Nagpur Flood: મુશળધાર વરસાદે નાગપુરમાં વેર્યો વિનાશ, ઘરોથી લઈને રસ્તાઓ સુધી બધું જ ડૂબ્યું પાણીમાં, ઘણા વાહનોને થયું નુકસાન, જુઓ Video

મહારાષ્ટ્રના નાગપુર શહેરમાં ભારે વરસાદ થયો છે. જે બાદ શહેર તળાવમાં ફેરવાઈ ગયું હતું. રસ્તાથી ઘર સુધી પાણી ઘૂસી જતાં પૂર જેવી સ્થિતિ સર્જાઈ છે. રાહત અને બચાવ કામગીરી માટે ભારતીય સેનાને બોલાવવી પડી હતી. સતત વરસાદના કારણે નીચાણવાળા વિસ્તારોમાં પાણી ભરાયા હતા. હવામાન વિભાગે નાગપુરમાં વરસાદ માટે ઓરેન્જ એલર્ટ જાહેર કર્યું છે.

સમગ્ર શહેરમાં વીજળીના કડાકા-ભડાકા સાથે ભારે વરસાદ ચાલુ છે. શહેર અને આસપાસના વિસ્તારોમાં પાણી ભરાયા છે. અનેક વિસ્તારોમાં 1 થી 4 ફૂટ સુધી પાણી ભરાઈ ગયા છે. એનડીઆરએફ અને એસડીઆરએફના બે એકમોએ પૂર પ્રભાવિત વિસ્તારોમાંથી 140 લોકોને બહાર કાઢ્યા, તેઓએ સાંભળવાની અને બોલવાની ક્ષતિ ધરાવતા 40 શાળાના વિદ્યાર્થીઓને પણ બહાર કાઢ્યા.

જાણવા મળે છે કે નાગપુરમાં શનિવારથી સતત વરસાદ ચાલુ છે. આર્મી ઉપરાંત એનડીઆરએફ, એસડીઆરએફ, નાગપુર પોલીસ, ફાયર બ્રિગેડ અને અન્ય એજન્સીઓને પૂરમાં ફસાયેલા લોકોને મદદ કરવા અને સુરક્ષિત સ્થળોએ પહોંચાડવા માટે તૈનાત કરવામાં આવી છે. નાગપુર શહેરના ઘણા વિસ્તારોમાં મોટા પાયે પાણી ભરાયા હોવાના અહેવાલો છે. જેમાં શંકર નગર, પંચશીલ ચોક, સીતાબુલડી, અંબાઝારી, કાંચીપુરા, ઈટવારી, લક્કડગંજ, ધરમપેઠ, મેકોસાબાગ, સદર, કોટન માર્કેટ અને આસપાસના વિસ્તારોનો સમાવેશ થાય છે.

આ પણ વાંચો : મુંબઈમાં 15 માળની ઈમારતમાં લાગી આગ, 60 વર્ષના વૃદ્ધનું મોત, ફાયર બ્રિગેડે આગ પર કાબુ મેળવ્યો

ભારે વરસાદના કારણે આવેલા પૂરને કારણે 53 વર્ષીય મહિલા સહિત ચાર લોકોના મોત થયા છે. મહારાષ્ટ્રના નાયબ મુખ્યમંત્રી દેવેન્દ્ર ફડણવીસે શનિવારે મોડી સાંજે દરેક મૃતકોના પરિવારજનોને 4 લાખ રૂપિયાના વળતરની જાહેરાત કરી હતી. દરમિયાન નાયબ મુખ્યમંત્રી દેવેન્દ્ર ફડણવીસે રવિવારે નાગપુરમાં પૂરગ્રસ્ત વિસ્તારોની મુલાકાત લીધી હતી. ફડણવીસે પૂરથી પ્રભાવિત પરિવારો સાથે વાતચીત કરવા માટે શહેરના સૌથી મોટા જળાશય અંબાઝારી તળાવની આસપાસના ઘરોની મુલાકાત લીધી હતી.