
અમેરિકામાં નોકરી કરીને કાયમી વસવાટ કરવાનું સપનું જોતા ભારતીયો માટે મુશ્કેલી વધી શકે છે. રાષ્ટ્રપતિ ડોનાલ્ડ ટ્રમ્પની સરકાર રોજગાર આધારિત ગ્રીન કાર્ડ મેળવવાની પ્રક્રિયાને વધુ કડક બનાવવાની તૈયારી કરી રહી છે. ખાસ કરીને વિદેશી કામદારોને નોકરી પર રાખતી અને તેમના ગ્રીન કાર્ડ માટે સ્પોન્સરશિપ આપતી કંપનીઓ માટે નવા નિયમો પ્રસ્તાવિત કરવામાં આવ્યા છે. આ ફેરફારોનો મુખ્ય હેતુ અમેરિકન નાગરિકોને નોકરીની તકોમાં પ્રથમ પ્રાથમિકતા આપવાનો છે. જો આ દરખાસ્ત અમલમાં આવશે, તો ભારતીય સહિત અન્ય દેશોના વિદેશી કામદારો માટે અમેરિકામાં કાયમી વસવાટ મેળવવાની પ્રક્રિયા વધુ મુશ્કેલ બની શકે છે.
અમેરિકાના શ્રમ વિભાગનું કહેવું છે કે નવી વ્યવસ્થાથી ઉચ્ચ કુશળતા અને સારા પગારવાળી નોકરીઓમાં અમેરિકન કામદારોને પ્રથમ તક મળશે. આ પ્રસ્તાવની જાહેરાત કરતાં શ્રમ સચિવ કીથ સોન્ડરલિંગે જણાવ્યું હતું કે અમેરિકન કામદારો વિશ્વમાં શ્રેષ્ઠ છે અને તેઓ નોકરીની શ્રેષ્ઠ તકો મેળવવાના હકદાર છે. સરકારનો ઉદ્દેશ્ય એ સુનિશ્ચિત કરવાનો છે કે કંપનીઓ વિદેશી કર્મચારીઓને નોકરી પર રાખતાં પહેલાં લાયક અમેરિકન ઉમેદવારોને યોગ્ય તક આપે. આ માટે સરકાર લગભગ 20 વર્ષ બાદ પર્મ (PERM) પ્રક્રિયામાં મોટા ફેરફારો કરવાની તૈયારી કરી રહી છે.
PERM એટલે પર્મેનન્ટ લેબર સર્ટિફિકેશન (Permanent Labor Certification). અમેરિકામાં કોઈ કંપની વિદેશી કર્મચારીને કાયમી નોકરી પર રાખવા અને તેના માટે રોજગાર આધારિત ગ્રીન કાર્ડની પ્રક્રિયા શરૂ કરવા માગતી હોય, ત્યારે સામાન્ય રીતે તેણે શ્રમ વિભાગ પાસેથી PERM સર્ટિફિકેશન મેળવવું પડે છે. આ પ્રક્રિયા હેઠળ કંપનીએ સાબિત કરવું પડે છે કે સંબંધિત નોકરી માટે લાયક અમેરિકન નાગરિક અથવા કામદાર ઉપલબ્ધ નથી. સાથે જ વિદેશી કર્મચારીની નિમણૂકથી અમેરિકન કામદારોના પગાર, નોકરીની સ્થિતિ કે રોજગારની તકો પર નકારાત્મક અસર નહીં થાય તેની પણ ખાતરી આપવી પડે છે. ખાસ કરીને EB-2 અને EB-3 કેટેગરી હેઠળ રોજગાર આધારિત ગ્રીન કાર્ડ મેળવવા માટે PERM સર્ટિફિકેશન મહત્ત્વપૂર્ણ છે. જોકે, માત્ર PERM મંજૂર થઈ જવાથી ગ્રીન કાર્ડ મળી જતું નથી. ત્યારબાદ ઇમિગ્રેશન પ્રક્રિયાના અન્ય તબક્કાઓ પણ પૂર્ણ કરવા પડે છે.
નવા પ્રસ્તાવિત નિયમો હેઠળ કંપનીઓએ નોકરીની જાહેરાત કરવાની પદ્ધતિમાં પણ ફેરફાર કરવો પડશે. અત્યાર સુધી ઉપયોગમાં લેવાતી પ્રિન્ટ મીડિયાની જાહેરાતોની જગ્યાએ કંપનીઓએ પોતાની વેબસાઇટ, ઓનલાઇન જોબ પોર્ટલ અને સોશિયલ મીડિયા પ્લેટફોર્મ પર ખાલી જગ્યાઓની માહિતી આપવી પડશે. આ ઉપરાંત જોબ ફેર અને કોલેજ કેમ્પસમાં ભરતી જેવી પ્રક્રિયાઓ પણ ચાલુ રહેશે. સરકારનો હેતુ વધુમાં વધુ અમેરિકન ઉમેદવારો સુધી નોકરીની માહિતી પહોંચાડવાનો છે, જેથી તેમને અરજી કરવાની યોગ્ય તક મળી શકે.
