Data Science Course: 14 અઠવાડિયામાં AI- ડેટા સાયન્સ ઓનલાઈન શીખવી રહી છે દુનિયાની નંબર 1 યુનિવર્સિટી, જાણો Fee કેટલી?
MIT દ્વારા 14 અઠવાડિયાનો AI અને ડેટા સાયન્સનો ઓનલાઈન કોર્સ શરૂ થયો છે. QS રેન્કિંગમાં નંબર 1 MITનો આ પ્રોગ્રામ ઘર બેઠા વિશ્વસ્તરીય શિક્ષણ આપે છે.
Study AI Degree in US: અમેરિકામાં મેસેચ્યુસેટ્સ ઇન્સ્ટિટ્યૂટ ઑફ ટેકનોલોજી (MIT) દુનિયાની ટોચની યુનિવર્સિટીઓમાં ગણાય છે. હવે MIT દ્વારા AI અને ડેટા સાયન્સ ક્ષેત્રે 14 અઠવાડિયાનો ઓનલાઈન કોર્સ શરૂ કરવામાં આવ્યો છે, જેમાં વિદ્યાર્થીઓ ઘર બેઠા વિશ્વસ્તરીય શિક્ષણ મેળવી શકે છે. ખાસ વાત એ છે કે આ કોર્સ માટે અમેરિકા જવાની જરૂર નથી, કારણ કે સમગ્ર અભ્યાસક્રમ લાઈવ ઓનલાઈન મોડમાં ઉપલબ્ધ છે.
આજના સમયમાં આર્ટિફિશિયલ ઇન્ટેલિજન્સ (AI) અને ડેટા સાયન્સ સૌથી વધુ માંગ ધરાવતા ક્ષેત્રો બની ગયા છે. ટેકનોલોજીના વધતા ઉપયોગ સાથે વિશ્વભરમાં AI નિષ્ણાતોની જરૂરિયાત વધી રહી છે. પરિણામે, ઘણા વિદ્યાર્થીઓ અને વર્કિંગ પ્રોફેશનલ્સ હવે AI અને ડેટા સાયન્સમાં કારકિર્દી બનાવવા ઈચ્છે છે. જોકે, વિદેશમાં અભ્યાસનો ખર્ચ દરેક માટે શક્ય નથી. આવી સ્થિતિમાં MITનો આ ઓનલાઈન કોર્સ મોટી તક બની શકે છે.
QS Subject Ranking મુજબ AI અને ડેટા સાયન્સ કેટેગરીમાં MITને વિશ્વમાં પ્રથમ સ્થાન મળ્યું છે. યુનિવર્સિટી દ્વારા ઓફર કરવામાં આવતો “Applied AI and Data Science Program” સંપૂર્ણપણે ઓનલાઈન છે. આ કોર્સ MITના જાણીતા પ્રોફેસરો દ્વારા તૈયાર કરવામાં આવ્યો છે અને તેઓ જ વિદ્યાર્થીઓને માર્ગદર્શન આપશે.
14 અઠવાડિયાના આ કોર્સમાં સિદ્ધાંત અને પ્રેક્ટિકલ બંને પર ખાસ ભાર મૂકવામાં આવ્યો છે. શરૂઆતના 2 અઠવાડિયામાં વિદ્યાર્થીઓને AI અને ડેટા સાયન્સની મૂળભૂત સમજ આપવામાં આવશે. ત્યારબાદના 8 અઠવાડિયામાં પ્રોમ્પ્ટ એન્જિનિયરિંગ, એજન્ટિક AI, નૈતિક AI, મશીન લર્નિંગ, સુપરવાઈઝ્ડ અને અનસુપરવાઈઝ્ડ લર્નિંગ, તેમજ ન્યુરલ નેટવર્ક જેવા અદ્યતન વિષયો ભણાવવામાં આવશે.
કોર્સ દરમિયાન વિદ્યાર્થીઓને પ્રોજેક્ટ સબમિશન પણ કરાવાશે, જેથી તેઓએ શીખેલી બાબતોનો પ્રાયોગિક ઉપયોગ કરી શકે. અંતિમ 3 અઠવાડિયામાં કેપસ્ટોન પ્રોજેક્ટ રહેશે, જેમાં વિદ્યાર્થીઓ પોતાની કુશળતા અને જ્ઞાનને વધુ મજબૂત બનાવી શકશે.આ કોર્સ 16 મેથી શરૂ થઈ 20 સપ્ટેમ્બર સુધી ચાલશે. નોંધણી માટેની છેલ્લી તારીખ 16 મે, 2026 છે. કોર્સ ફી 3900 અમેરિકન ડોલર રાખવામાં આવી છે, જે ભારતીય ચલણ મુજબ અંદાજે રૂ. 3.73 લાખ થાય છે.
MITનો આ પ્રોગ્રામ ખાસ કરીને એવા વિદ્યાર્થીઓ અને પ્રોફેશનલ્સ માટે તૈયાર કરવામાં આવ્યો છે, જેઓ ડેટા સાયન્સ, AI અને મશીન લર્નિંગ ક્ષેત્રમાં કારકિર્દી બનાવવા માંગે છે. સાથે જ, પોતાની કંપનીમાં AI આધારિત પ્રોજેક્ટ્સનું નેતૃત્વ કરવા ઈચ્છતા લોકો માટે પણ આ કોર્સ ખૂબ ઉપયોગી સાબિત થઈ શકે છે.કોર્સ પૂર્ણ થયા બાદ વિદ્યાર્થીઓને MIT તરફથી સર્ટિફિકેટ પણ આપવામાં આવશે. જોકે, આ પ્રોગ્રામમાં જોડાવા માટે કમ્પ્યુટર પ્રોગ્રામિંગ અને આંકડાશાસ્ત્રનું મૂળભૂત જ્ઞાન હોવું જરૂરી છે.
Published On - 4:24 pm, Sat, 16 May 26
