IPL 2025 માટે રિટેન થયા પછી પણ ઓક્શનમાં હશે આ ખેલાડી ? લિસ્ટ બહાર આવ્યા બાદ હોબાળો
IPL 2025ની મેગા હરાજી માટે કુલ 1,574 ખેલાડીઓએ રજીસ્ટર કરાવ્યું છે. પરંતુ આ યાદીમાં એવા ખેલાડીનું નામ પણ સામેલ છે જેને દિલ્હી કેપિટલ્સ ટીમે રિટેન કર્યો છે. દિલ્હી કેપિટલ્સે આ ખેલાડીને પોતાની ટીમ સાથે જાળવી રાખવા માટે 10 કરોડ રૂપિયા ખર્ચ્યા છે.
IPL 2025ની મેગા ઓક્શન 24 અને 25 નવેમ્બરે સાઉદી અરેબિયાના જેદ્દાહમાં યોજાવાની છે. IPL 2025 મેગા ઓક્શન માટે કુલ 1,574 ખેલાડીઓએ નોંધણી કરાવી છે, જેમાં 1165 ભારતીય અને 409 વિદેશી ખેલાડીઓનો સમાવેશ થાય છે. પરંતુ આ યાદીમાં એક એવા ખેલાડીનું નામ પણ છે જેને IPL 2025 માટે રિટેન કરવામાં આવ્યો છે. આવી સ્થિતિમાં, હરાજીની સૂચિમાં આ ખેલાડીનું નામ જોઈને દરેકને આશ્ચર્ય થયું છે. સવાલ એ છે કે આ ખેલાડી હરાજીમાં આવશે કે નહીં?
10 ટીમોએ મળીને IPL 2025 માટે કુલ 47 ખેલાડીઓને રિટેન કર્યા છે. આ વખતે દિલ્હીની ટીમે કુલ 4 ખેલાડીઓને રિટેન કર્યા છે. આ 4 ખેલાડીઓ અક્ષર પટેલ, કુલદીપ યાદવ, ટ્રિસ્ટન સ્ટબ્સ અને અભિષેક પોરેલ છે. IPL હરાજી માટે જાહેર કરવામાં આવેલી યાદીમાં ટ્રિસ્ટન સ્ટબ્સનું નામ પણ સામેલ છે.
ટ્રિસ્ટન સ્ટબ્સનું નામ રજીસ્ટર ખેલાડીઓની યાદીમાં 253મા સ્થાને છે અને તેની મૂળ કિંમત રૂ. 1 થી 5 કરોડ હોવાનું કહેવાય છે. તમને જણાવી દઈએ કે, ટ્રિસ્ટન સ્ટબ્સનું નામ આકસ્મિક રીતે રજિસ્ટર્ડ ખેલાડીઓમાં આવ્યું છે. એટલે કે તે દિલ્હીની ટીમનો જ ભાગ છે, તે હરાજીમાં જોવા મળશે નહીં.
ટ્રિસ્ટન સ્ટબ્સ વર્ષ 2022થી IPLનો ભાગ છે. તે પ્રથમ બે સિઝનમાં મુંબઈની ટીમનો ભાગ હતો. આ પછી તે IPL 2024માં 50 લાખ રૂપિયામાં દિલ્હીની ટીમનો ભાગ બન્યો. ટ્રિસ્ટન સ્ટબ્સે IPL 2024ની 14 મેચોમાં 54ની એવરેજથી 378 રન બનાવ્યા, જે દરમિયાન તેનો સ્ટ્રાઈક રેટ 190.91 હતો. તેણે આ સિઝનમાં કુલ 3 અડધી સદી પણ ફટકારી હતી. જે બાદ દિલ્હીની ટીમે તેને રિટેન કરવાનો નિર્ણય લીધો હતો. આ વખતે દિલ્હીની ટીમે તેને 10 કરોડ રૂપિયા આપ્યા છે.
અક્ષર પટેલ દિલ્હી કેપિટલ્સનો સૌથી મોંઘો રિટેન્શન રહ્યો છે. અક્ષર પટેલને 16.5 કરોડ રૂપિયા આપવામાં આવ્યા છે. જ્યારે કુલદીપ યાદવને પણ 13.25 કરોડ રૂપિયા સાથે જાળવી રાખવામાં આવ્યો છે. ટ્રિસ્ટન સ્ટબ્સને રૂ. 10 કરોડમાં અને અભિષેક પોરેલને રૂ. 4 કરોડમાં જાળવી રાખવામાં આવ્યા છે. આ યાદીમાં અભિષેક પોરેલ એકમાત્ર અનકેપ્ડ ખેલાડી છે. આ સિવાય દિલ્હી કેપિટલ્સ પાસે હવે હરાજીમાં 2 રાઈટ ટુ મેચ કાર્ડ પણ હશે. જેની સાથે તે પાછલી ટીમમાંથી વધુ 2 ખેલાડીઓને ફરી એકવાર ઉમેરી શકશે. (All Photo Credit : PTI)
