War Breaking News : ઈરાન યુદ્ધમાં બેકફૂટ પર અમેરિકા! 10 દિવસમાં જ ઉકેલ શોધી રહ્યા છે જગત જમાદાર ડોનાલ્ડ ટ્રમ્પ

ઈરાન સાથે ચાલી રહેલા યુદ્ધને લઈને અમેરિકામાં દબાણ વધતું જઈ રહ્યું છે. અમેરિકાના રાષ્ટ્રપતિ Donald Trumpએ જણાવ્યું છે કે યુદ્ધ હવે તેના અંતિમ તબક્કામાં છે અને પરિસ્થિતિને જલ્દી શાંત કરવા માટે માર્ગ શોધવામાં આવી રહ્યો છે. મીડિયા અહેવાલો મુજબ, ટ્રમ્પના સલાહકારોએ તેમને સમાધાનનો રસ્તો શોધવાની સલાહ આપી છે, કારણ કે યુદ્ધ લાંબું ચાલશે તો તેના રાજકીય અને આર્થિક નુકસાન વધવાની શક્યતા છે.

મધ્યસત્ર ચૂંટણી માટે નુકસાનકારક સાબિત

The Wall Street Journalના અહેવાલ મુજબ, ઈરાન પર હુમલાના લગભગ દસ દિવસ બાદ ટ્રમ્પના સલાહકારોએ ચેતવણી આપી છે કે લાંબા સમય સુધી ચાલતું યુદ્ધ અમેરિકાને સીધું નુકસાન પહોંચાડી શકે છે. સલાહકારોના કહેવા પ્રમાણે, યુદ્ધ વધુ લંબાય તો રિપબ્લિકન મતદારોમાં અસંતોષ વધી શકે છે, જે આવનારી મધ્યસત્ર ચૂંટણી માટે નુકસાનકારક સાબિત થઈ શકે છે. આ જ કારણે ટ્રમ્પે મંગળવારે (10 માર્ચ) યુદ્ધ ટૂંક સમયમાં સમાપ્ત કરવાની સંભાવના અંગે નિવેદન આપ્યું હતું.

ખાસ કરીને રિપબ્લિકન મતદારોમાં વધતો વિરોધ

અહેવાલો મુજબ, હાલના તબક્કે ઈરાન સાથેના યુદ્ધમાંથી અમેરિકાને કોઈ ખાસ લશ્કરી અથવા આર્થિક લાભ મળતો દેખાતો નથી. જો યુદ્ધ વધુ તીવ્ર બનશે, તો તેના પરિણામો રાજકીય રીતે પણ અસરકારક બની શકે છે. ખાસ કરીને રિપબ્લિકન મતદારોમાં વધતો વિરોધ આગામી ચૂંટણીઓમાં મહત્વનો મુદ્દો બની શકે છે.

યુદ્ધની શરૂઆતમાં અમેરિકાનું મુખ્ય લક્ષ્ય ઈરાનમાં આંતરિક બળવો ઉભો કરવાનો હોવાનું માનવામાં આવતું હતું. આ દિશામાં, યુદ્ધના બીજા જ દિવસે ઈરાનના સર્વોચ્ચ નેતા Ali Khameneiને નિશાન બનાવવામાં આવ્યા હતા. સાથે સાથે ઈરાનના લગભગ 40 ટોચના સૈન્ય કમાન્ડરો માર્યા ગયા હતા. ઈરાનના રાષ્ટ્રપતિ અને વિદેશ પ્રધાન પર પણ હુમલાનો પ્રયાસ કરવામાં આવ્યો હતો. છતાં, આ તમામ ઘટનાઓ પછી પણ ઈરાને યુદ્ધ ચાલુ રાખ્યું છે અને આંતરિક બળવો જોવા મળ્યો નથી.

હાલના હુમલા આઘાતજનક

Associated Pressના અહેવાલ અનુસાર, અમેરિકાની National Intelligence Council દ્વારા કરવામાં આવેલા મૂલ્યાંકનમાં જણાવાયું છે કે હાલ જે પ્રકારના હુમલાઓ થઈ રહ્યા છે તે ઈરાનમાં બળવો ઉભો કરવા માટે પૂરતા નથી. અહેવાલમાં જણાવાયું છે કે ટોચના નેતૃત્વના મૃત્યુ બાદ પણ ઈરાનની જનતા રસ્તા પર ઉતરી નથી.

આ ઉપરાંત, Quinnipiac University દ્વારા કરવામાં આવેલા તાજેતરના સર્વેમાં જાણવા મળ્યું છે કે લગભગ 53 ટકા અમેરિકન નાગરિકો ઈરાન સામે લશ્કરી કાર્યવાહીનો વિરોધ કરે છે. સર્વેમાં સામેલ 44 ટકા લોકોનું માનવું છે કે અમેરિકા ઈઝરાયલને જરૂર કરતાં વધુ સમર્થન આપી રહ્યું છે. તાજેતરમાં અમેરિકાના વિદેશ પ્રધાન Marco Rubioએ પણ જણાવ્યું હતું કે ઈરાન પરનો હુમલો ઈઝરાયલ સાથેની પરિસ્થિતિને ધ્યાનમાં રાખીને કરવામાં આવ્યો હતો.

10 દિવસમાં અમેરિકાનો કુલ ખર્ચ 10 બિલિયન ડોલર

યુદ્ધને કારણે અમેરિકાનો ખર્ચ પણ ઝડપથી વધી રહ્યો છે. The Washington Postના અહેવાલ મુજબ, ઈરાન પર હુમલાના પ્રથમ બે દિવસમાં જ અમેરિકાએ લગભગ 5.6 બિલિયન ડોલરના દારૂગોળાનો ઉપયોગ કર્યો હતો. જ્યારે Anadolu Agency અનુસાર, યુદ્ધના માત્ર 10 દિવસમાં અમેરિકાનો કુલ ખર્ચ 10 બિલિયન ડોલરથી વધુ થઈ ગયો છે.

આ દરમિયાન, ઈરાનના વિદેશ મંત્રી Abbas Araghchiએ પણ યુદ્ધની અંતિમ સ્થિતિ વિશે નિવેદન આપ્યું છે. અરાઘચીનું કહેવું છે કે અમેરિકા માની રહ્યું હતું કે યુદ્ધ શરૂ થતાં જ ઈરાનમાં આંતરિક બળવો ફાટી નીકળશે, પરંતુ એવું થયું નથી. તેમણે ઉમેર્યું કે અમેરિકા હવે નવા વિકલ્પો દ્વારા યુદ્ધ જીતવાનો પ્રયાસ કરી રહ્યું છે, પરંતુ તેમાં સફળતા મળવાની શક્યતા ઓછી દેખાઈ રહી છે.