Quad Summit : ક્વાડમાં યુક્રેન-રશિયા યુદ્ધ પર થશે ચર્ચા, ઝૂક્યા વિના ભારત, રશિયા સાથે ઉભું રહેશે

વડાપ્રધાન નરેન્દ્ર મોદીની (Prime Minister Narendra Modi) વિદેશ મુલાકાતો દરમિયાન ઓછા સમયમાં વધુને વધુ બેઠક યોજવાની પ્રથા જાપાનમાં પણ ચાલુ રહેશે. વડાપ્રધાન નરેન્દ્ર મોદી કુલ 40 કલાક માટે જાપાનમાં રહેશે જે દરમિયાન તેમની 23 બેઠકો નિર્ધારિત થઈ છે.PM મોદી 24 મેના રોજ ક્વાડ મીટિંગમાં (Quad Summit) ભાગ લેવા માટે જાપાન જઈ રહ્યા છે, જ્યાં તેઓ અમેરિકાના રાષ્ટ્રપતિ જો બાઈડન (Joe Biden), જાપાનના વડાપ્રધાન ફ્યુમિયો કિસિડા (Fumio Kishida) અને ઓસ્ટ્રેલિયાના વડાપ્રધાન સાથે અલગ-અલગ બેઠક પણ કરશે. સત્તાવાર સૂત્રોના જણાવ્યા અનુસાર, સમયનો મહત્તમ ઉપયોગ સુનિશ્ચિત કરવા માટે, વડા પ્રધાનની મુલાકાતોને એવી રીતે આકાર આપવામાં આવ્યો છે કે તેઓ ટોક્યોમાં માત્ર એક રાત વિતાવશે, જ્યારે પ્રસ્થાન અને આગમન દરમિયાનની બે રાત વિમાનમાં વિતાવશે.

24મી મેના રોજ જાપાનમાં યોજાનારી ક્વાડ બેઠકમાં રશિયા-યુક્રેન યુદ્ધ અંગે પણ ચર્ચા કરવામાં આવશે. ક્વાડના બાકીના ત્રણ સભ્યો અમેરિકા, જાપાન અને ઓસ્ટ્રેલિયા રશિયા સામે કડક વલણ અપનાવી રહ્યા છે, તેથી એવું કહેવામાં આવી રહ્યું છે કે ભારત ફરી એકવાર દબાણનો સામનો કરી શકે છે. પરંતુ ભારતે સ્પષ્ટ સંકેતો આપ્યા છે કે તે તેના જૂના વલણને ચાલુ રાખશે અને યુએસ અથવા ક્વાડ જૂથના કોઈપણ દબાણમાં આવશે નહીં.

અમેરિકા, જાપાન અને ઓસ્ટ્રેલિયાના વડા સાથે કરાશે દ્વિપક્ષીય વાતચીત

છેલ્લા આઠ વર્ષમાં વડાપ્રધાન મોદીએ (Prime Minister Modi) તેમની દરેક મુલાકાત એવી રીતે તૈયાર કરી છે કે આવવા-જવામાં જે સમય લાગે છે તે પ્લેનમાં જ પસાર થઈ જાય છે. વડા પ્રધાનની વ્યસ્તતાઓમાં યુએસ પ્રમુખ જો બાઈડન, જાપાનના વડા પ્રધાન ફ્યુમિયો કિસિડા અને ઑસ્ટ્રેલિયાના વડા પ્રધાન સાથે ક્વાડની બેઠક તેમજ તેમની સાથે વ્યક્તિગત દ્વિપક્ષીય વાર્તાલાપ કરવાના કાર્યક્રમનો પણ સમાવેશ થાય છે.

આ સિવાય વડાપ્રધાન મોદી ત્રણ ડઝન જાપાનીઝ કંપનીઓના સીઈઓ સાથે પણ બેઠક કરશે. આ સાથે જાપાનમાં રહેતા બિનનિવાસી ભારતીયો સાથે તેમના સંવાદનો કાર્યક્રમ પણ રાખવામાં આવ્યો છે.

ચાર દેશોના ટોચના નેતાઓ વૈશ્વિક મુદ્દાઓ પર વિશેષ ચર્ચા કરશે

ક્વાડ સમિટની વધુ વિગતો આપતા, વિદેશ મંત્રાલયે જણાવ્યું હતું કે આ બેઠક ટોચના નેતાઓને ઈન્ડો-પેસિફિક ક્ષેત્રના વિકાસ અને પરસ્પર હિતના સમકાલીન વૈશ્વિક મુદ્દાઓ પર વિચારોનું આદાનપ્રદાન કરવાની તક પૂરી પાડશે. આ સાથે જ ચારેય દેશોના ટોચના નેતાઓ ક્વોડ ઇનિશિયેટિવ અને વર્કિંગ ગ્રૂપની પ્રગતિની સમીક્ષા કરશે.