IND vs AUS : રોહિત શર્મા પર્થ ટેસ્ટમાં નહીં રમે, પુત્ર જન્મ બાદ આ કારણથી ઓસ્ટ્રેલિયા નહીં જાય
તેના બીજા બાળકની જન્મ તારીખ નજીક આવી રહી હોવાના કારણે રોહિત શર્મા ગયા અઠવાડિયે ટીમ ઈન્ડિયા સાથે ઓસ્ટ્રેલિયા જઈ શક્યો ન હતો. હવે 15 નવેમ્બરે તેની પત્ની રિતિકાએ એક પુત્રને જન્મ આપ્યો છે, જેના પછી એવી આશા રાખવામાં આવી રહી છે કે કદાચ કેપ્ટન ટૂંક સમયમાં ઓસ્ટ્રેલિયા જવા રવાના થઈ શકે છે. પરંતુ હવે એવું નહીં થાય, રોહિત પર્થ ટેસ્ટમાં નહીં રમે.
ભારત અને ઓસ્ટ્રેલિયા વચ્ચે પર્થમાં શરૂ થનારી પ્રથમ ટેસ્ટ મેચને આડે એક સપ્તાહથી પણ ઓછો સમય બાકી છે. બોર્ડર-ગાવસ્કર ટ્રોફીની પ્રથમ મેચ 22 નવેમ્બરથી ઓપ્ટસ સ્ટેડિયમમાં રમાશે, પરંતુ ટીમ ઈન્ડિયાના કેપ્ટન રોહિત શર્મા આ મેચનો ભાગ નહીં હોય. ટેસ્ટના એક અઠવાડિયા પહેલા જ રોહિત શર્માને સૌથી મોટા સારા સમાચાર મળ્યા છે. ભારતીય કેપ્ટન જેની રાહ જોઈ રહ્યો હતો તે ક્ષણ તેના જીવનમાં આવી ગઈ છે. રોહિતની પત્નીએ શુક્રવારે 15 નવેમ્બરે પુત્રને જન્મ આપ્યો હતો. આ રીતે રોહિત અને રિતિકા બીજી વખત પેરેન્ટ્સ બન્યા છે.
ભારતીય કેપ્ટન રોહિતે શનિવારે 16 નવેમ્બરના રોજ સોશિયલ મીડિયા પોસ્ટ દ્વારા તેના ચાહકો સાથે તેના પુત્રના જન્મના સારા સમાચાર શેર કર્યા. રોહિત દ્વારા આ સમાચારની જાહેરાત સાથે જ ચાહકો તરફથી ભારતીય કેપ્ટનને અભિનંદનનો સિલસિલો શરૂ થઈ ગયો હતો. આ અદ્ભુત સમાચાર પછી, એવી આશા રાખવામાં આવી રહી છે કે કેપ્ટન રોહિત ટૂંક સમયમાં ઓસ્ટ્રેલિયા પહોંચી શકે છે અને પર્થ ટેસ્ટમાં રમી શકે છે, પરંતુ હવે એ નિશ્ચિત માનવામાં આવે છે કે રોહિત આ મેચમાં નહીં રમે.
BCCIના સૂત્રોએ ખુલાસો કર્યો છે કે ભારતીય કેપ્ટન પ્રથમ ટેસ્ટ મેચમાં નહીં રમે. આ રિપોર્ટમાં જણાવવામાં આવ્યું છે કે તમના પુત્રના જન્મ પછી, રોહિત આ ખૂબ જ ખાસ સમય તેના પરિવાર સાથે વિતાવવા માંગે છે, જ્યાં તે પોતાના પુત્રની સાથે સાથે તેની પત્ની રિતિકાની સંભાળ રાખવા પર ધ્યાન કેન્દ્રિત કરશે. બોર્ડના સૂત્ર અનુસાર, BCCI પણ આ સ્થિતિને સમજે છે અને ભારતીય કેપ્ટનના નિર્ણયનું સન્માન કરે છે.
આવી સ્થિતિમાં, રોહિત ઓછામાં ઓછા આગામી દોઢ અઠવાડિયા સુધી ઓસ્ટ્રેલિયા જવાનો નથી અને તેથી તે પ્રથમ ટેસ્ટ મેચમાં રમી શકશે નહીં. રોહિતે થોડા અઠવાડિયા પહેલા બોર્ડને જાણ કરી હતી કે તેના બીજા બાળકના જન્મની સંભવિત તારીખ પર્થ ટેસ્ટની નજીક છે. આવી સ્થિતિમાં તેણે BCCI સમક્ષ પહેલા ટેસ્ટ માટે ઉપલબ્ધ ન હોવાની આશંકા વ્યક્ત કરી હતી અને બોર્ડે તેને તેના માટે મંજૂરી આપી દીધી હતી. આ જ કારણ હતું કે તે 10 અને 11 નવેમ્બરે ઓસ્ટ્રેલિયા રવાના થયેલી ટીમમાં સામેલ નહોતો.
રોહિત હવે બીજી ટેસ્ટ મેચથી ટીમ ઈન્ડિયા માટે ઉપલબ્ધ થઈ શકે છે. શ્રેણીની બીજી ટેસ્ટ 6 ડિસેમ્બરથી એડિલેડમાં રમાશે, જે ડે-નાઈટ ટેસ્ટ મેચ હશે. પર્થ ટેસ્ટમાં રોહિતની ગેરહાજરીમાં વાઈસ કેપ્ટન જસપ્રીત બુમરાહ ટીમની કમાન સંભાળશે. (All Photo Credit : PTI)