મફત વીજળી બાદ પંજાબને મોંઘવારીમાં મળશે રાહત, કેજરીવાલે ભાજપ-કોંગ્રેસ પર તિજોરી ખાલી કરવાનો લગાવ્યો આરોપ
સીએમ કેજરીવાલે (CM Kejriwal) કહ્યું કે અમે શિક્ષિત છીએ, પ્રામાણિક લોકો છીએ, તેથી જ અમે આ સિસ્ટમ બદલી રહ્યા છીએ. તેમણે કહ્યું કે જો આવતીકાલે પંજાબમાં AAPની સરકાર ન હોય તો પણ આ સિસ્ટમ બદલવી જ પડશે.
દિલ્હીના (Delhi) સીએમ અરવિંદ કેજરીવાલે (CM Kejriwal) પંજાબના લોકોને મફત વીજળી મળવા બદલ અભિનંદન પાઠવ્યા હતા. તેમણે કહ્યું કે સીએમ ભગવંત માનની જાહેરાત મુજબ પંજાબના લોકોને 1 જુલાઈથી 300 યુનિટ મફત વીજળી મળશે. તેમણે કહ્યું કે AAP સરકારના આ નિર્ણયથી પંજાબના લોકો ખૂબ જ ખુશ છે. સીએમ કેજરીવાલે કહ્યું કે પાર્ટીએ ચૂંટણી સમયે જ વીજળી ફ્રી કરવાની (Punjab Free Electricity) ગેરંટી આપી હતી. તમામ પક્ષો તેમના પર તિજોરી ખાલી કરવાનો અને ખોટું બોલવાનો આરોપ લગાવતા હતા. દિલ્હીના સીએમ કેજરીવાલે કહ્યું કે તેમણે પંજાબને આપેલું વચન પૂરું કર્યું છે.
પંજાબની AAP સરકારે માત્ર એક મહિનામાં પોતાનું પહેલું વચન પૂરું કર્યું છે. તેમણે કહ્યું કે સરકાર એક પછી એક પોતાના તમામ વચનો પૂરા કરશે. AAP કન્વીનરે ભાજપ-કોંગ્રેસ સહિત તમામ પક્ષો પર પંજાબને લૂંટવાનો આરોપ લગાવ્યો હતો. દિલ્હીના સીએમએ કહ્યું કે આ પાર્ટીઓએ પંજાબની તિજોરી ખાલી કરી છે, પરંતુ તેમની સરકારનો ઈરાદો સ્પષ્ટ છે.
પંજાબને મોંઘવારીમાંથી મળશે રાહત
અરવિંદ કેજરીવાલે કહ્યું કે, પંજાબમાં AAPની સરકાર બનતાની સાથે જ માફિયાઓએ તેમનો સંપર્ક કર્યો કે સિસ્ટમ શું છે? તેમણે કહ્યું કે માત્ર ઈમાનદારીથી કામ કરો. સીએમ કેજરીવાલે કહ્યું કે આ સરકારની મહેનતનું પરિણામ છે કે એક મહિનામાં પંજાબમાં વીજળી ફ્રી થઈ ગઈ, હવે લોકોને મોંઘવારીથી રાહત મળશે. AAP કન્વીનરે કહ્યું કે લોકોને વિશ્વાસ નથી થઈ રહ્યો કે આવું થઈ શકે છે. કારણ કે પક્ષો ચૂંટણીમાં માત્ર વચનો આપે છે, પરંતુ તેમની સરકાર પ્રમાણિક છે, તેથી જ તેમણે તે કર્યું છે.
સીએમ કેજરીવાલે કહ્યું કે તેમણે આશા વ્યક્ત કરી હતી કે વિપક્ષના લોકો આ નિર્ણયનું સ્વાગત કરશે, પરંતુ તેઓ વિરોધ કરી રહ્યા છે. સીએમ કેજરીવાલે કહ્યું કે અમે શિક્ષિત છીએ, પ્રામાણિક લોકો છીએ, તેથી જ અમે આ સિસ્ટમ બદલી રહ્યા છીએ. તેમણે કહ્યું કે જો આવતીકાલે પંજાબમાં AAPની સરકાર ન હોય તો પણ આ સિસ્ટમ બદલવી જ પડશે.
AAP પ્રામાણિક અને શિક્ષિત લોકોની પાર્ટી
AAP કન્વીનરે અરવિંદ કેજરીવાલના ઘરમાં તોડફોડ કરનારા આરોપીઓને સન્માનિત કરતા ભાજપ પર કટાક્ષ કર્યો હતો. તેણે ટ્વીટ કર્યું કે જો કોઈ અમેરિકામાં ગુંડાગીરી કરે છે તો તેને જેલમાં મોકલવામાં આવે છે, પરંતુ ભારતમાં તેને પાર્ટીમાં લેવામાં આવે છે. ભાજપ પર કટાક્ષ કરતા તેમણે કહ્યું કે યુરોપમાં કોઈ છોકરીની છેડતી કરે તો તે જેલમાં જાય છે, ભારતમાં તે તેની પાર્ટીમાં જાય છે.
અરવિંદ કેજરીવાલે બીજેપી પર પ્રહાર કરતા કહ્યું કે આ લોકો ક્યારેય સારી સ્કુલ નહીં બનાવી શકે. તેમને તેમની રાજનીતિ માટે લાખો અભણ ગુંડાઓ, માફિયાઓ અને બેરોજગારોની જરૂર છે. AAP કન્વીનરે કહ્યું કે જો ભારત વિશ્વગુરુ બનવા માંગે છે, તો ગુંડાગીરી કરનારા પક્ષોનો બહિષ્કાર કરો. આ સાથે તેમણે કહ્યું કે આપ શરીફ, ઈમાનદાર, દેશભક્ત, શિક્ષિત લોકોની પાર્ટી છે. તેમણે કહ્યું કે આપને સપોર્ટ કરો. આપણે આપણાં બાળકો અને યુવાનોને સારું શિક્ષણ અને સારી રોજગાર આપીને પશ્ચિમી દેશો સાથે સ્પર્ધા માટે તૈયાર કરવાના છે.