Breaking News : ચક્રવાતનો ખતરો ફરી મંડરાયો! 16 નવેમ્બરે વાવાઝોડું ત્રાટકવાની શક્યતા, અનેક રાજ્યોમાં ભારે વરસાદનું એલર્ટ

દેશમાં ફરી એકવાર ચક્રવાતનો ખતરો મંડરાઈ રહ્યો છે. બંગાળની ખાડીમાં સર્જાયેલા લો પ્રેશર એરિયા (નીચા દબાણના વિસ્તાર)ને કારણે હવામાનમાં મોટો ફેરફાર થવાની શક્યતા છે. હવામાન વિભાગના અનુમાન મુજબ, આ સિસ્ટમ આગામી દિવસોમાં વધુ મજબૂત બની શકે છે અને 16 નવેમ્બરની સાંજ સુધીમાં ચક્રવાતી તોફાનનું સ્વરૂપ ધારણ કરી શકે છે. આ સંભવિત ચક્રવાતને ધ્યાનમાં રાખીને હવામાન વિભાગે 13થી 19 નવેમ્બર દરમિયાન દેશનાં અનેક રાજ્યોમાં ભારે વરસાદ અને પવનને લઈને ચેતવણી જાહેર કરી છે.

હવામાન વિભાગના જણાવ્યા અનુસાર, દક્ષિણપૂર્વ બંગાળની ખાડીમાં લો પ્રેશર એરિયા સર્જાયો છે. આ સિસ્ટમ 14 નવેમ્બર સુધીમાં ડિપ્રેશનમાં ફેરવાઈ શકે છે, જ્યારે 15 નવેમ્બરે તે વધુ મજબૂત બની ડીપ ડિપ્રેશન અથવા પૂર્વ-ચક્રવાતી તબક્કામાં પહોંચી શકે છે. ત્યારબાદ તે ઉત્તરપશ્ચિમ દિશામાં આગળ વધીને 16 નવેમ્બરની સાંજ સુધીમાં મધ્ય બંગાળની ખાડીમાં ચક્રવાતી તોફાનનું સ્વરૂપ ધારણ કરે તેવી શક્યતા છે. આ સિસ્ટમને કારણે દક્ષિણ અને પૂર્વ ભારતનાં અનેક વિસ્તારોમાં વરસાદી માહોલ સર્જાઈ શકે છે.

19 નવેમ્બર સુધી વરસાદની શક્યતા

દક્ષિણ ભારતનાં રાજ્યોમાં ભારે વરસાદની આગાહી કરવામાં આવી છે. તમિલનાડુ, પુડુચેરી અને કરાઈકલમાં 13થી 15 નવેમ્બર તેમજ 16થી 19 નવેમ્બર દરમિયાન વિવિધ વિસ્તારોમાં ભારે વરસાદ પડી શકે છે. કેરળમાં 13થી 15 નવેમ્બર, જ્યારે લક્ષદ્વીપમાં 13થી 19 નવેમ્બર દરમિયાન વરસાદની શક્યતા છે. આ ઉપરાંત, દરિયાકાંઠાના આંધ્રપ્રદેશ, યાનમ અને રાયલસીમામાં 14થી 19 નવેમ્બર દરમિયાન વરસાદી માહોલ રહેવાની સંભાવના છે. ખાસ કરીને દરિયાકાંઠાના આંધ્રપ્રદેશ અને યાનમમાં 18 અને 19 નવેમ્બરે ભારે વરસાદ પડી શકે છે.

પૂર્વ ભારતનાં રાજ્યો માટે પણ હવામાન વિભાગે ચેતવણી જાહેર કરી છે. આંદામાન અને નિકોબાર ટાપુઓમાં 13થી 19 નવેમ્બર દરમિયાન વરસાદની શક્યતા છે. આ ઉપરાંત, 13થી 17 નવેમ્બર દરમિયાન અહીં ગાજવીજ સાથે ભારે પવન ફૂંકાઈ શકે છે. 18 અને 19 નવેમ્બરે પણ આ ટાપુઓમાં પવનની ગતિ વધવાની શક્યતા છે. બીજી તરફ, પશ્ચિમ બંગાળમાં 19 નવેમ્બરે ભારે પવન ફૂંકાઈ શકે છે, જ્યારે ઓડિશામાં 18 અને 19 નવેમ્બરે ભારે વરસાદની આગાહી કરવામાં આવી છે. પશ્ચિમ બંગાળ અને ઓડિશાના કેટલાક વિસ્તારોમાં પણ 18 અને 19 નવેમ્બરે વરસાદ પડી શકે છે.

14 અને 15 નવેમ્બરે વરસાદ પડી શકે

ઉત્તરપશ્ચિમ ભારતના રાજ્યોમાં પણ હવામાનમાં પલટો આવવાની શક્યતા છે. જમ્મુ-કાશ્મીર અને લદ્દાખમાં 13થી 15 નવેમ્બર દરમિયાન વરસાદની આગાહી છે. હિમાચલ પ્રદેશ અને ઉત્તરાખંડમાં 13થી 15 નવેમ્બર દરમિયાન વરસાદી માહોલ રહી શકે છે. આ ઉપરાંત, હરિયાણા, ચંદીગઢ, દિલ્હી અને પંજાબમાં 14 અને 15 નવેમ્બરે વરસાદ પડી શકે છે. પશ્ચિમ રાજસ્થાન અને પશ્ચિમ ઉત્તર પ્રદેશમાં 15 નવેમ્બરે વરસાદની શક્યતા વ્યક્ત કરવામાં આવી છે.

હવામાનમાં થનારા આ ફેરફારને ધ્યાનમાં રાખીને સંબંધિત રાજ્યોના લોકોને સાવચેતી રાખવાની સલાહ આપવામાં આવી છે. ખાસ કરીને દરિયાકાંઠાના વિસ્તારોમાં રહેતા લોકોએ હવામાન વિભાગની સત્તાવાર સૂચનાઓ અને સ્થાનિક વહીવટીતંત્રની માર્ગદર્શિકાનું પાલન કરવું જરૂરી છે.

એક જ શહેર, એક જ હવા, છતાં AQI અલગ-અલગ કેમ?