Breaking News: જેલમાંથી છૂટ્યા બાદ ફટકારી સદી, મેદાન પર જ રડી પડ્યો આ ક્રિકેટર
બંગાળના વિકેટકીપર-બેટ્સમેને મુશ્કેલ સમય બાદ રણજી ટ્રોફીમાં શાનદાર વાપસી કરી છે. દિલ્હી સામે 2026-27 સીઝનની પ્રથમ મેચમાં તેણે સદી ફટકારી હતી. સદી પૂરી કરતાં જ તે ભાવુક થઈ ગયો હતો અને મેદાન પર જ રડી પડ્યો હતો. અજેલમાં 36 દિવસ વિતાવ્યા બાદ તેને જામીન મળ્યા હતા.
વિવાદો, કાનૂની અવરોધો અને 36 દિવસ જેલમાં રહ્યા પછી, બંગાળના યુવા વિકેટકીપર-બેટ્સમેન અભિષેક પોરેલે મેદાન પર ઐતિહાસિક અને ભાવનાત્મક વાપસી કરી.
તાજેતરમાં બળાત્કાર અને ગુનાહિત ધાકધમકી કેસમાં જામીન પર બહાર આવેલા 24 વર્ષીય પોરેલને રણજી ટ્રોફી 2026-27 ની પહેલી મેચ માટે ક્રિકેટ એસોસિએશન ઓફ બંગાળ દ્વારા ટીમમાં સામેલ કરવામાં આવ્યો હતો.
તેણે એલીટ ગ્રુપ-C મેચના બીજા દિવસે દિલ્હી સામે લડાયક સદી ફટકારીને તેના ટીકાકારોને યોગ્ય જવાબ આપ્યો. સદી પૂર્ણ કરતાની સાથે જ તે પોતાની લાગણીઓ પર કાબૂ રાખી શક્યો નહીં અને પીચની વચ્ચે જ રડી પડ્યો.
પાંચમા નંબરે બેટિંગ કરવા આવતા, પોરેલે માત્ર 137 બોલમાં 11 ચોગ્ગા અને એક છગ્ગાની મદદથી પોતાની સદી પૂરી કરી. દિવસની રમતના અંતે તે 114 રન બનાવીને અણનમ રહ્યો. તેણે સદીકાર સુદીપ કુમાર ઘરામી સાથે ચોથી વિકેટ માટે 199 રનની અતૂટ ભાગીદારી કરી.
વિકેટકીપર-બેટ્સમેન અભિષેક પોરેલ 2026 ની IPL માં દિલ્હી કેપિટલ્સ માટે પણ રમ્યો હતો.
અભિષેક પોરેલ માટે છેલ્લા કેટલાક મહિના પડકારજનક રહ્યા છે. પોરેલની 11 ઓગસ્ટ, 2026 ના રોજ બળાત્કાર અને ગુનાહિત ધમકીના આરોપસર ધરપકડ કરવામાં આવી હતી.
કર્ણાટકની એક મેડિકલ વિદ્યાર્થીનીની ફરિયાદના આધારે આ કેસ દાખલ કરવામાં આવ્યો હતો, જેમાં આરોપ લગાવવામાં આવ્યો હતો કે બંને સાડા ત્રણ વર્ષથી રિલેશનશિપમાં હતા અને લગ્નનું વચન આપવામાં આવ્યું હતું, પરંતુ બાદમાં વિવાદને કારણે તેમણે ઇનકાર કરી દીધો હતો.
અભિષેક પોરેલની અટકાયત કરવામાં આવી હતી. આશરે 36 દિવસની કસ્ટડી બાદ, ચુંચુરા કોર્ટે તેમને નિયમિત જામીન આપ્યા હતા. (PC:PTI/X)
