IND vs AUS : ટીમ ઈન્ડિયામાં મોટો ફેરફાર, અશ્વિનના સ્થાને આવ્યો આ ખેલાડી, BCCIએ સિરીઝની વચ્ચે લીધો નિર્ણય
ઓફ સ્પિનર તનુષ કોટિયનને મેલબોર્ન અને સિડની ટેસ્ટ માટે ટીમ ઈન્ડિયામાં જગ્યા મળી છે. આર અશ્વિનની નિવૃત્તિ બાદ BCCIએ આ મોટો નિર્ણય લીધો છે. તનુષ મુંબઈનો ખેલાડી છે અને બોલિંગની સાથે તે સારી બેટિંગ પણ કરે છે.
મુંબઈના ઓફ સ્પિનર તનુષ કોટિયનને બોર્ડર ગાવસ્કર ટ્રોફીની છેલ્લી બે ટેસ્ટ મેચો માટે ભારતીય ક્રિકેટ ટીમમાં સ્થાન મળ્યું છે. આર અશ્વિનની નિવૃત્તિ બાદ BCCIએ આ મોટો નિર્ણય લીધો છે. અશ્વિને બ્રિસબેન ટેસ્ટ બાદ નિવૃત્તિ લીધી હતી, હવે તેના સ્થાને તનુષ કોટિયનને તક આપવામાં આવી છે.
અહેવાલો અનુસાર, આ ખેલાડી મંગળવારે મેલબોર્ન જશે. તનુષ કોટિયન પણ અશ્વિનની જેમ ઓફ સ્પિનર છે અને તે પણ નીચલા ક્રમમાં બેટિંગ કરે છે. તાજેતરમાં જ આ ખેલાડીને ઓસ્ટ્રેલિયા A સામેની બિનસત્તાવાર ટેસ્ટ શ્રેણીમાં રમવાની તક પણ મળી હતી.
તનુષ કોટિયન 26 વર્ષનો છે અને આ ખેલાડી અત્યાર સુધીમાં 33 ફર્સ્ટ ક્લાસ મેચ રમી ચૂક્યો છે. તનુષના નામે 101 વિકેટ છે. મોટી વાત એ છે કે તેની ફર્સ્ટ ક્લાસ એવરેજ 41થી વધુ છે. કોટિયને ફર્સ્ટ ક્લાસ ક્રિકેટમાં 1525 રન બનાવ્યા છે અને તેના નામે 2 સદી અને 13 અડધી સદી છે. કોટિયન ગત સિઝનમાં રાજસ્થાન રોયલ્સ તરફથી પણ રમ્યો હતો, તેને આ ટીમ દ્વારા ઓપનિંગ સ્લોટ આપવામાં આવ્યો હતો.
તનુષ કોટિયનનો ભારતીય ટીમમાં સમાવેશ કરવામાં આવ્યો છે પરંતુ સવાલ એ છે કે શું તેને પ્લેઈંગ ઈલેવનમાં તક મળશે? આની શક્યતા ઓછી છે કારણ કે તનુષ બુધવાર અથવા ગુરુવારે ઓસ્ટ્રેલિયા પહોંચશે અને મેલબોર્નમાં ચોથી ટેસ્ટ 26 ડિસેમ્બરથી છે. જો કે સિડનીમાં યોજાનારી છેલ્લી ટેસ્ટમાં તેને તક મળી શકે છે. ટીમમાં જાડેજા અને વોશિંગ્ટન સુંદર હોવા છતાં તનુષ માટે તેમની સાથે તક મળવી મુશ્કેલ છે.
તનુષ કોટિયન ઓસ્ટ્રેલિયા A વિરૂદ્ધ મેલબોર્નમાં બીજી બિનસત્તાવાર ટેસ્ટ રમાઈ હતી, જેમાં આ ખેલાડી પ્રથમ દાવમાં ખાતુ ખોલાવી શક્યો ન હતો પરંતુ તનુષે બીજી ઈનિંગમાં 44 રન બનાવ્યા હતા. મેચમાં તેને માત્ર એક જ વિકેટ મળી હતી. (All Photo Credit : INSTAGRAM / X)