પ્રસ્તાવ મુજબ, કંપનીઓએ નોકરીની જાહેરાત ઓછામાં ઓછા 90 કેલેન્ડર દિવસ સુધી ખુલ્લી રાખવી પડશે. આ સમયગાળા દરમિયાન મળેલી અમેરિકન ઉમેદવારોની અરજીઓ અને તેમની લાયકાતનો ગંભીરતાથી વિચાર કરવો પડશે. માત્ર ઔપચારિકતા પૂરી કરવા માટે ભરતી પ્રક્રિયા ચલાવીને વિદેશી કર્મચારીની પસંદગી કરી શકાશે નહીં.
આ ઉપરાંત, જો કોઈ કંપનીએ છેલ્લા બે વર્ષ દરમિયાન સમાન પ્રકારની નોકરીમાંથી અમેરિકન કર્મચારીને છૂટો કર્યો હોય, તો તે જ પદ માટે વિદેશી કર્મચારીના ગ્રીન કાર્ડને સ્પોન્સર કરવા PERM અરજી કરી શકશે નહીં. જો PERM અરજી કર્યા પછી કંપનીમાં કર્મચારીઓની છટણી થાય, તો પણ અગાઉ નોકરી ગુમાવનારા લાયક અમેરિકન કર્મચારીઓને ફરીથી તક આપવી પડશે. આવી સ્થિતિમાં કંપનીએ પાંચ કાર્યકારી દિવસની અંદર શ્રમ વિભાગ અને USCISને જાણ કરવાની જોગવાઈ પણ પ્રસ્તાવિત કરવામાં આવી છે.
આ પ્રસ્તાવમાં શેડ્યૂલ A હેઠળ મળતી કેટલીક વહીવટી છૂટછાટો દૂર કરવાની પણ ભલામણ કરવામાં આવી છે. અત્યાર સુધી વ્યાવસાયિક નર્સો, ફિઝિકલ થેરાપિસ્ટ અને વિજ્ઞાન તથા કલાના ક્ષેત્રોમાં અસાધારણ ક્ષમતા ધરાવતા કેટલાક વિદેશી ઉમેદવારોને સામાન્ય શ્રમ બજાર પરીક્ષણની પ્રક્રિયામાંથી મુક્તિ મળતી હતી. પરંતુ નવા નિયમો અમલમાં આવશે તો આ ક્ષેત્રોમાં વિદેશી કર્મચારીઓને ભરતી કરતી કંપનીઓએ પણ અમેરિકન ઉમેદવારોને પ્રાથમિકતા આપવાની પ્રક્રિયામાંથી પસાર થવું પડી શકે છે. આ ફેરફારથી આરોગ્ય અને અન્ય વિશેષ કુશળતાવાળા ક્ષેત્રોમાં કામ કરવા ઇચ્છતા વિદેશી વ્યાવસાયિકો પર પણ અસર થઈ શકે છે.
હાલમાં આ તમામ ફેરફારો માત્ર પ્રસ્તાવના તબક્કામાં છે અને તેમને અંતિમ મંજૂરી મળી નથી. 17 નવેમ્બરે ફેડરલ રજિસ્ટરમાં પ્રસ્તાવ પ્રકાશિત થયા બાદ શ્રમ વિભાગે સામાન્ય જનતા, કંપનીઓ અને અન્ય સંબંધિત પક્ષોને પોતાના સૂચનો તથા વાંધા રજૂ કરવા માટે 60 દિવસનો સમય આપ્યો છે. આ પ્રતિસાદના આધારે સરકાર આગળની પ્રક્રિયા હાથ ધરશે અને ત્યારબાદ નિયમોને અંતિમ સ્વરૂપ આપવામાં આવી શકે છે.
આ સમગ્ર પહેલ અમેરિકન નાગરિકોના રોજગાર હિતોનું રક્ષણ કરવા અને વિદેશી કર્મચારીઓની ભરતી પર વધુ દેખરેખ રાખવાની ટ્રમ્પ સરકારની નીતિનો એક ભાગ છે. જો આ દરખાસ્ત અંતિમ સ્વરૂપ પામીને અમલમાં આવશે, તો અમેરિકામાં રોજગાર આધારિત ગ્રીન કાર્ડ મેળવવા ઇચ્છતા ભારતીયો સહિતના વિદેશી કામદારો માટે કંપનીની સ્પોન્સરશિપ મેળવવી અને PERM પ્રક્રિયા પૂર્ણ કરવી પહેલાં કરતાં વધુ પડકારજનક બની શકે છે. જોકે, હાલ આ નિયમો અમલમાં આવ્યા નથી, તેથી અંતિમ નિર્ણય અને તેની અમલવારી અંગેની સત્તાવાર જાહેરાતની રાહ જોવી જરૂરી છે.
PM મોદીએ જમીન પરથી તિરંગો ઉઠાવી ખિસ્સામાં મૂક્યો, જીત્યું દિલ!