IND vs ZIM: વિકેટ લીધા પછી તરત જ ઘાયલ થયો યુવા ખેલાડી, ફિટનેસ મેનેજમેન્ટ પર ફરી ઉઠ્યા સવાલ
ઈંગ્લેન્ડ પ્રવાસ પર હર્ષિત રાણા અને વોશિંગ્ટન સુંદરની ઈજાઓ બાદ, ટીમ ઈન્ડિયાને હવે ઝિમ્બાબ્વે પ્રવાસ પર મોટો ઝટકો લાગ્યો છે. એક મહિના પહેલા જ ડેબ્યૂ કરનાર યુવા ફાસ્ટ બોલર મેચ દરમિયાન ઘાયલ થયો હતો.આનાથી ભારતીય ખેલાડીઓમાં ચાલી રહેલી ઈજાની સમસ્યા વધી ગઈ છે, આ પરિસ્થિતિ પર BCCI પહેલાથી જ નારાજગી વ્યક્ત કરી ચૂક્યું છે.
આયર્લેન્ડ અને ઈંગ્લેન્ડ સામેની તાજેતરની હાર બાદ ટીમ ઈન્ડિયાને ઘણી ટીકાઓનો સામનો કરવો પડ્યો છે. જોકે, ખેલાડીઓની ફિટનેસ ટીમના પ્રદર્શન કરતા વધુ ચિંતાનો વિષય બની ગઈ છે. એક પછી એક ઘણા ખેલાડીઓ ઘાયલ થઈ રહ્યા છે. આ યાદીમાં હવે યુવા ફાસ્ટ બોલર પણ સામેલ થયો છે.
ભારત-ઝિમ્બાબ્વે T20 શ્રેણીની બીજી મેચમાં પહેલા બેટિંગ કરતા ભારતીય ટીમે 219 રનનો શાનદાર સ્કોર બનાવ્યો. જ્યારે બોલિંગમાં યશ ઠાકુર અને પ્રિન્સ યાદવે શરૂઆતમાં જ વિકેટ લઈ ભારતને સરીએ શરૂઆત અપાવી હતી. પ્રિન્સ યાદવે બે વિકેટ લીધી હતી.
પ્રિન્સ યાદવે ઇનિંગની સાતમી ઓવરના બીજા બોલ પર ઝિમ્બાબ્વેના કેપ્ટન સિકંદર રઝાને આઉટ કર્યો. પછી, જ્યારે તે નવા બેટ્સમેનને પહેલો બોલ ફેંકવા માટે દોડવા લાગ્યો, ત્યારે તેને પગમાં દુખાવો થયો. તેના હાવભાવથી એવું લાગતું હતું કે તેને પણ હેમસ્ટ્રિંગમાં ઈજા થઈ છે.
પ્રિન્સ યાદવને તેની ઓવરની વચ્ચે ડ્રેસિંગ રૂમમાં પાછા ફરવું પડ્યું, ત્યારબાદ શિવમ દુબેએ બાકીના ચાર બોલ ફેંક્યા. તેણે મેચમાં ફક્ત આઠ બોલ ફેંક્યા. જોકે, તેની ઈજા ભારતીય ટીમ મેનેજમેન્ટ માટે ચિંતાનું કારણ બની છે, કારણ કે તે છેલ્લા બે અઠવાડિયામાં ઈજાગ્રસ્ત થનાર તે ત્રીજો ભારતીય ખેલાડી છે.
યાદવની ઈજા પણ ચિંતાજનક છે કારણ કે આ તેની લગભગ 40 દિવસ જૂની આંતરરાષ્ટ્રીય કારકિર્દીમાં ફક્ત નવમી મેચ છે, અને આટલી ઓછી મેચ રમવા છતાં, તેને હેમસ્ટ્રિંગની ઈજા થઈ હતી. આનાથી તેની ફિટનેસ અને સેન્ટર ઓફ એક્સેલન્સ (CoE) ખાતેની મેડિકલ ટીમ પર પ્રશ્નો ઉભા થયા છે. તાજેતરના એક અહેવાલમાં જણાવાયું છે કે ટીમના ઘણા ખેલાડીઓની ઈજાઓની વધતી સંખ્યાથી BCCI અત્યંત નારાજ છે. (PC:X/BCCI)
