WTC Final : ભારત અને દક્ષિણ આફ્રિકા WTCની ફાઈનલમાં ટકરાશે? ઓસ્ટ્રેલિયા આ રીતે બહાર થઈ શકે છે
વર્લ્ડ ટેસ્ટ ચેમ્પિયનશિપની ફાઈનલ માટેની રેસ ઘણી રોમાંચક બની ગઈ છે. ભારત, ઓસ્ટ્રેલિયા અને દક્ષિણ આફ્રિકા ફાઈનલમાં પહોંચવાના મોટા દાવેદાર છે. પરંતુ ગત વખતની ચેમ્પિયન ઓસ્ટ્રેલિયા હજુ પણ રેસમાંથી બહાર થઈ શકે છે. તેની પાસે હાલમાં 4 ટેસ્ટ મેચ બાકી છે.
જો ઓસ્ટ્રેલિયાને કોઈપણ ટીમ પર નિર્ભર થયા વિના ફાઈનલમાં પહોંચવું હશે તો બાકીની બે મેચ કોઈપણ ભોગે જીતવી પડશે. જો તે આમ કરવામાં સફળ થશે તો તે સીધું જ ફાઈનલમાં પોતાનું સ્થાન નિશ્ચિત કરી લેશે.
પરંતુ જો ઓસ્ટ્રેલિયા આ શ્રેણીની બંને મેચ હારી જાય છે, તો તે ફાઈનલની રેસમાંથી બહાર થઈ જશે, ભલે તે શ્રીલંકા સામેની બંને ટેસ્ટ મેચ જીતી જાય. જો ઓસ્ટ્રેલિયા બંને મેચ હારી જાય છે તો તેના મહત્તમ પોઈન્ટ માત્ર 57.02 થઈ જશે અને ભારતીય ટીમ તેનાથી આગળ રહેશે.
બીજી તરફ જો ઓસ્ટ્રેલિયા ભારત સામેની બાકીની બે મેચોમાં એક હારે અને એક ડ્રો કરે તો તેને ફાઈનલમાં પહોંચવા માટે શ્રીલંકાને 2-0થી હરાવવું પડશે. જો તે આમ કરવામાં પણ નિષ્ફળ જશે તો ફાઈનલ ભારત અને દક્ષિણ આફ્રિકા વચ્ચે રમાશે.
જો બંને ટીમો વચ્ચે બોર્ડર-ગાવસ્કર ટ્રોફી 2-2ની બરાબરી પર સમાપ્ત થાય છે, તો ઓસ્ટ્રેલિયાએ શ્રીલંકામાં એકપણ મેચ હાર્યા વિના શ્રેણી જીતવી પડશે, તો જ તે ફાઈનલમાં પહોંચી શકશે. આ સિવાય જો ઓસ્ટ્રેલિયા બોર્ડર-ગાવસ્કર ટ્રોફી 2-1થી જીતે છે તો તે સીધી ફાઈનલમાં પહોંચી શકે છે.
આનો અર્થ એ થયો કે ઓસ્ટ્રેલિયા માટે હાલમાં ફાઈનલનો રસ્તો સરળ નથી અને તે આ રેસમાંથી બહાર પણ થઈ શકે છે. બીજી તરફ, દક્ષિણ આફ્રિકાને ફાઈનલમાં પહોંચવા માટે 2 ટેસ્ટ મેચમાંથી માત્ર 1 મેચમાં પાકિસ્તાનને હરાવવાની જરૂર છે. (All Photo Credit : PTI / GETTY / ICC)
Published On - 5:40 pm, Wed, 18 December 24
