Breaking News: કોલકાતા નાઈટ રાઈડર્સને મોટો ફટકો, ત્રીજો બોલર IPL 2026 માંથી થયો બહાર
IPL સિઝન પહેલા લગભગ દરેક ફ્રેન્ચાઈઝી તેના કેટલાક ખેલાડીઓની ઈજાઓનો સામનો કરી રહી છે, અને ઈજાગ્રસ્ત થયેલા મોટાભાગના ફાસ્ટ બોલરો છે. જોકે, KKR ને સૌથી વધુ નુકસાન થયું છે, હરાજી પછી તેમનો ત્રીજો ઝડપી બોલર ટુર્નામેન્ટમાંથી બહાર થઇ ગયો છે.
ખેલાડીઓને ઈજા થવાનો અને IPL 2026 સિઝનમાંથી બહાર થવાનો કમનસીબ ટ્રેન્ડ સતત ચાલુ છે. ખાસ કરીને ઘણા ફાસ્ટ બોલરો ઈજાઓનો ભોગ બન્યા છે. ભૂતપૂર્વ ચેમ્પિયન કોલકાતા નાઈટ રાઈડર્સ આ સંદર્ભમાં સૌથી વધુ પરેશાન દેખાય છે, કારણ કે તેમના ઘણા ફાસ્ટ બોલરને ટુર્નામેન્ટમાંથી બહાર થઈ ગયા છે.
એક અહેવાલ મુજબ, ભારતીય ફાસ્ટ બોલર આકાશ દીપ ઈજાને કારણે IPL 2026 માં રમી શકશે નહીં. આકાશ દીપ કમરની સમસ્યાથી પીડાઈ રહ્યો છે અને હજુ સુધી તેમાંથી બહાર આવ્યો નથી. તેને પીઠમાં સ્ટ્રેસ ફ્રેક્ચર છે. KKR દ્વારા મીની ઓક્શનમાં ₹1 કરોડની બેઝ પ્રાઈઝમાં ખરીદવામાં આવ્યો હતો.
ત્રણ વખતના ચેમ્પિયન કોલકાતા નાઈટ રાઈડર્સ માટે આ એક મોટો ફટકો છે, જેના કારણે તેમનું ફાસ્ટ બોલિંગ આક્રમણ નોંધપાત્ર રીતે નબળું પડી ગયું છે. હરાજી પછી આ ત્રીજો ફાસ્ટ બોલર છે જે આ સિઝનમાં KKR વતી રમી શકશે નહીં.
સૌપ્રથમ, KKR એ BCCIના આદેશને પગલે બાંગ્લાદેશી ફાસ્ટ બોલર મુસ્તફિઝુર રહેમાનને રિલીઝ કર્યો. આ પછી, યુવા ભારતીય બોલર હર્ષિત રાણા ઈજાને કારણે ટુર્નામેન્ટમાંથી બહાર થઈ ગયો, અને હવે આકાશ દીપ પણ આ વખતે ટુર્નામેન્ટમાંથી બહાર થઈ ગયો છે.
KKR એ હજુ સુધી આ ત્રણમાંથી કોઈના રિપ્લેસમેન્ટની જાહેરાત કરી નથી, પરંતુ કેટલાક નિર્ણયો ટૂંક સમયમાં લેવામાં આવી શકે છે. જોકે, અજિંક્ય રહાણેની આગેવાની હેઠળની ટીમ માટે તણાવ હજુ સમાપ્ત થયો નથી.
શ્રીલંકાના ફાસ્ટ બોલર મથેશા પથિરાના, જેને હરાજીમાં ₹18 કરોડમાં ખરીદવામાં આવ્યો હતો, તે પણ ટુર્નામેન્ટની શરૂઆતમાં ઉપલબ્ધ રહેશે નહીં. KKR ને આશા છે કે તે એપ્રિલના મધ્ય સુધીમાં ટીમમાં પાછો ફરી શકશે. (PC:PTI/X)
