શુભમન ગિલની કેપ્ટનશીપમાં ટીમ ઈન્ડિયાની હાલત કફોડી, 9 મહિનામાં ગુમાવી 3 ODI શ્રેણી
શુભમન ગિલની ODI કેપ્ટનશીપનો અત્યાર સુધીનો પ્રવાસ ટીમ ઈન્ડિયા માટે પડકારજનક રહ્યો છે. ગિલે કમાન સંભાળ્યા બાદ ભારતે મોટી ટીમો સામે સતત સંઘર્ષ કર્યો છે. છેલ્લા નવ મહિનામાં રમાયેલી ચાર ODI શ્રેણીમાં ટીમ માત્ર એક જ જીતી શકી છે, જ્યારે ત્રણ શ્રેણીમાં હારનો સામનો કરવો પડ્યો છે.
શુભમન ગિલના નેતૃત્વ હેઠળ ટીમ ઈન્ડિયાની ODI સફર અત્યાર સુધી નિરાશાજનક રહી છે. ઓક્ટોબર 2025માં ODI ટીમની કમાન સંભાળ્યા બાદ ભારતીય ટીમે જીત કરતાં વધુ હારનો સામનો કર્યો છે. ઓસ્ટ્રેલિયા અને ઈંગ્લેન્ડ જેવી મજબૂત ટીમો સામે મળેલી હાર બાદ હવે ભારતીય ટીમની તૈયારી અને વ્યૂહરચના પર સવાલ ઉઠી રહ્યા છે.
ગિલની કેપ્ટનશીપમાં ભારતે છેલ્લા નવ મહિનામાં કુલ ચાર ODI શ્રેણી રમી છે, જેમાંથી માત્ર એકમાં જીત મેળવી છે. આ એકમાત્ર સફળતા અફઘાનિસ્તાન સામે ઘરઆંગણે મળી હતી. ત્રણ મેચની આ શ્રેણીમાં ભારતે અફઘાનિસ્તાનને 3-0 થી હરાવ્યું હતું.
ગિલે ODI કેપ્ટન તરીકે ડેબ્યૂ ઓસ્ટ્રેલિયા સામે કર્યું હતું. જોકે, આ શરૂઆત યાદગાર રહી નહોતી. ઓસ્ટ્રેલિયાએ ત્રણ મેચની ODI શ્રેણીમાં ભારતને 2-1 થી હરાવીને શ્રેણી પોતાના નામે કરી હતી. આ હાર બાદ ટીમ ઈન્ડિયાની મુશ્કેલીઓ વધી હતી.
ત્યારબાદ ન્યૂઝીલેન્ડ સામે ઘરઆંગણે રમાયેલી ODI શ્રેણીમાં પણ ભારતને મોટો ઝટકો લાગ્યો હતો. 1988 બાદ પ્રથમ વખત ન્યૂઝીલેન્ડે ભારતીય ધરતી પર ODI શ્રેણી જીતી હતી. કિવી ટીમે ભારતને 2-1થી હરાવીને 37 વર્ષ જૂનો રેકોર્ડ તોડી નાખ્યો હતો.
ઈંગ્લેન્ડ સામે વિદેશી ધરતી પર ગિલ પાસે પ્રથમ ODI શ્રેણી જીતવાની તક હતી, પરંતુ ટીમ તેનો ફાયદો ઉઠાવી શકી નહીં. ભારત 2-1 થી શ્રેણી હારી ગયું. હવે ગિલના નેતૃત્વમાં ટીમ ઈન્ડિયાને 2027 વનડે વર્લ્ડ કપ પહેલા પોતાની ખામીઓ દૂર કરવાની જરૂર છે, કારણ કે સતત હાર ટીમ માટે ચિંતાનો વિષય બની રહી છે. (PC: PTI)
