ચેમ્પિયન્સ ટ્રોફીમાં શરમજનક હાર બાદ પાકિસ્તાન ટીમમાં મોટી ઉથલપાથલ, સ્ટાર બેટ્સમેન લેશે નિવૃત્તિ
ન્યુઝીલેન્ડ અને પછી ભારત સામે કારમી હાર સાથે ચેમ્પિયન્સ ટ્રોફીમાં પાકિસ્તાન ટીમની સફરનો અંત આવી ગયો છે. ચેમ્પિયન્સ ટ્રોફીમાં શરમજનક હાર બાદ પાકિસ્તાનનો સ્ટાર બેટ્સમેન નિવૃત્તિ લેશે તેવા સમાચાર સામે આવ્યા છે. પાકિસ્તાન ટીમને ચેમ્પિયન્સ ટ્રોફીમા જે રીતે હાર મળી છે તે જોતા આવનારા કેટલાક સમયમાં પાકિસ્તાન ક્રિકેટ ટીમમાં અનેક પરિવર્તન જોવા મળશે.
ટીમની હાર ઉપરાંત, ફખર ઝમાનનો આ નિર્ણય તેની ફિટનેસને કારણે પણ લાગે છે. ફખર ઝમાન આ ચેમ્પિયન્સ ટ્રોફી માટે પાકિસ્તાની ટીમનો ભાગ હતો પરંતુ ફિટનેસના કારણે તે છેલ્લા કેટલાક મહિનાઓથી મેદાનની બહાર હતો. ટુર્નામેન્ટ પહેલા તેણે ત્રણ મેચની ODI શ્રેણીમાં મેદાનમાં વાપસી કરી. અહીં તેનું પુનરાગમન જોરદાર હતું પરંતુ ચેમ્પિયન્સ ટ્રોફીની પહેલી મેચના બીજા બોલ પર ફિલ્ડિંગ કરતી વખતે તે ઘાયલ થઈ ગયો. ત્યારથી, તે સંઘર્ષ કરતો રહ્યો અને બેટિંગ કરતી વખતે પણ મુશ્કેલીમાં જોવા મળ્યો. આ મેચ સાથે તે ટુર્નામેન્ટમાંથી બહાર થઈ ગયો અને પછી ભારત સામે પણ રમી શક્યો નહીં.
યોગાનુયોગ, ફખરની ODI કારકિર્દી પણ 2017 ચેમ્પિયન્સ ટ્રોફીથી જ શરૂ થઈ હતી. આ ટુર્નામેન્ટની ફાઈનલમાં તેણે ભારત સામે શાનદાર સદી ફટકારીને પોતાની ટીમને ચેમ્પિયન બનાવી હતી. હવે 8 વર્ષ પછી ચેમ્પિયન્સ ટ્રોફીની પહેલી મેચમાં જ આઉટ થતા તેની કારકિર્દીનો અંત આવી રહ્યો છે. ફખરે 86 વનડે મેચોમાં 46 ની સરેરાશથી 3651 રન બનાવ્યા, જેમાં 11 સદી અને 17 અડધી સદીનો સમાવેશ થાય છે. તે પાકિસ્તાન માટે ODI માં બેવડી સદી ફટકારનાર એકમાત્ર બેટ્સમેન છે. (All Photo Credit :PTI / X)
Published On - 5:49 pm, Wed, 26 February 25
