Rules Changed : વિદેશથી ભારત આવતી વખતે તમે કેટલું સોનું ડયુટી ફ્રી લાવી શકો ? જાણી લો નવા નિયમો
ભારતમાં આંતરરાષ્ટ્રીય મુસાફરો માટે 2 ફેબ્રુઆરી 2026થી નવા બેગેજ નિયમો અમલમાં આવ્યા છે. હવે ભારતીય રહેવાસીઓ ₹75,000 અને પ્રવાસી વિઝા પરના વિદેશીઓ ₹25,000 સુધીનો સામાન ડ્યુટી-ફ્રી લાવી શકશે.
ભારતમાં આવતા આંતરરાષ્ટ્રીય મુસાફરો માટે આજથી નવા સામાન (બેગેજ) નિયમો અમલમાં આવ્યા છે. મુસાફરોની સુવિધા વધારવા, આધુનિક મુસાફરીની રીતોને અનુરૂપ ફેરફાર કરવા અને વ્યક્તિગત વસ્તુઓ પરનો કરભાર ઘટાડવાના ઉદ્દેશ્ય સાથે સરકાર દ્વારા આ સુધારાઓ કરવામાં આવ્યા છે. હવે વિદેશથી પરત ફરતી વખતે મુસાફરો વધારાના કર વિના વધુ મૂલ્યનો સામાન લાવી શકશે.
સરકારે “બેગેજ નિયમો, 2026” જાહેર કર્યા છે, જે 2 ફેબ્રુઆરી, 2026 થી અમલમાં આવ્યા છે. આ નવા નિયમો હવાઈ કે સમુદ્ર માર્ગે ભારતમાં આવતા મુસાફરો માટે લાગુ પડશે અને અગાઉના બેગેજ નિયમો, 2016 ને બદલે છે. આ અંગે Central Board of Indirect Taxes and Customs (CBIC) દ્વારા 1 ફેબ્રુઆરીએ અધિકૃત સૂચના જાહેર કરવામાં આવી હતી.
₹75,000 સુધીની કિંમતની વ્યક્તિગત વસ્તુઓ ડ્યુટી-ફ્રી
નવા નિયમો મુજબ, ભારતીય રહેવાસીઓ, ભારતીય મૂળના પ્રવાસીઓ તથા પ્રવાસી વિઝા સિવાયના માન્ય વિઝા ધરાવતા વિદેશી નાગરિકો હવે ₹75,000 સુધીની કિંમતની વ્યક્તિગત વસ્તુઓ ડ્યુટી-ફ્રી લાવી શકે છે. અગાઉ આ મર્યાદા ₹50,000 હતી. જ્યારે ટૂરિસ્ટ વિઝા પર ભારત આવનારા વિદેશી મુસાફરો માટે ડ્યુટી-ફ્રી મર્યાદા ₹15,000 થી વધારીને ₹25,000 કરવામાં આવી છે.
સોનાના દાગીના બાબતે પણ મુસાફરોને ખાસ રાહત આપવામાં આવી છે. એક વર્ષથી વધુ સમયથી વિદેશમાં રહેલા ભારતીય રહેવાસીઓ અથવા ભારતીય મૂળના વ્યક્તિઓ ભારત પરત ફરતી વખતે વ્યક્તિગત ઉપયોગ માટે મર્યાદિત માત્રામાં સોનાના દાગીના ડ્યુટી-ફ્રી લાવી શકશે. મહિલાઓ માટે મહત્તમ 40 ગ્રામ અને પુરુષો માટે મહત્તમ 20 ગ્રામ સુધીના દાગીના પર કોઈ શુલ્ક લાગશે નહીં, જો તે વેચાણ માટે ન હોય.
નવું લેપટોપ અથવા નોટપેડ ડ્યુટી-ફ્રી
આ ઉપરાંત, 18 વર્ષ કે તેથી વધુ ઉંમરના કોઈપણ મુસાફર (ક્રૂ સભ્યો સિવાય) પોતાના સામાનમાં એક નવું લેપટોપ અથવા નોટપેડ ડ્યુટી-ફ્રી લાવી શકે છે. વિદેશથી ઇલેક્ટ્રોનિક્સ લાવતા મુસાફરો માટે આ નિર્ણય મહત્વપૂર્ણ રાહતરૂપ સાબિત થશે.
તેમ છતાં, કેટલાક નિયમો યથાવત રહેશે. ડ્યુટી-ફ્રી ભથ્થાં મુસાફરો વચ્ચે શેર કે ભેગા કરી શકાશે નહીં અને દરેક મુસાફરને પોતાનું અલગ ભથ્થું મળશે. ઉપરાંત, વધારાની સિગારેટ, તમાકુ, દારૂ, સોના-ચાંદીના બાર, ટેલિવિઝન જેવી કેટલીક વસ્તુઓ આ છૂટમાં સામેલ નહીં થાય. ચલણ પરિવહન સંબંધિત નિયમો પણ FEMA હેઠળ અગાઉની જેમ જ લાગુ રહેશે.
Study Abroad 2026 : ઓછા ખર્ચે વિદેશમાં ભણવું છે ? આ 10 આંતરરાષ્ટ્રીય સ્કોલરશિપ્સ તમને મોકલશે ABROAD
Published On - 4:26 pm, Sat, 7 February 26
