લો બોલો, સોશિયલ ડિસ્ટન્સના ભંગ બદલ 20 લોકોને જેલની એક જ કોઠરી કરી દીધા બંધ

આ સમયે કોરોનાના કહેરથી સમગ્ર વિશ્વ હેરાન પરેશાન છે. ત્યારે પાકિસ્તાનના લોકો તેના તંત્રની મુર્ખામીથી પણ પરેશાન છે. કોરોના સંક્રમણને રોકવા માટે ઘણા દેશોમાં નિયંત્રણો મૂકવામાં આવ્યા છે. જો કે ઘણી વખત એવું બને છે કે વહીવટી તંત્ર પોતે આ પ્રતિબંધોને અનુસરતી વખતે હાસ્યાસ્પદ ભૂલો કરે છે. અને આવા ઉદાહરણ તો પાકિસ્તાનમાં અવાર નવાર મળી આવતા હોય છે. તમને યાદ ના હોય તો જણાવી દઈએ તાજેતરમાં જ પાકિસ્તાનમાં એક ચોર બાજુની છત પર સંતાયો હતો અને એને પકડવા અનેક પોલીસ અધિકારીઓ ત્યાં જ ફાંફા મારી રહ્યા હતા. એ વિડીયો પણ વાયરલ થયો હતો.

આ વખતે પાકિસ્તાને બુદ્ધિના પ્રદર્શનમાં ચાર ચાંદ લગાવી દીધા છે. જી હા આ વખતે કોરોના સામે લડી રહેલા વિશ્વને પાકે ડર સાથે હસવા પણ મજબુર કરી દીધું છે.

સામાજિક અંતરના ઉલ્લંઘન બદલ જેલના એક જ કોષમાં બંધ

વાત જાણે એમ છે કે પાકિસ્તાનના એક શહેર ફાલિયામાં, લગભગ 20 લોકોને કોરોના વાયરસ અંગે એસઓપી એટલે કે સામાજિક અંતરનું ઉલ્લંઘન કરવા બદલ જેલમાં ધકેલી દેવામાં આવ્યા હતા. તમને જાણીને એમ થશે કે આમાં શું મોટી વાત, આ તો સારી વાત છે. ના, પરંતુ વાત હવે શરુ થાય છે. રસપ્રદ વાત એ છે કે આ લોકોને જેલમાં તો ધકેલી દીધા. પરંતુ દરેકને જેલની એક જ કોઠરીમાં બંધ કરી દેવામાં આવ્યા. આ લોકો પણ મનમાં વિચારતા હશે, કે શું બહાર સામાજિક અંતર વગર ભેગા થવું ગુનો છે, કે તંત્રની હાજરી વગર ભેગા થવું ગુનો છે. કેમ કે અહિયાં તો તંત્રએ ખુદ બધાને એકસામટા ભરી દીધા છે. આ ફોટો પાકિસ્તાની પત્રકાર નાયલા ઇનાયતે ટ્વીટ કર્યો હતો.

લોકો સોશિયલ મીડિયા પર ઉડાવવા લાગ્યા મજાક

જોતજોતામાં આ ફોટો ખુબ વાયરલ થઇ ગયો. થવાનો જ હતો, ઘટના જો એવી હતી. એક વપરાશકર્તાએ કોમેન્ટ કરી હતી કે કોરોનાની હજી ધરપકડ કરવામાં આવી નથી, તેથી તેનો જેલ સેલમાં હોવાનો કોઈ સવાલ નથી. તે જ સમયે, અન્ય એક વ્યક્તિએ લખ્યું કે કોરોના પાકિસ્તાન પોલીસ સુરક્ષા અને જેલ રેલિંગને ક્યારેય પાર કરી શકશે નહીં.

પાકિસ્તાન અનેકવાર આવી મુર્ખામી નોંધાવતું હોય છે. અને વિશ્વને મફતનું મનોરંજન પૂરું પાડતું રહેતું હોય છે.

આ પણ વાંચો : West Bengal Election 2021: મમતાએ માની BJP નેતાને ફોન કરવાની વાત, ફોન અંગે શું કહ્યું જાણો