ઓલિમ્પિક 2036થી તમે કરી શકો છો કમાણી, 2024થી જ શરુ કરો આ તૈયારી
2036માં ઓલિમ્પિક ભારતમાં યોજાય તેવી શક્યતા છે. તેને લઈને અમદાવાદમાં હમણાથી જ તૈયારીઓ શરુ થઈ ગઈ છે. યજમાનીની તૈયારીના ભાગરુપે ગુજરાત યુનિવર્સિટી કેમ્પસમાં ઈન્ટરનેશનલ લેંગ્વેજ સેન્ટરનો સ્પેશિયલ ડિપાર્ટમેન્ટ શરુ કરવામાં આવશે.
ગુજરાત યુનિવર્સિટીમાં જૂન 2024થી જાપાનીઝ, ચાઈનીઝ, સ્પેનિશ, રશિયન, ફ્રેન્ચ, એરેબિક, જર્મન સહિત સાત ભાષાનું પ્રશિક્ષણ અપાશે.
2036ની ઓલિમ્પિક ગેમ્સની યજમાનીની તૈયારી તેમ જ ગિફ્ટ સિટીના ઈન્ટરનેશનલ સ્ટાન્ડર્ડ મુજબ ડેવલપમેન્ટના ભાગરુપે સરકારની સૂચનાથી આ સમગ્ર કવાયત હાથ ધરાઈ છે.
યુનિવર્સિટી કેમ્પસમાં આવેલા સ્ટડી એબ્રોડ પ્રોગ્રામ બિલ્ડિંગમાં ઈન્ટરનેશનલ લેંગ્વેજ સેન્ટરનો સ્પેશિયલ ડિપાર્ટમેન્ટ શરુ કરાશે.
ઓલિમ્પિક 2036 માટે વિદેશી ખેલાડીઓ અને પ્રતિનિધિઓ માટે વિદેશી ભાષાના એક્સપર્ટ તૈયાર કરવા માટે વિદેશી લેંગ્વેજ સેન્ટર તૈયાર કરાશે. આ ભાષાના એક્સપર્ટને ગિફ્ટસિટીમાંથી રોજગારીની તક મળશે.
ચાઈનીઝ, જાપાનીઝ, સ્પેનિશ, રશિયન , ફ્રેન્ચ, અરેબિક, જર્મન સહિતની સાત ભાષાઓને લગતા ડિપ્લોમા લેવલના તેમ જ સ્નાતક-અનુસ્નાતક કક્ષાના કોર્સ તેમજ રિસર્ચ પ્રોગ્રામ પણ શરુ કરાશે.