Maharashtra Politics: શિંદે જૂથના ધારાસભ્યોને મળવા તાજ હોટલ પહોંચ્યા મહારાષ્ટ્રના ડેપ્યુટી સીએમ દેવેન્દ્ર ફડણવીસ

મહારાષ્ટ્રમાં છેલ્લા કેટલાક દીવસોથી ચાલી રહેલા રાજકીય સંકટનો (Maharashtra Political Crisis) અંત આવ્યો છે. નવી સરકારનો ઉદય થયો છે. નોંધનીય છે કે, આવતીકાલથી મહારાષ્ટ્રમાં બે દિવસીય વિધાનસભા સત્ર શરૂ થવાનું છે, ત્યારે ગોવાહાટીમાં રહેલા શિંદે જુથના ધારાસભ્યો મુંબઈ પહોચ્યા છે. તમામ ધારાસભ્યોને તાજ હોટલમાં રહેવાની વ્યવસ્થા કરવામાં આવી છે. અહેવાલ છે કે મહારાષ્ટ્રના ડેપ્યુટી સીએમ દેવેન્દ્ર ફડણવીસ (Deputy CM Devendra Fadnavis) શિંદે જૂથના ધારાસભ્યોને મળવા તાજ હોટલ પહોંચ્યા હતા.

એકનાથ શિંદેએ બહુમતી સાબિત કરવી પડશે

મહારાષ્ટ્રના રાજ્યપાલે રવિવાર અને સોમવારે બે દિવસનું વિશેષ વિધાનસભા સત્ર બોલાવ્યું છે. આ વિધાનસભા સત્ર ખાસ છે કારણ કે નવનિયુક્ત મુખ્યમંત્રી એકનાથ શિંદે સરકારે આ બે દિવસીય વિધાનસભા સત્રમાં બહુમતી સાબિત કરવાની છે. એકંદરે, આ બે દિવસીય વિધાનસભા સત્ર એકનાથ શિંદે સરકારની ફ્લોર ટેસ્ટ છે. મળતી માહિતી મુજબ, એકનાથ શિંદે સરકાર સોમવારે ફ્લોર ટેસ્ટ આપવાની છે. બીજી તરફ રવિવારે વિધાનસભા અધ્યક્ષની ચૂંટણી પ્રક્રિયા હાથ ધરાશે. શનિવારે સ્પીકર માટે નોમિનેશન ભરવાનો છેલ્લો દિવસ હતો.

શિંદેની બહુમતી પહેલા સ્પીકરની ચૂંટણી ચિત્ર સ્પષ્ટ કરશે

નવનિયુક્ત મુખ્ય પ્રધાન એકનાથ શિંદે સરકારને સોમવારે ફ્લોર ટેસ્ટમાંથી પસાર થવું પડશે, પરંતુ નવી નિયુક્ત સરકારની પ્રથમ કસોટી સ્પીકરની ચૂંટણી છે, જે નવી સરકારની બહુમતીનું ચિત્ર સ્પષ્ટ કરશે. વાસ્તવમાં મહારાષ્ટ્ર વિધાનસભાના અધ્યક્ષની ચૂંટણી રવિવારે યોજાવાની છે. જેના માટે ભાજપે ધારાસભ્ય રાહુલ નાર્વેકરને મેદાનમાં ઉતાર્યા છે. તો શિવસેનાએ રાજન સાલ્વીને પોતાના ઉમેદવાર બનાવ્યા છે. આ ચૂંટણીમાં જે પણ રાજકીય પક્ષ જીતે તેની તરફેણમાં સોમવારે ફ્લોર ટેસ્ટ થવાની સંભાવના છે.

ઉદ્ધવ સાથે બળવો કર્યા પછી, શિંદે ભાજપના સમર્થનથી મુખ્યમંત્રી બન્યા

એકનાથ શિંદેએ ભાજપના સમર્થનથી મુખ્યમંત્રી પદના શપથ લીધા છે. જો કે શિવસેનાના બળવાખોર ધારાસભ્યો પણ તેમની તરફેણમાં છે. 20 જૂને એકનાથ શિંદેએ શિવસેના પ્રમુખ અને તત્કાલીન મુખ્યમંત્રી ઉદ્ધવ ઠાકરે સામે બળવો કર્યો હતો. જે બાદ તેમણે ઘણા ધારાસભ્યો પોતાના પક્ષમાં હોવાનો દાવો કર્યો હતો. જેમ જેમ દિવસ આગળ વધતા ગયા તેમ તેમ શિંદેને સમર્થન આપનારા ધારાસભ્યોની સંખ્યા 37 થી વધીને 40 થઈ ગઈ. જે બાદ રાજ્યપાલે ઉદ્ધવ ઠાકરે સરકારને ફ્લોર ટેસ્ટ કરાવવાનું કહ્યું હતું, જેને બાદમાં સુપ્રીમ કોર્ટે પણ મંજૂરી આપી હતી, પરંતુ કોર્ટના નિર્ણય બાદ ઉદ્ધવ ઠાકરેએ મુખ્યમંત્રી પદ પરથી રાજીનામું આપી દીધું હતું. જે બાદ એકનાથ શિંદેએ બળવાખોર ધારાસભ્યો અને બીજેપીના સમર્થનમાં સરકાર બનાવી હતી.