:41 pm, Sat, 28 September 24
