Breaking News : પહેલા વેનેઝુએલા, પછી ઈરાન અને હવે કોનો વારો? અમેરિકી સાંસદે જણાવ્યો ટ્રમ્પનો આગામી ટાર્ગેટ

યુએસ કોંગ્રેસમેન લિન્ડસે ગ્રેહામે તાજેતરમાં દાવો કર્યો છે કે ડોનાલ્ડ ટ્રમ્પનું વહીવટીતંત્ર હવે ક્યુબાને નિશાન બનાવી શકે છે. એક ન્યૂઝ ચેનલ સાથેની વાતચીત દરમિયાન ગ્રેહામે કહ્યું કે ક્યુબાની સામ્યવાદી સરકારનું પતન નજીક છે અને હાલનું શાસન ટૂંક સમયમાં સમાપ્ત થઈ શકે છે. તેમણે ક્યુબાના “દિવસો ગણતરીના છે” એવું પણ જણાવ્યું.

ગ્રેહામે ટ્રમ્પને વિદેશ નીતિમાં આક્રમક વલણ ધરાવતા રાષ્ટ્રપતિ તરીકે વર્ણવ્યા. તેમણે વેનેઝુએલાના રાષ્ટ્રપતિ નિકોલસ માદુરો વિરુદ્ધ લેવામાં આવેલા પગલાંનો ઉલ્લેખ કર્યો અને કહ્યું કે ટ્રમ્પ પ્રશાસન નાર્કો-ટેરરિઝમ જેવા મુદ્દાઓ પર કડક કાર્યવાહી કરી રહ્યું છે. ઈરાન સામેના અમેરિકન અને ઇઝરાયલી પગલાં અંગે પણ તેમણે દાવો કર્યો કે આ અભિયાન ઈરાની સરકારને નબળી પાડવાના લાંબા ગાળાના હેતુ સાથે સંકળાયેલું છે.

યુએસ અને ક્યુબા વચ્ચે દાયકાઓ જૂનો તણાવ

અમેરિકા અને ક્યુબા વચ્ચેનો તણાવ 1959ની ક્યુબા ક્રાંતિથી શરૂ થયો હતો. ફિડેલ કાસ્ટ્રોએ સત્તા સંભાળ્યા બાદ ક્યુબામાં સામ્યવાદી સરકાર સ્થાપિત થઈ, જેના કારણે બંને દેશો વચ્ચેના સંબંધો બગડ્યા. અમેરિકા દ્વારા ક્યુબા પર આર્થિક પ્રતિબંધો લાદવામાં આવ્યા, જેનો મોટો ભાગ આજે પણ યથાવત છે.

1962ની ક્યુબા મિસાઇલ કટોકટી બંને દેશો વચ્ચેનો સૌથી ખતરનાક તબક્કો હતો. તે સમયે સોવિયેત સંઘે ક્યુબામાં પરમાણુ મિસાઇલો તૈનાત કરી, જેના કારણે અમેરિકા અને સોવિયેત સંઘ સીધા સામસામે આવી ગયા હતા. વિશ્વ પરમાણુ યુદ્ધની કગાર પર આવી ગયું હતું, પરંતુ અંતે રાજદ્વારી સમાધાનથી સંકટ ટળી ગયું. તેમ છતાં, યુએસ-ક્યુબા સંબંધો સંપૂર્ણપણે સામાન્ય બની શક્યા નથી.

સંબંધો સુધારવાના પ્રયાસો અને ફરી વધેલો તણાવ

2014માં રાષ્ટ્રપતિ બરાક ઓબામાએ ક્યુબા સાથેના સંબંધો સુધારવાના પ્રયાસો શરૂ કર્યા હતા. બંને દેશો વચ્ચે રાજદ્વારી સંબંધો પુનઃસ્થાપિત થયા અને કેટલાક આર્થિક તેમજ મુસાફરી પ્રતિબંધોમાં રાહત આપવામાં આવી. જોકે, ડોનાલ્ડ ટ્રમ્પે બાદમાં ફરીથી કડક પ્રતિબંધો લાગુ કર્યા, જેના કારણે સંબંધોમાં ફરી તણાવ વધ્યો.

તાજેતરના વર્ષોમાં વેનેઝુએલા સાથે ક્યુબાના નજીકના સંબંધો પણ અમેરિકાની ચિંતા બન્યા છે. અમેરિકા ક્યુબાની સરકાર પર માનવાધિકારોના ઉલ્લંઘન અને લોકશાહી સુધારાઓ ટાળવાના આરોપ મૂકે છે. બીજી તરફ, ક્યુબા દાવો કરે છે કે અમેરિકન પ્રતિબંધોએ તેના અર્થતંત્રને ગંભીર નુકસાન પહોંચાડ્યું છે.

વેનેઝુએલા ક્યુબાને તેલનો મોટો પુરવઠો આપે છે, અને આ પરસ્પર નિર્ભરતા પણ ભૂરાજકીય તણાવનું એક મહત્વપૂર્ણ કારણ છે. હાલની પરિસ્થિતિને જોતા, અમેરિકાની વિદેશ નીતિમાં આગામી પગલાં અંગે આંતરરાષ્ટ્રીય સ્તરે ચર્ચા તેજ બની છે.

તેલના ખેલમાં ઈરાનનો ‘માસ્ટરસ્ટ્રોક’, ડ્રોનથી વિશ્વની ઓઇલ લાઈફલાઈન પર ખતરો, જાણવા માટે અહીં ક્લિક કરો…