Breaking News : ગરમીમાં બાઇકનું એન્જિન ગરમ થવા લાગ્યું? અવગણશો નહીં આ ખાતરનાક સંકેતો આપે છે જાણો
ઉનાળાનો પારો 40 ડિગ્રી પાર! કાળઝાળ ગરમીમાં માત્ર તમે નહીં, તમારી બાઇક પણ હાંફી જાય છે. એન્જિન ઓવરહીટિંગ માઇલેજ ઘટાડે છે અને ભારે રિપેરિંગ ખર્ચ લાવી શકે છે. બાઇક હોય કે કોઈપણ અન્ય મોડલ આ ગરમીમાં એન્જિન ઓઈલ, કુલન્ટ, ચેઈન અને સ્માર્ટ રાઈડિંગ પર ખાસ ધ્યાન આપવું જરૂરી છે. તમારી સવારીને સુરક્ષિત અને સ્મૂધ રાખવા આ સમર મેન્ટેનન્સ ટિપ્સ જરૂર વાંચો.
ઉનાળાનો પારો 40 ડિગ્રીને વટાવી રહ્યો છે અને તેની સીધી અસર આપણા રોજિંદા જીવન પર પડી રહી છે. કાળઝાળ ગરમીમાં આપણે તો 'પસીને રેબઝેબ' થઈએ જ છીએ, પણ શું તમે જાણો છો કે તમારી બાઇક પણ આ સિઝનમાં હાંફી જાય છે? એન્જિન ઓવરહીટિંગની સમસ્યા માત્ર બાઇકનું પરફોર્મન્સ જ નથી ઘટાડતી, પણ તે તમારી માઇલેજ ઘટાડીને ખિસ્સા પર મોટા રિપેરિંગ ખર્ચનો બોજ પણ નાખી શકે છે. જો તમે તમારી સવારીને સુરક્ષિત અને સ્મૂધ રાખવા માંગતા હોવ, તો આ ગરમીમાં એન્જિનની ખાસ કાળજી લેવી અનિવાર્ય છે.
એન્જિન ઓઈલ: માત્ર લ્યુબ્રિકન્ટ નહીં, પણ કુલન્ટ : ઘણા લોકો માને છે કે એન્જિન ઓઈલ માત્ર ભાગોને ચીકણા રાખવા માટે છે, પણ વાસ્તવમાં તે એક 'હિડન કુલન્ટ' છે. ઉનાળામાં ઊંચા તાપમાનને કારણે ઓઈલ ઝડપથી પાતળું થઈ જાય છે, જેનાથી તેની ગરમી સોષવાની ક્ષમતા ઘટી જાય છે. હીરો સ્પ્લેન્ડર પ્લસ કે હોન્ડા શાઈન જેવી બાઇક માટે હંમેશા કંપનીએ સૂચવેલા ગ્રેડનું જ ઓઈલ વાપરવું જોઈએ. ઉનાળામાં ઓઈલના લેવલ પર ખાસ નજર રાખો. સામાન્ય રીતે દર 2500 થી 3000 કિલોમીટર પર ઓઈલ ચેક કરાવીને બદલી નાખવું હિતાવહ છે. એન્જિન ઓઈલ એન્જિનના આંતરિક ભાગો વચ્ચેનું ઘર્ષણ ઘટાડીને ગરમીને નિયંત્રિત કરવામાં સૌથી મહત્વની ભૂમિકા ભજવે છે.
સ્વચ્છતા અને એરફ્લોનું મહત્વ : શું તમારી બાઇકનું એન્જિન બહારથી ગંદુ છે? એર-કૂલ્ડ બાઇકમાં એન્જિન બ્લોક પર જે ઝીણી પટ્ટીઓ જેવી લાઇન દેખાય છે, તેને 'ફિન્સ' (fins) કહેવામાં આવે છે. આ ફિન્સનું કામ એન્જિનની ગરમીને હવામાં મુક્ત કરવાનું છે. જો તેના પર ધૂળ કે કાદવ જામી જાય, તો હવા યોગ્ય રીતે પસાર થઈ શકતી નથી અને એન્જિન ગરમ થવા લાગે છે. આ સાથે જ ગંદુ એર ફિલ્ટર અને જૂના સ્પાર્ક પ્લગ પણ એન્જિન પર વધારાનો લોડ વધારે છે, જે તાપમાન વધારવાનું કામ કરે છે.
