ગરમીમાં પાણીની તંગીથી બચાવશે તમારું AC, જાણો ‘કન્ડેન્સ્ડ વોટર’ ના ફાયદા
કાળઝાળ ગરમીમાં એસી કલાકો સુધી ચાલતું હોય છે, જેમાંથી સતત પાણી ટપક્યા કરે છે. મોટાભાગના લોકો તેને વેડફી દે છે, પરંતુ આ પાણી 'ડિસ્ટિલ્ડ વોટર' જેવું શુદ્ધ હોય છે. જાણો કેવી રીતે આ પાણીનો ઉપયોગ કરી તમે તમારા બગીચા, કાર અને ઘરની સફાઈમાં મદદ મેળવી શકો છો.
ચિલચિલાટ ગરમી અને બફારાથી બચવા માટે હવે લગભગ દરેક મધ્યમવર્ગીય ઘરમાં એર કંડિશનર (AC) કલાકો સુધી ચાલે છે. જ્યારે એસી ચાલે છે, ત્યારે તમે નોંધ્યું હશે કે પાછળ લાગેલી પાઈપમાંથી સતત પાણી ટપક્યા કરે છે. મોટાભાગના લોકો આ પાણીને નકામું સમજીને નાલીમાં વહેવા દે છે અથવા તો ડોલ ભરીને તેને ફેંકી દે છે. પરંતુ શું તમે ક્યારેય વિચાર્યું છે કે એક રાતમાં તમારું એસી કેટલું પાણી કાઢે છે? નિષ્ણાતોના મતે, ભેજવાળા વાતાવરણમાં એક સરેરાશ એસી એક રાતમાં કેટલાય લિટર પાણી કાઢી શકે છે. આ પાણીને ફેંકી દેવું એ સીધી રીતે કુદરતી સંસાધનોનો બગાડ છે. જો તમે પણ આ પાણીને વેડફવા ન માંગતા હોવ, તો નીચે મુજબના કામોમાં તેનો ઉપયોગ કરી શકો છો.
આખરે આ પાણી આવે છે ક્યાંથી?: એસી જ્યારે રૂમની ગરમ હવાને શોષે છે, ત્યારે તે હવામાં રહેલો ભેજ (Humidity) ઠંડો થઈને પાણીના ટીપાંમાં ફેરવાઈ જાય છે. તેને 'કન્ડેન્સ્ડ વોટર' (Condensed Water) કહેવામાં આવે છે. આ પાણી મોટાભાગે 'ડિસ્ટિલ્ડ વોટર' જેવું હોય છે, એટલે કે તેમાં સામાન્ય નળના પાણીની જેમ મિનરલ્સ કે ફ્લોરાઈડ હોતા નથી.
છોડ અને બગીચામાં: એસીના પાણીનો સૌથી ઉત્તમ ઉપયોગ ગાર્ડનિંગમાં થઈ શકે છે. આ પાણીમાં ક્લોરિન હોતું નથી, તેથી તે છોડ માટે ખૂબ જ સારું માનવામાં આવે છે. જો તમે ઘરમાં મની પ્લાન્ટ કે તેવા અન્ય છોડ વાવ્યા હોય, તો તેમના માટે આ પાણી શ્રેષ્ઠ છે. જોકે, આમાં મિનરલ્સની ઉણપ હોય છે, તેથી જો તમે તેને માટીવાળા કુંડામાં નાખી રહ્યા હોવ, તો મહિનામાં એકવાર ખાતરનો ઉપયોગ ચોક્કસ કરો.
ઘરની સફાઈ: રોજિંદા ઘરની સફાઈ માટે આપણે અનેક ડોલ પાણી વેડફી નાખીએ છીએ. એસીમાંથી નીકળતા પાણીને એક ડોલમાં એકઠું કરો અને તેમાં ફિનાઈલ કે ક્લીનર ઉમેરીને પોતું કરવા માટે ઉપયોગમાં લો.
ટોયલેટ ફ્લશ: એકવાર ફ્લશ ચલાવવાથી લગભગ 5 થી 10 લિટર પાણી ખર્ચાય છે. જો તમે એસીના પાણીને સ્ટોર કરીને બાથરૂમમાં રાખો છો, તો તેનો ઉપયોગ ફ્લશની જગ્યાએ અથવા ફ્લોર ધોવા માટે કરી શકાય છે. આ પાણીની મોટી બચત કરવાની સૌથી સરળ અને અસરકારક રીત છે.
કારના વાઈપર: કારના વાઈપર ટેન્કમાં સામાન્ય નળનું પાણી નાખવાથી પાઈપમાં કચરો જામી શકે છે અથવા નોઝલ બ્લોક થઈ શકે છે. એસીનું પાણી ડિસ્ટિલ્ડ વોટર જેવું હોવાથી તેને તમે તમારી કારના વાઈપર ફ્લુઈડમાં નાખી શકો છો. તેની સાથે થોડું લિક્વિડ સોપ ભેળવવાથી કારનો કાચ એકદમ સાફ થઈ જશે.
