Breaking News: 244 રનની હાર અને 4 શરમજનક રેકોર્ડ, ચોથી વનડેમાં ભારતીય ટીમની થઈ ફજેતી
ન્યુઝીલેન્ડ સામેની ચોથી વનડેમાં ભારતીય ટીમને 244 રનથી કારમી હારનો સામનો કરવો પડ્યો છે. 334 રનના લક્ષ્યાંકનો પીછો કરવા ઉતરેલી ટીમ ઈન્ડિયા માત્ર 89 રનમાં ઓલઆઉટ થઈ ગઈ. આ હાર સાથે ભારતીય ટીમના નામે ચાર અનિચ્છનીય રેકોર્ડ નોંધાયા છે. આમાંથી એક રેકોર્ડ કેપ્ટન શ્રેયસ અય્યરના નામે પણ નોંધાયો છે.
ન્યુઝીલેન્ડ સામે ચોથી વનડે ભારતીય ક્રિકેટ ટીમ માટે આંચકો સાબિત થઈ.
પહેલા બેટિંગ કરતા ન્યુઝીલેન્ડે 333 રન બનાવ્યા, જેના જવાબમાં ટીમ ઈન્ડિયા ફક્ત 89 રનમાં ઓલઆઉટ થઈ ગઈ.
આ સાથે ટીમ ઈન્ડિયાએ ચાર શરમજનક રેકોર્ડ બનાવ્યા હતા.
SENA (દક્ષિણ આફ્રિકા, ઇંગ્લેન્ડ, ન્યુઝીલેન્ડ અને ઓસ્ટ્રેલિયા) પ્રવાસમાં ભારતનો આ સૌથી મોટો ODI પરાજય છે. અગાઉનો પરાજય 2004માં સિડનીમાં થયો હતો, જ્યારે ભારત 208 રનથી હારી ગયું હતું. હવે, ભારત 244 રનથી હારી ગયું છે.
પહેલીવાર ભારતીય ટીમ એક જ વર્ષમાં ODI અને T20I બંનેમાં 100 થી ઓછા રનમાં ઓલઆઉટ થઈ ગઈ છે. રસપ્રદ વાત એ છે કે, બંને વખત શ્રેયસ અય્યરની કેપ્ટનશીપ હેઠળ આવું બન્યું છે.
આ ભારતીય ટીમનો ન્યુઝીલેન્ડમાં સૌથી ઓછો વનડે સ્કોર છે. આ ન્યુઝીલેન્ડ સામે ભારતનો બીજો સૌથી ઓછો સ્કોર પણ છે. આ પહેલા 2010માં ટીમ ઈન્ડિયા ન્યુઝીલેન્ડ સામે 88 રનમાં ઓલઆઉટ થઈ ગઈ હતી.
શ્રેયસ અય્યર પોતાના વનડે ડેબ્યૂમાં શૂન્ય રન પર આઉટ થનાર પ્રથમ ભારતીય કેપ્ટન બન્યો. આ પહેલા આ અનિચ્છનીય રેકોર્ડ વિરાટ કોહલી અને રોહિત શર્માના નામે હતો, જેઓ 2-2 રન બનાવીને આઉટ થયા હતા.
હવે વનડે શ્રેણીમાં જીત મેળવવા માટે ભારતીય ટીમે પાંચમી મેચ જીતવી પડશે. (PC:PTI/X)
Published On - 4:20 pm, Fri, 13 November 26
