Breaking News: પહેલા 2 બોલમાં 2 ચોગ્ગા… વૈભવ સૂર્યવંશીએ અફઘાનિસ્તાન સામે મચાવી ધૂમ, 44 રનની તોફાની ઈનિંગ
દામ્બુલામાં રમાયેલી ત્રિકોણીય વન-ડે શ્રેણીની મેચમાં યુવા બેટ્સમેન વૈભવ સૂર્યવંશીએ ફરી એકવાર પોતાની આક્રમક બેટિંગથી સૌનું ધ્યાન ખેંચ્યું. અફઘાનિસ્તાન A સામે તેણે ઈનિંગની શરૂઆત જ સતત બે ચોગ્ગાથી કરી હતી. તેની ઝડપી ઈનિંગના કારણે ઈન્ડિયા Aને મજબૂત શરૂઆત મળી અને ટીમે પાવરપ્લેમાં જ દબદબો જમાવી દીધો.
શ્રીલંકામાં ત્રિકોણીય વન-ડે શ્રેણીની ઈન્ડિયા A ની બીજી મેચમાં 15 વર્ષના વૈભવ સૂર્યવંશીએ અફઘાનિસ્તાન A સામે પોતાની ઈનિંગની શરૂઆત શ્રીલંકા A સામેની પહેલી મેચની જેમ જ ચોગ્ગા સાથે કરી હતી.
અફઘાનિસ્તાન A સામે ટોસ બાદ બેટિંગ કરવા ઉતરેલી ઈન્ડિયા A ની ટીમને ઓપનરો પ્રભસિમરન સિંહ અને વૈભવ સૂર્યવંશીએ શાનદાર શરૂઆત અપાવી હતી. પ્રથમ ઓવરમાં જ વૈભવે આક્રમક બેટિંગ કરી.
અફઘાનિસ્તાન તરફથી મોહમ્મદ ઈબ્રાહિમે પ્રથમ ઓવર ફેંકી હતી. પ્રભસિમરને પહેલા બોલ પર સિંગલ લઈને વૈભવને સ્ટ્રાઈક આપી હતી. ત્યારબાદ વૈભવે મેચના બીજા અને ત્રીજા બોલ પર સતત બે ચોગ્ગા ફટકાર્યા.
આ મેચમાં વૈભવે પોતાના પહેલા બે બોલ પર બે બેક ટુ બેક બાઉન્ડ્રી ફટકારી બાઉન્ડ્રી સાથે આક્રમક શરૂઆતની તેની પ્રથા આગળ વધારી હતી. પ્રથમ ઓવરમાં વૈભવ ત્રણ બોલ રમ્યો અને બે ચોગ્ગાની મદદથી 9 રન બનાવ્યા. આગળ પણ તેણે પોતાના આક્રમક અંદાજને યથાવત રાખ્યો અને નિયમિત અંતરે બાઉન્ડ્રી ફટકારતો રહ્યો.
વૈભવ અને પ્રભસિમરન વચ્ચે પ્રથમ વિકેટ માટે 74 રનની ભાગીદારી નોંધાઈ હતી. વૈભવની ઈનિંગ 22 બોલમાં 44 રન પર સમાપ્ત થઈ હતી. તેણે 200ના સ્ટ્રાઈક રેટથી બેટિંગ કરતાં 9 ચોગ્ગા ફટકાર્યા હતા. તે માત્ર 6 રન માટે અડધી સદી ચૂકી ગયો હતો. (PC: X/BCCI/Sri Lanka Cricket)
