Breaking News : સિઝફાયર વચ્ચે અમેરિકાનો ઈરાન પર હુમલો, હોર્મુઝ નજીક મિસાઈલ લોન્ચર અને સુરંગ બિછાવી રહેલી બોટ્સને નિશાન બનાવી

અમેરિકા અને ઈરાન વચ્ચે યુદ્ધવિરામ લાગુ હોવા છતાં તણાવ હજુ યથાવત્ જોવા મળી રહ્યો છે. સોમવારે અમેરિકાએ દક્ષિણ ઈરાનમાં હોર્મુઝ સ્ટ્રેટ નજીક ઈરાની મિસાઈલ લોન્ચ સાઇટ્સ અને કેટલાક જહાજો પર હુમલો કર્યો હતો. અમેરિકાનું કહેવું છે કે આ કાર્યવાહી સંપૂર્ણપણે સ્વ-બચાવના ભાગરૂપે કરવામાં આવી હતી, કારણ કે આ મિસાઈલ સિસ્ટમ્સ અમેરિકન સૈનિકો માટે સીધો ખતરો બની રહી હતી.

એવા વિસ્તારોને નિશાન બનાવ્યા જ્યાંથી મિસાઈલ લોન્ચ થઈ શકે

યુએસ સેન્ટ્રલ કમાન્ડ (CENTCOM) ના પ્રવક્તા ટીમોથી હોકિન્સે જણાવ્યું કે ઈરાની દળોની હરકતોને ધ્યાનમાં રાખીને આ કાર્યવાહી કરવી જરૂરી બની હતી. તેમના જણાવ્યા અનુસાર, અમેરિકાએ એવા વિસ્તારોને નિશાન બનાવ્યા જ્યાંથી મિસાઈલ લોન્ચ થઈ શકે તેવી શક્યતા હતી. સાથે જ સમુદ્રમાં માઇન બિછાવવાનો પ્રયાસ કરી રહેલા ઈરાની જહાજો પર પણ હુમલો કરવામાં આવ્યો હતો.

અમેરિકાએ સ્પષ્ટ કર્યું છે કે યુદ્ધવિરામ દરમિયાન તે સંયમ રાખી રહ્યું છે, પરંતુ પોતાના સૈનિકોની સુરક્ષા માટે જરૂરી દરેક પગલું ભરવાનું ચાલુ રાખશે. નોંધનીય છે કે યુદ્ધવિરામ લાગુ થયા બાદ પણ બંને દેશો વચ્ચે અનેકવાર તણાવભરી પરિસ્થિતિ અને લશ્કરી ગતિવિધિઓ જોવા મળી છે.

અમેરિકન યુદ્ધજહાજોને નિશાન બનાવવાનો પ્રયાસ

મે મહિનાની શરૂઆતમાં પણ અમેરિકાએ ઈરાનના કેટલાક લશ્કરી ઠેકાણાઓ પર હુમલો કર્યો હતો. અમેરિકાનો આરોપ હતો કે હોર્મુઝ સ્ટ્રેટમાંથી પસાર થતાં અમેરિકન યુદ્ધજહાજોને ઈરાની દળોએ મિસાઈલ, ડ્રોન અને નાની બોટ દ્વારા નિશાન બનાવવાનો પ્રયાસ કર્યો હતો. આ ઘટનાના બાદ અમેરિકાના રાષ્ટ્રપતિ Donald Trump એ સૈન્યને જવાબી કાર્યવાહી માટે મંજૂરી આપી હતી.

આ દરમિયાન ટ્રમ્પે ઈરાનના પરમાણુ કાર્યક્રમને લઈને પણ કડક નિવેદન આપ્યું છે. તેમણે કહ્યું કે ઈરાને તેની પાસે રહેલું અત્યંત સમૃદ્ધ યુરેનિયમ અથવા તો અમેરિકાને સોંપવું જોઈએ અથવા તેનો સંપૂર્ણ નાશ કરવો જોઈએ. તેમના જણાવ્યા પ્રમાણે આ પ્રક્રિયા પર પરમાણુ ઊર્જા સંબંધિત આંતરરાષ્ટ્રીય સંસ્થા દેખરેખ રાખી શકે છે.

ટ્રમ્પે પોતાના સોશિયલ મીડિયા પ્લેટફોર્મ પર લખ્યું હતું કે અમેરિકા ઈરાનને આ યુરેનિયમ જાળવી રાખવાની મંજૂરી આપશે નહીં. અમેરિકન અધિકારીઓ હાલમાં “નો ડસ્ટ, નો ડોલર” નીતિ પર કામ કરી રહ્યા છે. તેનો અર્થ એવો થાય છે કે જ્યાં સુધી ઈરાન અંદાજે 453 કિલોગ્રામ સમૃદ્ધ યુરેનિયમ દૂર નહીં કરે, ત્યાં સુધી તેને કોઈ આર્થિક રાહત અથવા કરારનો લાભ આપવામાં આવશે નહીં.

હોર્મુઝ સ્ટ્રેટ વૈશ્વિક વેપાર અને તેલ સપ્લાય માટે અત્યંત મહત્વપૂર્ણ માર્ગ માનવામાં આવે છે. આવી સ્થિતિમાં અમેરિકા અને ઈરાન વચ્ચે વધતો તણાવ સમગ્ર વિશ્વ માટે ચિંતાનો વિષય બની રહ્યો છે.