શું ઓસ્ટ્રેલિયા જસપ્રીત બુમરાહથી આટલું ડરે છે? ટેસ્ટ સિરીઝમાં આ ટ્રિકનો કરશે ઉપયોગ
ભારત અને ઓસ્ટ્રેલિયા વચ્ચે 22 નવેમ્બરથી ટેસ્ટ સિરીઝ શરૂ થઈ રહી છે. આ ટેસ્ટ સિરીઝ પહેલા ન્યુઝીલેન્ડના પૂર્વ ફાસ્ટ બોલર અને પ્રખ્યાત કોમેન્ટેટર સિમોન ડુલે દાવો કર્યો છે કે ઓસ્ટ્રેલિયાએ જસપ્રીત બુમરાહ સાથે ડીલ કરવા માટે જ ટેસ્ટ સિરીઝની યોજના બનાવી છે.
ભારત અને ઓસ્ટ્રેલિયા વચ્ચે 22 નવેમ્બરથી ટેસ્ટ શ્રેણી શરૂ થશે. આ ટેસ્ટ સિરીઝમાં દેખીતી રીતે જ ઓસ્ટ્રેલિયન બોલરો ટીમ ઈન્ડિયાના બેટ્સમેનો માટે ખતરો સાબિત થશે, પરંતુ સત્ય એ છે કે જસપ્રીત બુમરાહ પણ ઓસ્ટ્રેલિયન બેટ્સમેનો માટે મોટો ખતરો સાબિત થશે. ઘણા ક્રિકેટ નિષ્ણાતો માને છે કે બુમરાહ ઓસ્ટ્રેલિયા માટે સૌથી મોટો પડકાર હશે.
ન્યુઝીલેન્ડના ભૂતપૂર્વ ફાસ્ટ બોલર અને પ્રખ્યાત કોમેન્ટેટર સિમોન ડુલ પણ એવું જ માને છે. ન્યુઝીલેન્ડના આ ભૂતપૂર્વ ક્રિકેટરે તો ત્યાં સુધી કહ્યું છે કે જસપ્રીત બુમરાહને થકવવા માટે ઓસ્ટ્રેલિયાએ ટેસ્ટ સિરીઝના શેડ્યૂલનું કાળજીપૂર્વક આયોજન કર્યું છે.
ડુલે બોર્ડર-ગાવસ્કર સિરીઝ પર ચાલી રહેલા શોમાં કહ્યું, 'પ્રથમ ત્રણ મેચ ઝડપી અને ઉછાળવાળી પીચો પર હશે જ્યાં પ્રીત બુમરાહનો સતત ઉપયોગ કરવામાં આવશે. બુમરાહ ઓસ્ટ્રેલિયા માટે સૌથી મોટો ખતરો છે અને તેથી જ તેને થકવવાની યોજના બનાવવામાં આવી છે. ઓસ્ટ્રેલિયન ટીમ ઈચ્છે છે કે બુમરાહ પ્રથમ ત્રણ ટેસ્ટમાં થાકી જાય, જેથી બુમરાહ માટે છેલ્લી બે ટેસ્ટ મેચમાં રમવું મુશ્કેલ બની જાય.
ડુલે આગળ કહ્યું, 'પર્થમાં ખૂબ જ ગરમી છે, જ્યાં બુમરાહે શક્ય તેટલી વધુ ઓવરો ફેંકવી પડશે. તે પછી એડિલેડમાં યોજાનારી પિંક બોલ ટેસ્ટમાં બુમરાહનો વધુ ઉપયોગ કરવામાં આવશે અને જો બ્રિસબેનમાં પણ ઝડપી બોલરોને મદદ મળશે, તો ટીમ ઈન્ડિયા ત્યાં પણ બુમરાહનો ઉપયોગ કરશે. જો બુમરાહનો પ્રથમ 2-3 મેચમાં વધુ ઉપયોગ કરવામાં આવશે તો આ બોલરને છેલ્લી બે મેચોમાં આરામ આપવો પડશે, જ્યાં ઓસ્ટ્રેલિયન ટીમ ફાયદો ઉઠાવી શકે છે.
બુમરાહ ઉપરાંત ઓસ્ટ્રેલિયા સામેની ટેસ્ટ શ્રેણીમાં મોહમ્મદ સિરાજ, આકાશ દીપ, પ્રસિદ્ધ કૃષ્ણા અને હર્ષિત રાણા ટીમના ફાસ્ટ બોલર છે, જેમની પાસે વધારે અનુભવ નથી. સિરાજનું ફોર્મ સારું નથી અને ઈજાના કારણે શમીને પ્રવાસ માટે પસંદ કરવામાં આવ્યો નથી. એટલા માટે ઓસ્ટ્રેલિયા તેના સૌથી મોટા ખતરાને ખતમ કરવા માંગે છે. (All Photo Credit : PTI)