WPL 2027 Mini Auction માં કોઈએ ના ખરીદી, બીજા જ દિવસે 38 બોલમાં ફટકારી દમદાર સદી
WPL 2027ની હરાજીમાં ₹10 લાખની બેઝ પ્રાઇસ હોવા છતાં કોઈ ટીમે આ ખેલાડી પર દાવ લગાવ્યો નહીં. પરંતુ હરાજીના બીજા જ દિવસે તેણે મેદાન પર એવો ધમાકો કર્યો કે સૌની નજર તેના પર ટકી ગઈ. માત્ર 38 બોલમાં સદી અને 47 બોલમાં 119 રન ફટકારીને તેણે પોતાની પ્રતિભાનો પરચો આપ્યો. તેની આ ઇનિંગથી દિલ્હીએ મહિલા સ્થાનિક T20 ક્રિકેટમાં નવો ઇતિહાસ રચ્યો.
WPL 2027ની હરાજીમાં તનિષા સિંહ ₹10 લાખની બેઝ પ્રાઇસ સાથે સામેલ થઈ હતી, પરંતુ તેને કોઈ ખરીદદાર મળ્યો નહોતો. જોકે, હરાજીના બીજા જ દિવસે તનિષાએ મેદાન પર શાનદાર પ્રદર્શન કરીને પોતાની ક્ષમતા સાબિત કરી હતી.
23 વર્ષીય તનિષાએ હૈદરાબાદ સામે માત્ર 47 બોલમાં 119 રન બનાવ્યા હતા. તેની ઇનિંગમાં 25 ચોગ્ગા અને એક છગ્ગાનો સમાવેશ થયો હતો. તેણે શરૂઆતથી જ આક્રમક બેટિંગ કરીને વિરોધી ટીમના બોલરો પર દબાણ બનાવ્યું હતું.
તનિષાએ માત્ર 38 બોલમાં પોતાની સદી પૂરી કરી હતી. મહિલા T20 ક્રિકેટમાં આ સંયુક્ત રીતે ત્રીજી સૌથી ઝડપી સદી છે. તનિષા કરતાં ઝડપી સદી કિરણ નવગિરે (34 બોલ) અને સોફી ડિવાઇન (36 બોલ) ફટકારી ચૂકી છે. તનિષાએ ડિઆન્ડ્રા ડોટિનના 38 બોલમાં સદીના રેકોર્ડની બરાબરી કરી છે.
તનિષાની આક્રમક બેટિંગને ભૂતપૂર્વ ભારતીય ખેલાડી પ્રિયા પુનિયાનો પણ સારો સાથ મળ્યો હતો. બંનેએ બીજી વિકેટ માટે માત્ર 66 બોલમાં 160 રનની ભાગીદારી નોંધાવી હતી. આ ભાગીદારીએ દિલ્હીને વિશાળ સ્કોર સુધી પહોંચાડવામાં મહત્વની ભૂમિકા ભજવી હતી.
દિલ્હીએ નિર્ધારિત 20 ઓવરમાં છ વિકેટ ગુમાવીને 262 રન બનાવ્યા હતા. આ મહિલા સ્થાનિક T20 ક્રિકેટનો અત્યાર સુધીનો સૌથી મોટો સ્કોર છે. અગાઉ આ રેકોર્ડ ગોવાના નામે હતો, જેણે 2019-20ની સિઝનમાં અરુણાચલ પ્રદેશ સામે બે વિકેટે 257 રન બનાવ્યા હતા.
263 રનના લક્ષ્યનો પીછો કરવા ઉતરેલી હૈદરાબાદની ટીમ દિલ્હીના બોલરો સામે ટકી શકી નહીં. હૈદરાબાદે આઠ વિકેટે 154 રન બનાવ્યા હતા અને 108 રનથી હારનો સામનો કરવો પડ્યો હતો. દિલ્હીની સુમિતિ સોનીએ 28 રન આપીને ત્રણ વિકેટ ઝડપી હતી.
WPL હરાજીમાં અનસોલ્ડ રહેલી તનિષા સિંહે પોતાની ઇનિંગથી સાબિત કર્યું કે તેની પાસે મોટા સ્તરે રમવાની ક્ષમતા છે. જોકે, આ પ્રદર્શનના આધારે આગામી સમયમાં કોઈ ફ્રેન્ચાઇઝી તેને તક આપશે કે નહીં તે જોવાનું રહેશે. હાલ તેની 38 બોલની સદી અને દિલ્હીના રેકોર્ડ સ્કોરની ચર્ચા મહિલા ક્રિકેટમાં થઈ રહી છે.
તનિષાની આ યાદગાર ઇનિંગે હરાજીમાં ખેલાડીઓની પસંદગી અંગે પણ ચર્ચા જગાવી છે. હરાજીમાં તક ન મળ્યા બાદ આટલું મોટું પ્રદર્શન કરવાથી તેણે પોતાની પ્રતિભા તરફ સૌનું ધ્યાન દોર્યું છે. હવે આગામી ટૂર્નામેન્ટમાં તેના પ્રદર્શન અને ફ્રેન્ચાઇઝીઓના નિર્ણય પર નજર રહેશે. (PC:PTI/X)
