Breaking News: ઓનલાઇન દહીં મંગાવવું પડ્યું ભારે! ગ્રાહક પહોંચ્યો હોસ્પિટલ, FSSAI એ Blinkit પાસે માંગ્યો જવાબ
ઓનલાઇન ફૂડ ઓર્ડર કરનારાઓ માટે એક ચોંકાવનારા સમાચાર સામે આવ્યા છે. ક્વિક કોમર્સ એપ બ્લિંકિટ (Blinkit) પરથી મંગાવેલું દહીં ખાધા પછી એક ગ્રાહકની તબિયત ગંભીર રીતે બગડી ગઈ હતી, જેને પગલે તેને હોસ્પિટલ ભેગા થવું પડ્યું હતું.
ફૂડ સેફ્ટી રેગ્યુલેટર FSSAI એ ક્વિક કોમર્સ કંપની બ્લિંકિટ (Blinkit) પાસે જવાબ માંગ્યો છે. આ પગલું એક ફરિયાદ મળ્યા બાદ ઉઠાવવામાં આવ્યું છે. એક ગ્રાહકે આરોપ લગાવ્યો છે કે, પ્લેટફોર્મ પરથી મંગાવેલું દહીં ખાધા પછી તેની તબિયત બગડી ગઈ હતી.
ફરિયાદ અનુસાર, ગ્રાહકને અસહ્ય પેટનો દુખાવો અને ઝાડાની સમસ્યા થઈ હતી, જેના કારણે તેને સારવાર લેવી પડી હતી. આ મામલામાં ફરિયાદ સાથે મેડિકલ પ્રિસ્ક્રિપ્શન (દવાની કાપલી) પણ સબમિટ કરવામાં આવી છે. હવે ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયાએ કંપની પાસે જવાબ અને એક્શન ટેકન રિપોર્ટ (કરેલી કાર્યવાહીનો અહેવાલ) માંગ્યો છે.
દહીં ખાધા પછી ગ્રાહકની તબિયત બગડી
આ મામલો ત્યારે સામે આવ્યો જ્યારે એક વ્યક્તિએ ફરિયાદ નોંધાવી કે, તેણે બ્લિંકિટ એપ પરથી દહીં ઓર્ડર કર્યું હતું. ફરિયાદ મુજબ, દહીં ખાધાના થોડા સમય પછી જ તેની તબિયત લથડી ગઈ હતી. તેને અસહ્ય પેટનો દુખાવો અને ઝાડાની તકલીફ થઈ હતી. હાલત બગડતાં તેને મેડિકલ સહાય લેવી પડી હતી. ગ્રાહકે આ અંગેની લેખિત ફરિયાદ FSSAIને મોકલી હતી.
FSSAI એ બ્લિંકિટ પાસે માંગ્યો જવાબ
પીટીઆઈ (PTI) ના અહેવાલ મુજબ, FSSAI એ 29 મેના રોજ બ્લિંક કોમર્સ પ્રાઇવેટ લિમિટેડ (Blink Commerce Pvt Ltd) ના મુખ્ય કાર્યકારી અધિકારી (CEO) અને કામગીરી સાથે જોડાયેલા અધિકારીઓને પત્ર મોકલ્યો હતો. આમાં કંપની પાસે આ બાબતે જવાબ માંગવામાં આવ્યો છે. સાથે જ આ સમગ્ર મામલામાં શું કાર્યવાહી કરવામાં આવી તેનો રિપોર્ટ પણ માંગ્યો છે.
પહેલાં પણ મળી ચૂકી છે ‘ઘણી ફરિયાદો’
અહેવાલ અનુસાર, તાજેતરના સમયમાં FSSAI ને બ્લિંકિટ પ્લેટફોર્મને લઈને ઘણી ફરિયાદો મળી છે. આમાં ખરાબ અથવા બગડેલી હાલતમાં ખાદ્ય પદાર્થોની ડિલિવરી કરવાની વાત કહેવામાં આવી છે.
કેટલીક ફરિયાદો સોશિયલ મીડિયા દ્વારા સામે આવી છે, જ્યારે કેટલીક સીધી નોંધાવવામાં આવી હતી. આ પહેલાં પણ ખરાબ ક્વોલિટીના ઇંડાના વેચાણને લઈને કંપની પાસે જવાબ માંગવામાં આવ્યો હતો.
ફૂડ બિઝનેસ ઓપરેટર પર હોય છે ‘જવાબદારી’
ખાદ્ય સુરક્ષા કાયદા હેઠળ કોઈપણ ફૂડ બિઝનેસ ઓપરેટરની એ જવાબદારી હોય છે કે, તે ગ્રાહકો સુધી સુરક્ષિત ખાદ્ય પદાર્થો પહોંચાડે. કાયદા મુજબ ખાદ્ય પદાર્થોના મેન્યુફેક્ચરિંગ (ઉત્પાદન), સ્ટોરેજ (સંગ્રહ) અને ડિસ્ટ્રિબ્યુશન (વિતરણ) ની જવાબદારી કંપનીની હોય છે.
FSSAI આ જ નિયમ હેઠળ આ મામલાની તપાસ કરી રહ્યું છે. જો કોઈ પણ પ્રકારની બેદરકારી જણાશે તો આગળની કાર્યવાહી થઈ શકે છે.
