Breaking News : સોનાના ભાવમાં મોટી નવાજૂની થવાના એંધાણ! 3 Gold EFT ના ભાવ વધારાએ આપ્યા મોટા સંકેત, જાણો
બજાર બંધ થતાં પહેલાં ગોલ્ડ ETF માં ₹40 અબજની જંગી ખરીદી નોંધાઈ, જેના કારણે ત્રણ મોટા ETF તેમના 2000 દિવસના સર્વોચ્ચ સ્તરે પહોંચ્યા. વૈશ્વિક અનિશ્ચિતતા અને ભૂ-રાજકીય તણાવ, ખાસ કરીને ઈરાન પર સંભવિત હુમલાની ચિંતા વચ્ચે, રોકાણકારો સોનાને સલામત રોકાણ તરીકે જોઈ રહ્યા છે.
આજે શેરબજાર બંધ થાય તે પહેલાંના છેલ્લા અડધા કલાકમાં ગોલ્ડ ETF બજારમાં અસાધારણ હલચલ જોવા મળી. ત્રણ મોટા ગોલ્ડ ETF એ તેમના છેલ્લા 2,000 દિવસના સર્વકાલીન ઉચ્ચ સ્તરને તોડી નાખ્યા, જે બજારમાં સોનાની મજબૂત માંગ તરફ સંકેત કરે છે. સૌથી મહત્વની વાત એ છે કે માત્ર એક જ દિવસમાં આ ત્રણ ગોલ્ડ ETF માં મળીને અંદાજે ₹40 અબજની ભારે ખરીદી નોંધાઈ છે.
બજાર બંધ થવા પૂર્વે સોનાના ભાવમાં થયેલો આ તીવ્ર ઉછાળો સૂચવે છે કે આગામી 5થી 6 દિવસમાં વૈશ્વિક સ્તરે કોઈ મોટો વિકાસ થઈ શકે છે. રોકાણકારોમાં વધતી અનિશ્ચિતતા અને ભૂ-રાજકીય તણાવને કારણે સોનાને સલામત રોકાણ તરીકે જોવામાં આવી રહ્યું છે, જેના પરિણામે ભાવમાં આગળ પણ વધારો જોવા મળી શકે છે તેવી ધારણા વ્યક્ત કરવામાં આવી રહી છે.
આ વચ્ચે આંતરરાષ્ટ્રીય સ્તરે પણ ચિંતા વધતી જઈ રહી છે. એવી ચર્ચા છે કે અમેરિકા ગમે ત્યારે ઈરાન પર હુમલો કરી શકે છે. જો આવું બને અને strait of hormuz ને અમેરિકી જહાજો દ્વારા અવરોધવામાં આવે, તો ક્રૂડ ઓઇલની અચાનક અને તીવ્ર અછત સર્જાઈ શકે છે. વિશ્વનું લગભગ 85 ટકા તેલ strait of hormuz મારફતે પસાર થતું હોવાથી, આવી સ્થિતિ વૈશ્વિક તેલ બજાર પર ગંભીર અસર કરી શકે છે.
ગોલ્ડ ETFની કામગીરી પર નજર કરીએ તો HDFC ગોલ્ડ ETF સૌથી મજબૂત સાબિત થયો. આ ETF ₹151.67 પર બંધ થયો, જેમાં 8.22 ટકાનો નોંધપાત્ર વધારો જોવા મળ્યો. આશરે 37.2 મિલિયન યુનિટનું વોલ્યુમ ભારે સંસ્થાકીય ખરીદી દર્શાવે છે, જે બજારમાં મજબૂત વિશ્વાસનું પ્રતિબિંબ છે.
નિપ્પોન ઇન્ડિયા ETF ગોલ્ડ બીઇએસ પણ નોંધપાત્ર ઉછાળ સાથે આગળ રહ્યો. ગોલ્ડ બીઇએસનો ભાવ ₹146.95 રહ્યો, જેમાં 8.19 ટકાનો વધારો નોંધાયો. આશરે 257.9 મિલિયન યુનિટનું વિશાળ વોલ્યુમ આ ETFમાં ઊંચી તરલતા તેમજ રિટેલ અને HNI રોકાણકારોની મજબૂત ભાગીદારી દર્શાવે છે.
આ સાથે કોટક ગોલ્ડ ETF પણ મજબૂત પ્રદર્શન કરતો જોવા મળ્યો. કોટક ગોલ્ડ ETF ₹147.94 પર ટ્રેડ થયો, જેમાં 8.13 ટકાનો વધારો થયો. આશરે 16.3 મિલિયન યુનિટના વોલ્યુમ સાથે, ઓછા વોલ્યુમ હોવા છતાં ગોલ્ડ ETF ક્ષેત્રમાં એકંદરે સકારાત્મક ખરીદીની ભાવના યથાવત હોવાનું સ્પષ્ટ થાય છે.(નોંધ : અહીં આપવામાં આવેલી માહિતી ફક્ત આપની જાણકારી માટે છે. કોઈ પણ રોકાણ કરવા પહેલા નિષ્ણાંતોની સલાહ લેવી જરૂરી છે.)
Published On - 4:06 pm, Thu, 29 January 26
