America vs Canada… ભારતીય વિદ્યાર્થીઓ માટે કયો દેશ અભ્યાસ માટે છે બેસ્ટ? આજે જાણી લો
વિદેશમાં અભ્યાસ માટે અમેરિકા કે કેનેડા? ભારતીય વિદ્યાર્થીઓ માટે આ એક મોટો પ્રશ્ન છે. બંને દેશોની પ્રવેશ પ્રક્રિયા, શિક્ષણ પ્રણાલી, અભ્યાસ ખર્ચ અને નોકરીની તકોની અહીં જાણકારી આપવામાં આવી છે.
વિદેશમાં અભ્યાસ માટે યોગ્ય દેશ પસંદ કરવો ખૂબ જ મહત્વપૂર્ણ નિર્ણય છે, કારણ કે તે તમારા ભવિષ્યને સીધી અસર કરે છે. ખાસ કરીને ભારતીય વિદ્યાર્થીઓ માટે, અમેરિકા અને કેનેડા વચ્ચે પસંદગી કરવી ઘણીવાર મુશ્કેલ બની જાય છે.
હાલમાં 4 લાખથી વધુ ભારતીય વિદ્યાર્થીઓ કેનેડામાં અને 3 લાખથી વધુ વિદ્યાર્થીઓ અમેરિકામાં અભ્યાસ કરી રહ્યા છે. દર વર્ષે હજારો વિદ્યાર્થીઓ વિદેશમાં ઉચ્ચ અભ્યાસ માટે જાય છે અને તેઓ માટે આ સવાલ ફરી ઉભો થાય છે કે અમેરિકા અને કેનેડા પૈકી કયો દેશ વધુ સારો વિકલ્પ છે.
આ નિર્ણય માત્ર યુનિવર્સિટી પર આધારિત નથી, પરંતુ તેમાં અભ્યાસનો ખર્ચ, વિઝા નિયમો, અને અભ્યાસ પછી નોકરીની તકો જેવા મહત્વપૂર્ણ પરિબળો પણ સામેલ છે. શિક્ષણ નિષ્ણાતો મુજબ, વિદ્યાર્થીઓએ દેશ પસંદ કરતા પહેલા તેમના ભવિષ્યના કમાણીના અવસરો અને કરિયર ગ્રોથને ધ્યાનમાં રાખવું જોઈએ.
પ્રવેશ પ્રક્રિયા કેવી છે?
અમેરિકામાં વિદ્યાર્થીઓ સીધા યુનિવર્સિટીમાં અરજી કરી શકે છે અથવા Common App દ્વારા પણ અરજી કરી શકે છે. અહીં પ્રવેશ માટે નિબંધ, ભલામણ પત્ર અને extracurricular પ્રવૃત્તિઓ મહત્વ ધરાવે છે. બેચલર માટે SAT અથવા ACT સ્કોર જરૂરી હોય છે, જ્યારે માસ્ટર માટે GRE અથવા GMAT સ્કોર જરૂરી હોય છે. સાથે જ, અંગ્રેજી પ્રોફિશિયન્સી માટે IELTS અથવા TOEFL સ્કોર પણ જરૂરી છે.
કેનેડામાં પ્રવેશ પ્રક્રિયા લગભગ સમાન છે, પરંતુ અહીં યુનિવર્સિટીઓ સામાન્ય રીતે શૈક્ષણિક ગુણ પર વધુ ભાર મૂકે છે. વિદ્યાર્થીઓએ વ્યક્તિગત નિવેદન અને ક્યારેક નિબંધ પણ સબમિટ કરવો પડે છે. IELTS સ્કોર અહીં પણ જરૂરી છે.
શિક્ષણ પ્રણાલી કેવી છે?
અમેરિકામાં 5,300 થી વધુ યુનિવર્સિટીઓ અને કોલેજો છે, જ્યાં વિદ્યાર્થીઓને વિવિધ વિષયો પસંદ કરવાની વિશાળ તક મળે છે. અહીં બેચલર ડિગ્રી સામાન્ય રીતે 4 વર્ષમાં અને માસ્ટર ડિગ્રી 2 વર્ષમાં પૂર્ણ થાય છે.
કેનેડામાં લગભગ 94 યુનિવર્સિટીઓ અને 4,000 થી વધુ કોલેજો છે. અહીં પણ વિદ્યાર્થીઓને અલગ-અલગ લેવલના કોર્સ ઉપલબ્ધ છે. કેટલીક યુનિવર્સિટીઓ 3 વર્ષના બેચલર પ્રોગ્રામ આપે છે, પરંતુ મોટાભાગે 4 વર્ષનો કોર્સ વધુ સ્વીકાર્ય માનવામાં આવે છે.
ખર્ચ કેટલો થાય છે?
અમેરિકામાં વિદેશી વિદ્યાર્થીઓ માટે વાર્ષિક ટ્યુશન ફી $56,000 સુધી જઈ શકે છે, ખાસ કરીને ખાનગી યુનિવર્સિટીઓમાં. જોકે, ઘણા સંસ્થાઓ સ્કોલરશિપ અને ફાઇનાન્શિયલ એડ પણ આપે છે, જે ખર્ચ ઘટાડવામાં મદદ કરે છે.
બીજી તરફ, કેનેડામાં અભ્યાસનો ખર્ચ તુલનાત્મક રીતે ઓછો છે. અહીં બેચલર ડિગ્રી માટે વાર્ષિક ફી લગભગ ₹2.9 લાખ અને માસ્ટર માટે લગભગ ₹1.7 લાખ જેટલી હોય છે, જે ઘણા વિદ્યાર્થીઓ માટે વધુ આકર્ષક વિકલ્પ બને છે.
TR to PR : કેનેડાના આ વિસ્તારમાં રહેતા લોકોને સરળતાથી મળશે PR! જાણી લો
