તમારી સાથે ટ્રેનમાં ક્યારેય આવું થયું? પેસેન્જરની કન્ફર્મ સીટ TTE એ કરી Absent, ફરિયાદ કેવી રીતે કરશો.. જાણો

એક કન્ફર્મ ટ્રેન ટિકિટ મુસાફરને મુસાફરી દરમિયાન પોતાની સીટ પર બેસવાનો અને આરામથી મુસાફરી કરવાનો સંપૂર્ણ અધિકાર આપે છે. પરંતુ હાલમાં સોશિયલ મીડિયા પર વાયરલ થયેલા એક વીડિયોએ રેલ્વે વ્યવસ્થાને લઈને અનેક સવાલો ઉભા કર્યા છે. વીડિયોમાં એક મુસાફર આરોપ લગાવે છે કે તેની કન્ફર્મ સીટ હોવા છતાં તેને સિસ્ટમમાં “ગેરહાજર” તરીકે ચિહ્નિત કરવામાં આવ્યો હતો. સૌથી આશ્ચર્યજનક વાત એ હતી કે TTE એ મુસાફરના પ્રશ્નોના યોગ્ય જવાબ આપવાને બદલે કહ્યું, “મને પ્રશ્નો પૂછશો નહીં.”

વિડિયોમાં મુસાફર પોતાની ટિકિટ બતાવતા TTE ને પૂછે છે કે તેને ગેરહાજર કેવી રીતે જાહેર કરવામાં આવ્યો. તેના જવાબમાં TTE કહે છે કે સિસ્ટમમાં એવી એન્ટ્રી થઈ ગઈ છે અને હવે તે બદલવી શક્ય નથી. ત્યારબાદ બીજા એક મુસાફરે પણ પ્રશ્ન કર્યો કે જ્યારે મુસાફર હાજર છે અને તેની પાસે માન્ય ટિકિટ છે, ત્યારે તેને ગેરહાજર કેમ જાહેર કરવામાં આવ્યો? આ પર TTE ગુસ્સે થઈને કહે છે કે “અમને આ બાબતે પ્રશ્નો પૂછશો નહીં.”

મુસાફરોએ વધુમાં દાવો કર્યો કે તેમની સીટ બીજા મુસાફરને ફાળવી દેવામાં આવી હતી. મુસાફરોએ પોતાની સીટ છોડવાનો ઇનકાર કરતા ટ્રેનમાં ભારે હોબાળો મચી ગયો હતો. TTE એ કહ્યું કે મામલો તેના અધિકારક્ષેત્ર બહારનો છે અને જો ફરિયાદ કરવી હોય તો રેલ્વે હેલ્પલાઇન અથવા RailMadad પર નોંધાવી શકાય.

રેલ્વેના નિયમો મુજબ, જો કોઈ મુસાફર ટ્રેન શરૂ થયા પછી લાંબા સમય સુધી પોતાની સીટ પર હાજર ન રહે અથવા ટિકિટ ચકાસણી દરમિયાન ન મળે, તો તેને ગેરહાજર જાહેર કરી શકાય છે. આવી સ્થિતિમાં સીટ RAC અથવા વેઇટિંગ લિસ્ટમાં રહેલા મુસાફરને ફાળવવામાં આવે છે. કેટલીક વખત ટેક્નિકલ ખામીઓ, ચાર્ટ અપડેટમાં વિલંબ અથવા TTE ના ડિવાઇસમાં માહિતી સમયસર અપડેટ ન થવાને કારણે પણ આવી સમસ્યા સર્જાઈ શકે છે.

જો કોઈ મુસાફરને ખોટી રીતે ગેરહાજર જાહેર કરવામાં આવ્યો હોય, તો તે તરત જ TTE સાથે વાતચીત કરી શકે છે અથવા રેલ્વે હેલ્પલાઇન અને RailMadad એપ પર ફરિયાદ નોંધાવી શકે છે. સામાન્ય રીતે આવી ફરિયાદો પર રેલ્વે દ્વારા તપાસ હાથ ધરવામાં આવે છે.

આ મામલે રેલ્વે તરફથી પણ પ્રતિક્રિયા આપવામાં આવી હતી. રેલ્વે અધિકારીઓએ મુસાફરને થયેલી અસુવિધા બદલ દિલગીરી વ્યક્ત કરી અને PNR નંબર, ટ્રેન નંબર, મુસાફરીની તારીખ સહિતની વિગતો મોકલવા વિનંતી કરી, જેથી સમગ્ર મામલાની તપાસ કરી શકાય.

(નોંધ : અહીં આપવામાં આવેલ વીડિયો સોશિયલ મીડિયામાં વાયરલ થયેલ છે.)

Bike Transport by Train : ટ્રેન દ્વારા બાઇક કેવી રીતે મોકલવી?