કાનુની સવાલ: High Courtનો મહત્વનો નિર્ણય, પત્નીની પેરેન્ટલ પ્રોપર્ટી પર પતિનો અધિકાર નથી
એક મહત્વપૂર્ણ ચુકાદામાં આંધ્ર પ્રદેશ હાઈકોર્ટે સ્પષ્ટ કર્યું કે જો કોઈ હિન્દુ મહિલાને તેના માતાપિતા પાસેથી મિલકત વારસામાં મળે છે અને તે વસિયત વગર મૃત્યુ પામે છે, તો તેના પતિ કે તેના સાસરિયાઓનો તે મિલકત પર કોઈ અધિકાર રહેશે નહીં.
ન્યાયાધીશ તરલાધા રાજશેખર રાવે, હિન્દુ ઉત્તરાધિકાર અધિનિયમ, 1956 ની કલમ 15(2)(A) ટાંકીને કહ્યું, "જો કોઈ સ્ત્રીને તેના પિતા કે માતા પાસેથી વારસામાં મિલકત મળી હોય અને તે કોઈ સંતાન વિના મૃત્યુ પામે, તો આવી મિલકત તેના પિતાના વારસદારો પાસે જશે, તેના પતિ પાસે નહીં."
આ કેસમાં મિલકતનો વિવાદ હતો. જેમાં એક મહિલાએ 2002 માં તેની પૌત્રીને મિલકત ભેટમાં આપી હતી. પૌત્રીનું 2005 માં કોઈ સંતાન વિના અવસાન થયું. ત્યારબાદ મહિલાએ ભેટ રદ કરી અને મિલકત તેની બીજી પૌત્રીને વારસામાં આપી.
મહિલાના મૃત્યુ પછી, બીજી પૌત્રીએ મહેસૂલ રેકોર્ડમાં તેનું નામ નોંધાવવાનો પ્રયાસ કર્યો, જેને શરૂઆતમાં મહેસૂલ અધિકારીએ સ્વીકાર્યો. જોકે, મૃતક પૌત્રીના પતિએ આ આદેશને પડકાર્યો અને પોતાની તરફેણમાં ચુકાદો મેળવ્યો.
બીજી પૌત્રીએ હાઈકોર્ટમાં અરજી દાખલ કરી હતી. જેમાં દલીલ કરવામાં આવી હતી કે મૃતક પૌત્રીના પતિનો મિલકત પર કોઈ કાનૂની અધિકાર નથી કારણ કે તે તેના માતૃ પક્ષ તરફથી આવી હતી અને તેને કોઈ બાળકો નથી.
કોર્ટે આ દલીલ સાથે સંમત થયા અને ઠરાવ્યું કે પતિનો મિલકત પર કોઈ અધિકાર નથી. કોર્ટે એમ પણ કહ્યું કે પતિને ભેટ રદ કરવાની માન્યતા પર પ્રશ્ન ઉઠાવવાનો કોઈ અધિકાર નથી. કારણ કે તેને તેની પત્ની પાસેથી મિલકત પર કોઈ કાનૂની અધિકાર વારસામાં મળ્યો નથી.
આખરે હાઈકોર્ટે નીચલા અધિકારીના આદેશને રદ કર્યો અને સંબંધિત તહસીલદારને મિલકત અરજદારની તરફેણમાં ટ્રાન્સફર કરવાનો નિર્દેશ આપ્યો.
