શેરધારકો માટે ‘મોટા સમાચાર’… 8 વર્ષ પછી આ બેંક લાવી રહી છે ‘બોનસ ઈશ્યુ’, દર ‘3 શેર’ પર મળશે ‘1 શેર’ બિલકુલ ફ્રી
શેરબજારના રોકાણકારો માટે એક ખુશખબર સામે આવ્યા છે. બેંકિંગ સેક્ટરની એક શાનદાર બેંક તેના શેરધારકોને ફ્રી બોનસ શેરની ભેટ આપવા જઈ રહી છે. આ સાથે જ બેંક દ્વારા ડિવિડન્ડની પણ જાહેરાત કરવામાં આવી છે.
બેંકિંગ સેક્ટરના રોકાણકારો માટે એક મહત્ત્વના સમાચાર સામે આવ્યા છે. વાત એમ છે કે, બેંક શેરધારકોને ટૂંક સમયમાં બોનસ શેર મળવાના છે. ટૂંકમાં કહીએ તો, બેંક તેના શેરધારકોને દર '3 શેર' પર '1 નવો શેર' બોનસ તરીકે આપશે. જણાવી દઈએ કે, આ માટે રેકોર્ડ ડેટ 12 જૂન છે. આ તારીખ સુધી જે લોકોના નામ શેરના લાભાર્થી માલિકો તરીકે કંપનીના રજિસ્ટર ઓફ મેમ્બર્સ અથવા ડિપોઝિટરીઝના રેકોર્ડમાં હશે, તેઓ બોનસ શેર મેળવવા માટે હકદાર બનશે. બોનસ ઈશ્યુની જાહેરાત એપ્રિલ મહિનામાં થઈ હતી, જ્યારે કંપનીએ માર્ચ 2026 ક્વાર્ટરના પરિણામો જાહેર કર્યા હતા.
'બોનસ શેર', શેરધારકોની મંજૂરી મળ્યા બાદ જારી કરવામાં આવશે. મળતી માહિતી મુજબ, બેંક 8 વર્ષ પછી બોનસ ઈશ્યુ લાવી રહી છે. આ પહેલા આવું વર્ષ 2018 અને વર્ષ 2017માં કરવામાં આવ્યું હતું, ત્યારે શેરધારકોને તેમની પાસે રહેલા દર 10 શેર પર 1 નવો શેર બોનસ તરીકે મળ્યો હતો. વર્તમાનમાં શેરની ફેસ વેલ્યુ 1 રૂપિયો છે.
સિટી યુનિયન બેંકના શેરની કિંમત વર્તમાનમાં BSE પર 244.85 રૂપિયા છે. બેંકનું માર્કેટ કેપ 18,195 કરોડ રૂપિયાથી વધુ છે. આ શેર BSE 500 ઈન્ડેક્સનો હિસ્સો છે. ડેટા અનુસાર, કિંમત એક વર્ષમાં 23 ટકા વધી છે અને 3 વર્ષનું રિટર્ન 95 ટકા જેટલું છે. શેરનો 52 સપ્તાહનો એડજસ્ટેડ હાઈ (High) 319.95 રૂપિયા અને એડજસ્ટેડ લો (Low) 184 રૂપિયા છે.
બેંક નાણાકીય વર્ષ 2025-26 માટે પ્રતિ શેર 2 રૂપિયાનું ડિવિડન્ડ પણ આપવાની છે. આની ચુકવણી પણ વાર્ષિક સામાન્ય સભા (AGM)માં શેરધારકોની મંજૂરી મળ્યા બાદ કરવામાં આવશે. ડિવિડન્ડ માટેની રેકોર્ડ ડેટ હજુ સામે આવી નથી. બેંકે નાણાકીય વર્ષ 2025 માટે પણ આટલા જ રૂપિયાનું ડિવિડન્ડ આપ્યું હતું. એપ્રિલ મહિનામાં ICICI Securities એ શેર માટે 'બાય' (Buy) રેટિંગ સાથે પ્રતિ શેર 325 રૂપિયાનો ટાર્ગેટ પ્રાઇસ આપ્યો હતો. આવી જ રીતે એમકે ગ્લોબલ ફાઇનાન્સિયલે પણ 'બાય' રેટિંગ સાથે પ્રતિ શેર 350 રૂપિયાનો ટાર્ગેટ સેટ કર્યો હતો.
સિટી યુનિયન બેંકનો જાન્યુઆરી-માર્ચ 2026 ક્વાર્ટરમાં ચોખ્ખો નફો વાર્ષિક ધોરણે 25 ટકા વધીને 360 કરોડ રૂપિયા થઈ ગયો છે. એક વર્ષ પહેલા નફો 288 કરોડ રૂપિયા હતો. ચોખ્ખી વ્યાજની આવક (NII) 31 ટકાના વધારા સાથે 786 કરોડ રૂપિયા થઈ ગઈ છે, જે માર્ચ 2025 ક્વાર્ટરમાં 600 કરોડ રૂપિયા હતી. કુલ આવક 1,855.62 કરોડ રૂપિયા રહી. સમગ્ર નાણાકીય વર્ષ 2026 દરમિયાન ચોખ્ખો નફો 18 ટકા વધીને 1,326 કરોડ રૂપિયા થયો છે. NII 22 ટકાના વધારા સાથે 2,830 કરોડ રૂપિયા થઈ ગઈ છે.
