કાર ચલાવતી વખતે સિગારેટ પીવા પર દંડ થઈ શકે ? જાણો શું છે નિયમ

કારમાં સીટ બેલ્ટ ન બાંધવો, વધુ ઝડપે વાહન ચલાવવું, હેલ્મેટ ન પહેરવું, દારૂના નશામાં વાહન ચલાવવું આ તમામ ભારતીય મોટર વાહન અધિનિયમ મુજબ સજાપાત્ર અપરાધ છે અને આ માટે તમને દંડ પણ થઈ શકે છે. પરંતુ ઘણા લોકોના મનમાં આ પ્રશ્ન ઉદ્ભવે છે કે કાર ચલાવતી વખતે સિગારેટ પીવા પર કોઈ પ્રકારનો દંડ થઈ શકે છે. તમારા મનમાં પણ આ જ પ્રશ્ન હોય તો આ લેખમાં અમે તમને તેના વિશે જણાવીશું.

કાર ચલાવતી વખતે સિગારેટ પીવા પર દંડ થઈ શકે ?

કાર ચલાવતી વખતે તમારે માત્ર ટ્રાફિકના નિયમોનું પાલન જ નથી કરવાનું, કારને લગતા ઘણા નિયમોનું પણ પાલન કરવું પડે છે. ઘણા એવા નિયમો છે, જેના વિશે લોકો જાણતા પણ નથી. આવો જ એક નિયમ ધૂમ્રપાન સાથે સંબંધિત છે, જો તમે કારમાં બેસીને ધૂમ્રપાન કરો છો, તો પોલીસ તમને દંડ આપી શકે છે, તેથી તમારે સાવચેત રહેવાની જરૂર છે.

મોટર વ્હીકલ એક્ટ શું કહે છે ?

જાહેર સ્થળે ધૂમ્રપાન કે દારૂ પીવો એ કાયદાકીય ગુનો છે. આવી સ્થિતિમાં જ્યારે તમારું પોતાનું વાહન રસ્તા પર હોય, ત્યારે તેને જાહેર સ્થળ તરીકે ગણવામાં આવે છે. હવે જો તમે કારમાં બેસીને ધૂમ્રપાન કરતા જોવા મળશો, તો પોલીસ તમને દંડ આપશે અને તમે આ અંગે કોઈ ખુલાસો આપી શકશો નહીં. તેથી કારની અંદર બેસીને દારૂ પીવાની સાથે કારમાં બેસીને સિગારેટ પીવી એ પણ મોટર વ્હીકલ એક્ટની કલમ DMVR 86.1(5)/177 હેઠળ કાયદેસરનો ગુનો છે.

કેટલો થઈ શકે દંડ ?

મોટર વાહન અધિનિયમની કલમ 86.1(5)/177 હેઠળ, કારમાં અથવા જાહેર સ્થળે બેસીને ધૂમ્રપાન કરવા બદલ પ્રથમ વખત 100 રૂપિયા અને બીજી વખત 300 રૂપિયાનો દંડ થઈ શકે છે. આ નિયમો જાહેર સ્થળોએ ધૂમ્રપાન અટકાવવા માટે બનાવવામાં આવ્યા છે. આ સિવાય પોલીસ તમને દારૂના નશામાં વાહન ચલાવવા અને જાહેરમાં દારૂ પીને 500 રૂપિયા સુધીનું ચલણ જારી કરી શકે છે.