Breaking News: 100 કરોડનો મહેલ, 35 કરોડની કાર, ક્રિકેટના ભગવાનનું હજારો કરોડનું સામ્રાજ્ય, જાણો સચિન તેંડુલકરની કુલ સંપત્તિ કેટલી છે
વિશ્વનો મહાન ક્રિકેટર સચિન તેંડુલકર આજે 53 વર્ષનો થયો છે. તેને ક્રિકેટ ભગવાન તરીકે પણ ઓળખવામાં આવે છે. સચિનના જન્મદિવસ પર ચાલો તેની સફર, તેની જીવનશૈલી, કુલ સંપત્તિ, ઘર અને કાર કલેક્શન વિશે જાણીએ.
ક્રિકેટનો ભગવાન સચિન તેંડુલકર આજે તેનો 53મો જન્મદિવસ ઉજવી રહ્યો છે. 24 એપ્રિલ, 1973 ના રોજ મુંબઈમાં જન્મેલા સચિને 16 વર્ષની ઉંમરે આંતરરાષ્ટ્રીય ક્રિકેટમાં પ્રવેશ કર્યો અને આગામી બે દાયકા સુધી વિશ્વ ક્રિકેટ પર રાજ કર્યું હતું.
સચિન તેંડુલકરે આંતરરાષ્ટ્રીય ક્રિકેટમાં અનેક રેકોર્ડ બનાવ્યા છે, જેમાં કેટલાય રેકોર્ડ એવા છે જેને તોડવા અશક્ય છે. સચિને ભારત માટે 200 ટેસ્ટ મેચ રમી, જેમાં 15,921 રન બનાવ્યા છે. તેણે 463 વનડેમાં 18,426 રન પણ બનાવ્યા.
સચિન તેંડુલકરે કુલ 100 સદી ફટકારી છે અને વનડે ફોર્મેટમાં પહેલી બેવડી સદી ફટકારવાનો રેકોર્ડ પણ તેના નામે છે. 2011માં ભારતને વર્લ્ડ કપ જીતાડવામાં સચિને મહત્વપૂર્ણ ભૂમિકા ભજવી હતી. 2013માં વાનખેડે સ્ટેડિયમ ખાતે છેલ્લી મેચ રમી તેણે ક્રિકેટમાંથી નિવૃત્તિ લીધી હતી.
સચિન તેંડુલકર તેની પત્ની અંજલિ અને બે બાળકો સાથે મુંબઈના બાંદ્રા (વેસ્ટ) માં એક વૈભવી બંગલામાં રહે છે. પેરી ક્રોસ રોડ પર સ્થિત આ ઘર આશરે 6,000 ચોરસ ફૂટમાં ફેલાયેલું છે. આ ત્રણ માળના બંગલાની વર્તમાન કિંમત આશરે ₹80 થી ₹100 કરોડ હોવાનો અંદાજ છે. તે કેરળમાં એક વોટરફ્રન્ટ બંગલો અને લંડનમાં એક ભવ્ય મિલકત પણ ધરાવે છે.
સચિનને લક્ઝરી કારનો શોખ છે. તે BMWનો બ્રાન્ડ એમ્બેસેડર પણ છે. તેના કાર કલેક્શનમાં BMW i8 અને BMW 7-Series છે. સચિન પાસે Ferrari 360 Modena પણ છે, જે ફેમસ રેસર માઈકલ શુમાકરે તેને ગિફ્ટ કરી હતી. તેણે તાજેતરમાં જ Porsche 911 Turbo S ખરીદી છે. તેની બધી કારની સંયુક્ત કિંમત આશરે ₹35 કરોડથી વધુ છે.
સચિન તેંડુલકર વિશ્વના સૌથી ધનિક ક્રિકેટરોમાં એક છે. નિવૃત્તિના આટલા વર્ષો પછી પણ તેમની બ્રાન્ડ વેલ્યુ કરોડોમાં છે. એક અહેવાલ મુજબ, તેંડુલકરની કુલ સંપત્તિ ₹1,350 કરોડથી ₹1,500 કરોડની વચ્ચે હોવાનો અંદાજ છે. નિવૃત્તિ પછી તેની આવકના મુખ્ય સ્ત્રોત બ્રાન્ડ એન્ડોર્સમેન્ટ, બિઝનેસ વેન્ચર અને ઈન્વેસ્ટમેન્ટ છે.
સચિન હજુ પણ એપોલો ટાયર્સ, ITC અને લ્યુમિનસ જેવી મોટી બ્રાન્ડ્સનો ચહેરો છે. તેણે ઈન્ડિયન સુપર લીગ ટીમ અને અનેક સ્ટાર્ટઅપ્સમાં રોકાણ કર્યું છે. તે સચિન સિગ્નેચર જેવા રેસ્ટોરન્ટ અને તેમના નામ હેઠળ અન્ય બિઝનેસ પણ ચલાવે છે. (PC:PTI/X)
