લોનની અગવડ સામે ઊભી કરો આ ‘સગવડ’, નહીતર લોન ભરતા જ રહી જશો
આજના સમયમાં ઘણા લોકો પર્સનલ લોન અને હોમ લોન લઈ રહ્યા છે. એવામાં ઘણા લોકો લોનની EMI ભરી શકતા નથી અને જો ભરી શકે છે તો ભવિષ્ય માટેની બચત તેમના માટે ના બરાબર હોય છે. એવામાં જો તમે પણ લોન લીધી હોય અથવા લેવાના હોય તો આજે જ લોનની સામે આ સગવડ ઊભી કરી નાખો, ભવિષ્યની બચત પણ થશે અને પછતાવાના દિવસો પણ નહી આવે.
એવામાં જો તમે તમારી હોમ લોન વસૂલવા માંગતા હોવ, તો તમારે SIP શરૂ કરવી પડશે. આ માટે, હોમ લોનની EMI શરૂ થતાંની સાથે જ તમારે તે જ સમયગાળા માટે માસિક SIP શરૂ કરવી જોઈએ. ટૂંકમાં જોઈએ તો, જો લોન 15 વર્ષ માટે હોય તો SIP 15 વર્ષ માટે હોય છે અને જો લોન 20 વર્ષ માટે હોય તો SIP 20 વર્ષ માટે હોય છે. આ SIP તમારા EMIની ઓછામાં ઓછી 25 ટકા જેટલી હોવી જોઈએ.
ધારો કે, તમે 8.75 ટકાના વ્યાજ દરે 20 વર્ષ માટે 30 લાખ રૂપિયાની લોન લીધી છે. હવે એની EMI રૂ. 26,511 છે, તો આ લોન પર તમારે પ્રિન્સિપલ અમાઉન્ટ અને વ્યાજ સહિત કુલ 63,62,717 રૂપિયા ચૂકવવા પડશે, જેમાંથી 33,62,717 રૂપિયા ફક્ત વ્યાજ માટેના હશે. હવે આમાં તમારે EMI રકમના 25%ની SIP શરૂ કરવી પડશે, જે 6,628 રૂપિયા હશે. તમારે આ રકમની SIP 20 વર્ષ સુધી ચલાવવી પડશે.
જો તમે 20 વર્ષ માટે 6,628 રૂપિયાનું રોકાણ કરો છો, તો માની લો કે તમને આ SIP પર 12% રિટર્ન મળે છે. હવે 20 વર્ષમાં તમને SIPમાંથી 60,96,815 રૂપિયા મળશે, જે તમારી લોનની કુલ રકમની આસપાસ હશે. જો તમને 13% રિટર્ન મળે છે, તો તમને 68,83,080 રૂપિયા મળશે જે તમારી લોન અને વ્યાજ કરતાં વધુ હશે.
હવે જો તમને 15 ટકા રિટર્ન મળે છે, તો તમે 20 વર્ષમાં SIP દ્વારા 87,95,843 રૂપિયા મેળવી શકો છો. જો કે, આ રકમ તમારી લોન અને વ્યાજ કરતાં ઘણી વધારે હશે.
મ્યુચ્યુઅલ ફંડમાં રોકાણ કરતા પહેલા તમારે સમજવું જોઈએ કે આ સ્કીમ બજારના જોખમોને આધીન છે. આમાં કોઈ ફિક્સ રિટર્ન નથી હોતું. આમાં જે પણ રિટર્ન મળે છે તે બજાર મુજબ વળતર પણ ઉપલબ્ધ છે. નિષ્ણાતો માને છે કે, લાંબા ગાળે તેનું સરેરાશ રિટર્ન 12 ટકા રહેશે. જો કે, ક્યારેક રિટર્ન 12 ટકાથી વધુ કે ઓછું હોઈ શકે છે.
