T20 World Cup Breaking : દેખાય ચાંદીની, પણ છે કંઈક ખાસ ! T20 વર્લ્ડ કપ ટ્રોફી વિશે જાણો સત્ય
T20 વર્લ્ડ કપ માત્ર રન, સિક્સર અને રોમાંચ પૂરતો સીમિત નથી. આ ટુર્નામેન્ટની સૌથી મોટી ઓળખ તેની ટ્રોફી છે, જેની ચમક સૌને આકર્ષે છે. પરંતુ શું તમે જાણો છો કે આ ટ્રોફી શેની બનેલી છે, તેનું વજન કેટલું છે અને જીતનાર ટીમને અસલી ટ્રોફી કેમ નથી મળતી?
2026 નો ICC મેન્સ T20 વર્લ્ડ કપ 7 ફેબ્રુઆરીથી શરૂ થવાનો છે. આ ટુર્નામેન્ટમાં કુલ 20 ટીમો ભાગ લઈ રહી છે. ટુર્નામેન્ટ પહેલા T20 વર્લ્ડ કપ ટ્રોફી વિવિધ સ્થળોએ પ્રદર્શિત કરવામાં આવી રહી છે, જ્યાં તેની ચમક અને ડિઝાઇન ચર્ચાનો વિષય બની છે.
T20 વર્લ્ડ કપ ટ્રોફી પાંચ અલગ અલગ ધાતુઓથી બનાવવામાં આવી છે. તેની બનાવટ એટલી સુક્ષ્મ અને ચમકદાર છે કે તે દૂરથી ચાંદીની બનેલી લાગે છે. આ ટ્રોફીનું ડિઝાઇન અને ઉત્પાદન લંડન સ્થિત એક પ્રતિષ્ઠિત કંપની દ્વારા કરવામાં આવ્યું છે, જેણે 2021માં આ ટ્રોફી તૈયાર કરી હતી.
જ્યારે T20 વર્લ્ડ કપની શરૂઆત થઈ હતી, ત્યારે ટ્રોફીનું વજન લગભગ 12 કિલોગ્રામ હતું. પરંતુ 2021 બાદ ટ્રોફીમાં ફેરફાર કરવામાં આવ્યો અને હવે તેનું વજન 3.9 કિલોગ્રામ છે. ટ્રોફી 51 સેન્ટીમીટર ઊંચી છે અને તેનો આધાર ચાંદીની પ્લેટથી બનાવવામાં આવ્યો છે.
ક્રિકેટપ્રેમીઓને આ ચમકદાર ટ્રોફીની કિંમત જાણવામાં ખૂબ રસ છે. જોકે, ICC કે ટ્રોફી બનાવનારી કંપનીએ તેની કિંમત ક્યારેય જાહેર કરી નથી. આ કારણે T20 વર્લ્ડ કપ ટ્રોફીની કિંમત આજે પણ એક રહસ્ય બની રહી છે.
એક ચોંકાવનારી હકીકત એ છે કે T20 વર્લ્ડ કપ જીતનારી ટીમને અસલી ટ્રોફી આપવામાં આવતી નથી. વિજેતા ટીમને માત્ર ટ્રોફીની પ્રતિકૃતિ મળે છે, જ્યારે મૂળ ટ્રોફી ICCના દુબઈ સ્થિત મુખ્યાલયમાં સુરક્ષિત રીતે રાખવામાં આવે છે અને ટુર્નામેન્ટ દરમિયાન જ બહાર લાવવામાં આવે છે. (PC: PTI/X)
