Chalukya Express Derailment: દુર્ઘટનાને 14 કલાક વીતી ગયા, હજુ પણ પાટા પર પડી છે બોગી, 500 થી વધુ લોકો કરી રહ્યા છે હટાવવાનો પ્રયાસ

મધ્ય રેલવેના (Central Railway) મુખ્ય જનસંપર્ક અધિકારી શિવાજી સુતારે જણાવ્યું કે એક ઉચ્ચ સ્તરીય સમિતિની રચના કરવામાં આવી છે જે સમગ્ર મામલાની તપાસ કરશે. ત્યારબાદ જ ખબર પડશે કે આ અકસ્માત કેવી રીતે થયો.

Chalukya Express Derailment

TV9 Gujarati | Edited By: Nidhi Bhatt | Updated on: Apr 16, 2022 | 3:12 PM

મહારાષ્ટ્ર (Maharashtra) ચાલુક્ય એક્સપ્રેસ (Chalukya Express) ટ્રેનના 3 ડબ્બા શુક્રવારે રાત્રે લગભગ 10 વાગ્યે મુંબઈના માટુંગા સ્ટેશન નજીક પાટા પરથી ઉતરી (Derailment) ગયા હતા. જો કે, સદનસીબે આ અકસ્માતમાં કોઈને ઈજા થઈ ન હતી. આ ટ્રેન દાદરથી પુડુચેરી જવા નીકળી હતી. ગાડી લગભગ 1 કિલોમીટર ચાલી હતી, ગાડીએ પુરી સ્પીડ પણ પકડી ન હતી કે આ અકસ્માત થયો. શુક્રવારની રાતથી ત્રણેય કોચને હટાવવાની કામગીરી યુદ્ધના ધોરણે ચાલી રહી છે. 12 કલાક વીતી જવા છતાં હજુ સુધી માત્ર 2 કોચ હટાવવામાં આવ્યા છે. જ્યારે વધુ એક કોચને બહાર કાઢવા માટે બપોરે 12 વાગ્યા સુધીમાં ટાર્ગેટ રાખવામાં આવ્યો છે. સમગ્ર કામગીરીમાં 500 જેટલા કામદારો કામે લાગ્યા છે.

અકસ્માતના કારણે 13 અપ અને ડાઉન ટ્રેન રદ કરવામાં આવી છે. જે લોકો મુસાફરી કરી શક્યા નથી તેઓ 3 દિવસમાં રિફંડ માટે અરજી કરી શકે છે. આ અકસ્માત કેવી રીતે થયો તે અંગે મધ્ય રેલવેના મુખ્ય જનસંપર્ક અધિકારી શિવાજી સુતારે જણાવ્યું કે એક ઉચ્ચ સ્તરીય સમિતિની રચના કરવામાં આવી છે જે સમગ્ર મામલાની તપાસ કરશે. ત્યારે જ ખબર પડશે કે આ અકસ્માત કેવી રીતે થયો.

માટુંગા રેલવે સ્ટેશન પાસે થયો હતો અકસ્માત

અગાઉ મધ્ય રેલવેએ જણાવ્યું હતું કે આ ઘટના સેન્ટ્રલ લાઇનના માટુંગા રેલવે સ્ટેશન પાસે બની હતી. એક જ ટ્રેક પર બે એક્સપ્રેસ ટ્રેનો સામસામે આવી અને ગડક એક્સપ્રેસે પોંડિચેરી એક્સપ્રેસને ટક્કર મારી. રેલવેના જણાવ્યા અનુસાર, આ અકસ્માતમાં કોઈને ઈજા થઈ નથી. અકસ્માતના કારણે મધ્ય રેલવેનો ટ્રાફિક પ્રભાવિત થયો છે. માહિતી મળતા જ રેલવેના વરિષ્ઠ અધિકારીઓ ઘટનાસ્થળે પહોંચી ગયા હતા અને સ્થિતિનો તાગ મેળવ્યો હતો.

આ પહેલા 2 એપ્રિલે મહારાષ્ટ્રના થાણે જિલ્લામાં મોટી ટ્રેન દુર્ઘટના ટળી હતી. મળતી માહિતી મુજબ, કસારામાં આસનગાંવ-અટાગાંવ રેલવે ક્રોસિંગ પર એક નાનો ટ્રક આ ટ્રેન અકસ્માતનું કારણ બનવાથી બચી ગયો હતો. આ ઘટનાનો વીડિયો પણ સોશિયલ મીડિયા પર વાયરલ થયો હતો. આ રેલવે ક્રોસિંગ પર ઉભેલા કોઈએ તેના મોબાઈલ ફોનમાં શૂટિંગ કર્યું હતું.

વીડિયોમાં દેખાઈ રહ્યું છે કે આસનગાંવ-આટાગાંવ રેલવે ક્રોસિંગના બંને ફાટક બંધ છે. એક બાઇક સવાર ક્રોસિંગ ખુલવાની રાહ જોઈ રહ્યો હતો. એટલામાં જ એક નાની ટ્રક તેજ ગતિએ રેલવે ક્રોસિંગ તરફ આવે છે અને બેરિયર સાથે અથડાય છે. ત્યારે જ તેજ ગતિએ આવતી ટ્રેન પણ ક્રોસિંગ પરથી નીકળી જાય છે.