ટીમ ઈન્ડિયામાં જસપ્રીત બુમરાહનું સ્થાન લેનાર જમ્મુ અને કાશ્મીરના આકિબ નબીની કુલ સંપત્તિ કેટલી છે?
જમ્મુ-કાશ્મીરના ક્રિકેટર આકિબ નબીને પહેલીવાર ટીમ ઈન્ડિયામાં સ્થાન મળ્યું છે. ઈજાગ્રસ્ત જસપ્રીત બુમરાહના સ્થાને પસંદ થયેલા આકિબની ચર્ચા હવે તેની બોલિંગ સાથે સાથે તેની કમાણી અને નેટવર્થને લઈને પણ થઈ રહી છે. IPLમાં મળેલા મોટા કોન્ટ્રાક્ટ બાદ તેની કમાણીમાં મોટો વધારો થયો છે.
ભારતીય ક્રિકેટ કંટ્રોલ બોર્ડ (BCCI)એ શ્રીલંકા સામેની બે મેચની ટેસ્ટ શ્રેણી માટે જસપ્રીત બુમરાહના સ્થાને આકિબ નબીને ટીમ ઈન્ડિયામાં સામેલ કર્યો છે. આકિબ માટે આ તેની કારકિર્દીની સૌથી મોટી ઉપલબ્ધિ છે.
જમ્મુ-કાશ્મીરના આ ખેલાડીનો ઘરેલુ ક્રિકેટમાં શાનદાર રેકોર્ડ રહ્યો છે. તે 2018થી જમ્મુ-કાશ્મીર માટે ક્રિકેટ રમી રહ્યો છે અને 2020માં તેણે ફર્સ્ટ ક્લાસ ક્રિકેટમાં ડેબ્યૂ કર્યું હતું.
રણજી ટ્રોફી 2025-26માં આકિબ નબીએ શાનદાર પ્રદર્શન કરતા 60 વિકેટ ઝડપી હતી. આ પ્રદર્શન બાદ તેની ચર્ચા વધી હતી અને IPL 2026માં દિલ્હી કેપિટલ્સે તેને રૂ. 8.40 કરોડમાં ખરીદ્યો હતો.
મીડિયા રિપોર્ટ્સ અનુસાર, IPL કોન્ટ્રાક્ટ અને અન્ય આવકને કારણે 2026 સુધીમાં આકિબ નબીની કુલ સંપત્તિ અંદાજે રૂ. 10 થી 15 કરોડની વચ્ચે હોવાનો અંદાજ છે. જોકે, તેની વ્યક્તિગત સંપત્તિ અને લક્ઝરી કાર કલેક્શન અંગે વધુ માહિતી ઉપલબ્ધ નથી.
આકિબ નબીની ક્રિકેટ કારકિર્દી પણ પ્રભાવશાળી રહી છે. તેણે 43 ફર્સ્ટ ક્લાસ મેચમાં 162 વિકેટ, 36 લિસ્ટ-A મેચમાં 56 વિકેટ અને 39 T20 મેચમાં 43 વિકેટ ઝડપી છે. હવે ટીમ ઈન્ડિયામાં મળેલી તકને તે કેવી રીતે ઉપયોગમાં લે છે તેના પર સૌની નજર રહેશે. (PC:PTI/X)
