નવી કારની ટેસ્ટ ડ્રાઈવ લેતી વખતે જો ગાડી અથડાય તો રિપેરિંગના પૈસા કોણે આપવા પડે? ડ્રાઈવરે કે શોરૂમ માલિકે?
નવી કાર લેતા પહેલા ટેસ્ટ ડ્રાઈવ લેવી સામાન્ય બાબત છે, પણ જો આ દરમિયાન અકસ્માત થાય તો લાખોનું નુકસાન કોણ ભરે? શું ગ્રાહકે ખિસ્સા ખાલી કરવા પડે? વાંચો આ અહેવાલમાં.
જ્યારે પણ આપણે નવી કાર ખરીદવાનું વિચારીએ છીએ, ત્યારે તેની સ્પીડ, કમ્ફર્ટ અને ફીચર્સ ચેક કરવા માટે ટેસ્ટ ડ્રાઈવ ચોક્કસ લઈએ છીએ. પરંતુ, રસ્તા પર ટેસ્ટ ડ્રાઈવ લેતી વખતે અકસ્માત થવાનું જોખમ હંમેશા રહેલું હોય છે. ભલે ભૂલ તમારી હોય કે સામેવાળાની, પણ શું તમે ક્યારેય વિચાર્યું છે કે જો કરોડોની કારને નુકસાન થાય તો તેનું બિલ કોના નામે ફાટશે?
કોણ આપશે રિપેરિંગના પૈસા?
મોટાભાગના લોકો એવું માને છે કે જે ગાડી ચલાવતું હોય તેણે જ નુકસાન ભરવું પડે, પણ હકીકત કંઈક અલગ છે. ટેસ્ટ ડ્રાઈવ દરમિયાન જો કારનો અકસ્માત થાય, તો ગ્રાહકે (ડ્રાઈવરે) કોઈ પણ પ્રકારનું નુકસાન ભરવાનું હોતું નથી.
તેની પાછળનું મુખ્ય કારણ એ છે કે
- તમે હજુ કાર ખરીદી નથી, એટલે કે તમે તેના માલિક નથી.
- ગાડી તમારી માલિકીની ન હોવાથી તેની જવાબદારી તમારી બનતી નથી.
- કારની તમામ કાયદાકીય જવાબદારી શોરૂમ કે કંપનીની હોય છે.
વીમા કંપની અને થર્ડ પાર્ટી ઇન્સ્યોરન્સનો રોલ
ટેસ્ટ ડ્રાઈવ માટે વપરાતી દરેક કારનો શોરૂમ દ્વારા પહેલેથી જ ઇન્સ્યોરન્સ (વીમો) લેવામાં આવેલો હોય છે. કંપનીઓ ખાસ કરીને થર્ડ પાર્ટી ઇન્સ્યોરન્સ અને ઓન-ડેમેજ કવર રાખતી હોય છે. અકસ્માતના કિસ્સામાં, કારમાં જે પણ તોડફોડ થાય તેની ભરપાઈ વીમા કંપની કરે છે. એટલે કે, કંપનીના ખિસ્સામાંથી પણ ખાસ કંઈ જતું નથી અને ગ્રાહકે પણ કશું ચૂકવવું પડતું નથી.
ટેસ્ટ ડ્રાઈવ લેતી વખતે આ 5 વાતોનું ખાસ ધ્યાન રાખો
ભલે નુકસાનના પૈસા તમારે નથી આપવાના, પરંતુ શારીરિક ઈજા અને માનસિક તણાવથી બચવા માટે નીચેની બાબતો ધ્યાનમાં રાખવી જરૂરી છે
- ફીચર્સ સમજી લો: ગાડી રસ્તા પર ઉતારતા પહેલા તેના ગિયર, બ્રેક અને અન્ય કંટ્રોલ્સ વિશે સેલ્સમેન પાસેથી પૂરી જાણકારી લો.
- સીટ એડજસ્ટમેન્ટ: ડ્રાઈવિંગ શરૂ કરતા પહેલા તમારી ઊંચાઈ મુજબ સીટ અને મિરર સેટ કરો.
- વધુ ઝડપ ટાળો: અજાણી કારને સીધી જ હાઈ-સ્પીડ પર ન દોડાવો.
- ટ્રાફિકથી દૂર રહો: બને ત્યાં સુધી ઓછા ટ્રાફિક વાળા રસ્તા પર ટેસ્ટ ડ્રાઈવનો આગ્રહ રાખો.
- દસ્તાવેજો: ટેસ્ટ ડ્રાઈવ લેતા પહેલા શોરૂમ તમારી પાસે લાયસન્સની કોપી માંગશે અને ઘણીવાર ‘ડેકલેરેશન ફોર્મ’ પર સહી કરાવશે, તેને ધ્યાનથી વાંચો.
જો કોઈ શોરૂમ તમારી પાસેથી નુકસાનના પૈસા માંગે, તો તમે ગ્રાહક સુરક્ષાના નિયમોનો હવાલો આપી શકો છો.
