Breaking News Asian Games 2026 : 44 વર્ષ બાદ ભારતીય મહિલા હોકી ટીમે જીત્યો ગોલ્ડ, 2028ના ઓલિમ્પિક્સની ટિકિટ કરાવી ફાઈનલ
India vs China Womens Hockey: ભારતીય મહિલા હોકી ટીમે, 44 વર્ષના ઈતિહાસમાં સર્વશ્રેષ્ઠ દેખાવ સાથે એશિયન ગેમ્સ 2026માં ચીનને હરાવીને સુવર્ણ ચંદ્રક જીતી લીધો છે. આ જીત સાથે, ભારતે 2028 ઓલિમ્પિક્સ માટે પણ ક્વોલિફાય કરી લીધું છે.
ભારતીય મહિલા હોકી ટીમે એશિયન ગેમ્સ 2026માં ઈતિહાસના પાનાઓમાં સુવર્ણ અક્ષરે પોતાનું નામ અંકિત કર્યું છે. રોમાંચક અને કાંટાની ટક્કરવાળી ફાઇનલમાં, ભારતે ચીનને 1-0થી હરાવીને સુવર્ણ ચંદ્રક હાંસલ કર્યો.
આ ઐતિહાસિક જીત સાથે, ભારતીય મહિલાઓએ એશિયન ગેમ્સમાં સુવર્ણ ચંદ્રક માટેના 44 વર્ષના લાંબા દુષ્કાળનો અંત આણ્યો છે. આ વિજય માત્ર એશિયન ચેમ્પિયન બનવા પૂરતો સીમિત નહોતો; ટીમે 2028 લોસ એન્જલસ ઓલિમ્પિક્સ માટે પણ અધિકૃત સ્થાન મેળવ્યું.
આ ઐતિહાસિક જીતની નાયિકા ફોરવર્ડ લાલરેમસિયામી હતી, જેના જાદુઈ ગોલે સમગ્ર દેશમાં ઉત્સાહ ફેલાવી દીધો હતો. તેણે મેચના પ્રથમ ક્વાર્ટરમાં જ ચીની ડિફેન્સની દીવાલ તોડી નાખી હતી. 10મી મિનિટે, તેની સાથી ખેલાડી સાક્ષીએ ઉત્તમ સૂઝબૂઝ બતાવતા લાલરેમસિયામી તરફ બોલ પાસ કર્યો.
લાલરેમસિયામીએ તરત જ દિશા બદલી અને ફરતી વખતે શાનદાર 'ટોમાહોક' શોટ ફટકાર્યો. તેનો સ્ટ્રાઈક એટલો શક્તિશાળી અને સચોટ હતો કે ચીની ગોલકીપર ડાઇવ મારવા છતાં લાચાર બની ગઈ અને બોલ નેટના ખૂણામાં જઈને અટક્યો. આ એકમાત્ર ગોલે ભારતને અજેય સરસાઈ અપાવી, જેને ભારતીય ડિફેન્સે મેચની અંતિમ મિનિટ સુધી સફળતાપૂર્વક જાળવી રાખી. 44 વર્ષની લાંબી રાહનો અંત આણ્યો હતો.
ભારતીય મહિલા હોકી માટે, આ જીત દાયકાઓ જૂની પીડા અને સંઘર્ષને ભૂંસી નાખનારી સાબિત થઈ છે. એશિયન ગેમ્સના ઈતિહાસમાં, ભારતીય મહિલા ટીમે અગાઉ માત્ર એક જ વાર - 1982ની નવી દિલ્હી એશિયાડમાં - સુવર્ણ ચંદ્રક જીત્યો હતો. ત્યાર બાદ ચાર દાયકાથી વધુ સમય વીતી ગયો હોવા છતાં ભારતીય ટીમ સુવર્ણ ચંદ્રક જીતવામાં સફળ રહી ન હતી.
ભારતીય ટીમ અગાઉ 1998માં દક્ષિણ કોરિયા અને 2018માં જાપાન સામે ફાઇનલમાં હાર્યા બાદ રજત પદકથી સંતોષ માનવા મજબૂર બની હતી. જોકે, નાગોયાના મેદાન પર ડિફેન્ડિંગ ચેમ્પિયન ચીનને હરાવીને ભારતીય ખેલાડીઓએ 44 વર્ષની આ પ્રતીક્ષાનો અંત આણ્યો છે.
Published On - 6:42 pm, Fri, 2 October 26
