કેન્દ્ર સરકાર નક્સલવાદીઓ સામે અવિરત કાર્યવાહી કરી રહી છે. કેન્દ્રીય ગૃહપ્રધાન અમિત શાહે, દેશમાંથી નકસલવાદનો ખાત્મો બોલાવવા માટે 31 માર્ચ 2026ની ડેડલાઈન નક્કી કરી છે. આ તારીખ સુધીમાં અનેક નકસલી કમાન્ડરોએ તેમના હથિયાર સશસ્ત્રદળો- સરકાર-પોલીસ સામે હેઠા મુક્યા છે. આ અભિયાનના ભાગરૂપે, બસ્તરમાં છેલ્લા માઓવાદી કમાન્ડર પણ હથિયાર હેઠા મુકીને શરણે આવશે. અહેવાલો સૂચવે છે કે છત્તીસગઢના બસ્તર પ્રદેશના કુખ્યાત અને છેલ્લા બાકી રહેલા વરિષ્ઠ માઓવાદી કમાન્ડર પાપારાવ આજે, મંગળવારને 24મી માર્ચના રોજ, અધિકારીઓના ભારે દબાણ વચ્ચે આત્મસમર્પણ કરી શકે છે. શરણાગતીની પ્રક્રિયાને સરળ બનાવવા માટે એક સ્થાનિક પત્રકારનો પણ સંપર્ક કર્યો હતો.

છેલ્લા અઠવાડિયામાં, સુરક્ષા એજન્સીઓએ દક્ષિણ બસ્તરમાં નક્સલવાદીઓ સામે તેમની કાર્યવાહી વધુ તીવ્ર બનાવી છે. નક્સલવાદીઓની ગતિવિધિઓ પર સતત નજર રાખવામાં આવી છે. પરિણામે, પાપારાવની આવનજાવન પ્રતિબંધિત કરવામાં આવી છે. સરકારની સતત કાર્યવાહીને કારણે, પાપારાવને સમર્થન આપતું નેટવર્ક પણ હવે ઘણું નબળું પડી ગયું છે.

મધ્યસ્થી માટે પત્રકાર

મીડિયા રિપોર્ટ અનુસાર એવ દાવો કરવામાં આવ્યો છે કે એક પત્રકાર આ મામલામાં મધ્યસ્થી કરી રહ્યા છે. નક્સલવાદી કમાન્ડર તેના કેડરના એક ડઝન સભ્યો સાથે આત્મસમર્પણ કરે તેવી અપેક્ષા છે તેમ આ પત્રકારે જણાવ્યું હતું. છત્તીસગઢના બસ્તર પ્રદેશમાં પાપારાવને, લોકો સુનમ ચંદ્રૈયા, મંગુ દાદા અને ચંદ્રાન્ના તરીકે પણ ઓળખે છે. પાપારાવના માથા પર સરકારે રૂપિયા 25 લાખનું ઇનામ જાહેર કરેલ છે. સ્ટેટ ઝોનલ કમિટી મેમ્બર (SZCM) તરીકે સેવા આપે છે અને પશ્ચિમ બસ્તર ડિવિઝનનું પણ નેતૃત્વ કરે છે. પાપારાવ છત્તીસગઢ-મહારાષ્ટ્ર સરહદ પર સક્રિય રહ્યો છે. પોલીસ અને ગુપ્તચર સૂત્રોના જણાવ્યા અનુસાર, માઓવાદી નેતા પાપારાવની ઉંમર 52 થી 55 વર્ષની વચ્ચે હોવાનો અંદાજ છે. એ તાજેતરમાં એક સ્થાનિક પત્રકારનો સંપર્ક કરીને અધિકારીઓ સાથે શરણે આવવા માટેની વાટાઘાટો શરૂ કરવામાં મદદ માંગી હતી.

એવા અહેવાલ છે કે પાપારાવ, છત્તીસગઢ-મહારાષ્ટ્ર સરહદ પર સ્થિત ઇન્દ્રાવતી રાષ્ટ્રીય ઉદ્યાનની નજીક સક્રિય રહે છે. જે ગાઢ જંગલો દ્વારા વર્ગીકૃત થયેલ એક મહત્વપૂર્ણ માઓવાદી ગઢ છે. જ્યારે તેમણે એક સમયે 30 થી 35 સશસ્ત્ર કેડર્સની એકમનું નેતૃત્વ કર્યું હતું, અહેવાલો સૂચવે છે કે, મોટી સંખ્યામાં માઓવાદીઓના ખાત્માને કારણે, તે હવે ફક્ત પાંચ કેડરોના બનેલા નોંધપાત્ર રીતે નાના જૂથ સાથે કાર્ય કરે છે.

નજીકના સાથીદારોનુ એન્કાઉન્ટર

કેટલાક સૂત્રોએ એવી વિગતો આપી છે કે, તાજેતરના એન્કાઉન્ટરોની શ્રેણીએ પાપારાવને ભારે નુકસાન પહોંચાડ્યું છે. તેમને વધુને વધુ એકલા પાડી દેવામાં આવ્યા છે. થોડા દિવસો પહેલા, બીજાપુર જિલ્લામાં એક મોટા ઓપરેશન દરમિયાન છ માઓવાદીઓ માર્યા ગયા હતા. મૃતકોમાં પાપારાવના સૌથી નજીકના સહયોગીઓમાંના એક માનવામાં આવતા વરિષ્ઠ કેડર દિલીપ બેડજાનો પણ સમાવેશ થાય છે. જે લોજિસ્ટિક્સ અને સંકલનનું સંચાલન કરવા માટેની કામગીરી કરવામાં માહેર હતા.

અન્ય એક અધિકારીએ જણાવ્યું કે, “નક્સલવાદીઓને લક્ષ્ય બનાવતા સતત ઓપરેશન, ધરપકડ અને શરણાગતિને કારણે, પાપારાવની કેડર્સ સતત વિખેરાઈ ગઈ છે, અને તેમનું સ્થાનિક સમર્થન નેટવર્ક નબળું પડ્યું છે. આ પરિબળોએ તેમના શરણાગતિ માટેની શક્યતા માટે માર્ગ મોકળો કર્યો છે.”

આ સંદર્ભમાં, પોલીસ મહાનિરીક્ષક (બસ્તર રેન્જ) સુંદરરાજ પી. એ અગાઉ જણાવ્યું હતું કે, બસ્તરમાં માઓવાદીઓની હાજરી થોડા છૂટાછવાયા જૂથોમાં ઘટી ગઈ છે, અને બચી ગયેલા નેતાઓ સતત દબાણ હેઠળ છે. અધિકારીઓએ વધુમાં નોંધ્યું હતું કે, પ્રદેશમાં માઓવાદી નેતૃત્વને ખતમ કરવાના અંતિમ પ્રયાસના ભાગ રૂપે, સુરક્ષા દળોએ ઇન્દ્રાવતી-અબુઝમાડ પટ્ટામાં તેમના શોધ અભિયાનો અને વિસ્તાર-પ્રભુત્વ પેટ્રોલિંગને તીવ્ર બનાવ્યું છે. જો તેએ શરણે નહીં આવે તો એન્કાઉન્ટરમાં માર્યા જશે.

બધાને એક કરીને યુદ્ધ રોકાવવાની ભારત પાસે તાકાત છે : મોહન ભાગવત