રાઈડિંગ સ્ટાઈલમાં ફેરફાર (Smart Riding) : તમારી ડ્રાઈવિંગ કરવાની રીત એન્જિનના આયુષ્ય નક્કી કરે છે. ઉનાળામાં 'એગ્રેસિવ રાઈડિંગ' એટલે કે ઝનૂની રીતે બાઇક ચલાવવી, વારંવાર ઝડપી એક્સિલરેશન આપવું કે હાઈ RPM પર એન્જિન ખેંચવાનું ટાળો. જો ટ્રાફિક સિગ્નલ 30 સેકન્ડથી વધુ લાંબુ હોય, તો એન્જિન બંધ કરી દો. આનાથી એન્જિનને ઠંડુ થવાનો સમય મળશે અને કિંમતી બળતણ પણ બચશે.
રાઈડ શરૂ કરતા પહેલાની '1-2 મિનિટ' : ઘણા રાઈડર્સ બાઇક સ્ટાર્ટ કરતાની સાથે જ ફૂલ સ્પીડમાં ભગાવે છે, જે એન્જિન માટે ઘાતક છે. ભલે ઉનાળામાં ગરમીને કારણે ઓઈલ પાતળું હોય, તેમ છતાં તેને એન્જિનના ઉપરના ભાગ (Cylinder Head) સુધી પહોંચવા માટે થોડો સમય લાગે છે. તેથી રોજ સવારે અથવા લાંબા વિરામ પછી રાઈડ શરૂ કરતા પહેલા 1-2 મિનિટ માટે બાઇકને 'આઈડલ' (સ્થિર ચાલુ) રાખો. વધુમાં, જો તમે લાંબી મુસાફરી કરી રહ્યા હોવ, તો દર કલાકે 10-15 મિનિટનો નાનકડો બ્રેક લો. આ સમય દરમિયાન એન્જિનને ફરીથી કાર્યક્ષમ બનવા માટે જરૂરી ઠંડક મળી રહે છે.
કુલન્ટ અને ચેઈન મેન્ટેનન્સ : જો તમારી પાસે લિક્વિડ-કૂલ્ડ એન્જિન વાળી બાઇક છે, તો કુલન્ટનું લેવલ નિયમિત તપાસો. કુલન્ટ ઓછું હોવું એ એન્જિન સીઝ થવાનું મુખ્ય કારણ બની શકે છે. આ ઉપરાંત, બાઇકની ચેઈન પર પણ ધ્યાન આપો. જો ચેઈન સૂકી અથવા વધુ પડતી ટાઈટ હશે, તો એન્જિન પર બિનજરૂરી દબાણ આવશે. ઉનાળામાં દર 500-700 કિલોમીટરના અંતરે ચેઈન સાફ કરી તેને લ્યુબ્રિકેટ કરાવતા રહો.
પાર્કિંગ અને સીધો તડકો : તમારી બાઇકને ક્યાં પાર્ક કરો છો તે ખૂબ જ મહત્વનું છે. બાઇકને સીધા તડકામાં લાંબો સમય ઊભી રાખવાથી ફ્યુઅલ ટેન્ક અને એન્જિન બંને વધુ પડતા ગરમ થઈ જાય છે, જેનાથી ક્યારેક બાઇક સ્ટાર્ટ કરવામાં સમસ્યા (Starting Problems) સર્જાય છે. હંમેશા છાંયડામાં પાર્ક કરવાનો આગ્રહ રાખો અથવા સારી ગુણવત્તાના બાઇક કવરનો ઉપયોગ કરો.
ઉપર જણાવેલી ટિપ્સનું પાલન કરવું એ માત્ર મેન્ટેનન્સ નથી, પણ તમારી બાઇકની આવરદા વધારવાની રીત છે. યોગ્ય સમયે સર્વિસિંગ અને તમારી રાઈડિંગ આદતોમાં નાના ફેરફારો તમને મોટા ખર્ચમાંથી બચાવી શકે છે. તમારી બાઇક તમારી સફરની સાથી છે, અને તેની યોગ્ય સંભાળ લેવી એ એક જવાબદાર રાઈડરની ઓળખ છે. Input Credits: Getty Images
