અત્યાર સુધીનું ઊંચું સ્તર! ક્રિપ્ટોકરન્સી ‘બિટકોઈને’ ફરી એકવાર ઇતિહાસ રચ્યો, આ નવા ઉછાળાથી રોકાણકારો આકર્ષાયા
5 ઓક્ટોબરે બિટકોઈને એક નવો રેકોર્ડ બનાવ્યો, જે $1,25,689 (આશરે રૂ. 1.11 કરોડ) સુધી પહોંચ્યો. યુએસ શટડાઉન, ETF ઇનફલો અને ફેડરલ રિઝર્વ દ્વારા દર ઘટાડાની અપેક્ષાઓએ ક્રિપ્ટોકરન્સીને નવી ઊંચાઈએ પહોંચાડી છે.
વિશ્વની સૌથી લોકપ્રિય અને સૌથી મોટી ક્રિપ્ટોકરન્સી બિટકોઈને ફરી એકવાર ઇતિહાસ રચ્યો છે. શુક્રવાર, 5 ઓક્ટોબરે બિટકોઈન અગાઉના તમામ રેકોર્ડ તોડીને $1,25,689 (આશરે રૂ. 1,11,58,000) સુધી પહોંચી ગયું. આ તેનું અત્યાર સુધીનું ઊંચું સ્તર છે. અગાઉ બિટકોઈન ઓગસ્ટ 2025માં $1,24,500 (રૂ. 1,10,47,000) નો રેકોર્ડ બનાવ્યો હતો.
બિટકોઈનમાં આ નવા ઉછાળાએ ફરી એકવાર વૈશ્વિક રોકાણકારોનું ધ્યાન ખેંચ્યું છે. બ્લૂમબર્ગના અહેવાલ મુજબ, યુએસ સરકારના શટડાઉનથી રોકાણકારો પરંપરાગત બજારોને બદલે વૈકલ્પિક રોકાણ માર્ગો તરફ વળ્યા છે. રિપોર્ટમાં જણાવાયું છે કે, યુએસ સરકારના આંશિક બંધથી માત્ર વોલ સ્ટ્રીટ પર જ અસર પડી નથી પરંતુ રોકાણકારો તેમની કેપિટલનું રક્ષણ કરવા માટે ક્રિપ્ટો માર્કેટ તરફ પણ વળ્યા છે.
CoinMarketCap ડેટા અનુસાર, છેલ્લા 24 કલાકમાં બિટકોઇન 2.04 ટકા વધીને $1,25,700 (રૂ. 1,11,60,000) પર પહોંચી ગયું છે. જો કે, બપોરે 1:10 વાગ્યા સુધીમાં, તે થોડું ઘટીને $1,24,710 (રૂ. 1,10,76,000) પર પહોંચી ગયું હતું. આમ છતાં, તેનું માર્કેટ કેપ ₹2,20,00,000 કરોડથી વધુ પહોંચી ગયું છે. રસપ્રદ વાત એ છે કે, ભાવ વધારા છતાં રોકાણકારોએ બિટકોઇન વેચવાને બદલે તેને પકડી રાખવાનું પસંદ કર્યું છે.
છેલ્લા 24 કલાકમાં તેનું ટ્રેડિંગ વોલ્યુમ $57.94 બિલિયન (રૂ. 5.14 લાખ કરોડ) હતું, જે પાછલા દિવસ કરતા લગભગ 29 ટકા ઓછું છે. આ સૂચવે છે કે, બજારમાં ખરીદી ચાલી રહી છે પરંતુ રોકાણકારો લાંબાગાળા માટે તેને હોલ્ડ કરી રહ્યા છે. વધુમાં, ઓક્ટોબરમાં યુએસ ફેડરલ રિઝર્વ દ્વારા વ્યાજ દરમાં ઘટાડાની અપેક્ષાઓએ પણ બિટકોઇનના ભાવને ટેકો આપ્યો છે.
અન્ય ક્રિપ્ટોકરન્સી ઇથેરિયમ (ઇથર) માં પણ થોડો વધારો જોવા મળ્યો. તે 0.49 ટકા વધીને $4,584.19 અથવા આશરે રૂ. 4,07,000 થયો. XRP 0.61 ટકા વધીને $3.05 થયો, ટેથર $1 ની આસપાસ સ્થિર રહ્યો અને બિનાન્સ કોઇન (BNB) 0.43 ટકા વધીને $1,175.34 (₹1,04,300) થયો.
