News9 Global Summit : જર્મન કંપનીઓને પીએમ મોદીએ કહ્યું, ભારત આવો કારણ કે આ જ સમય છે યોગ્ય

વડાપ્રધાન નરેન્દ્ર મોદીએ TV9 ગ્રુપની ન્યૂઝ 9 ગ્લોબલ સમિટની જર્મની આવૃત્તિને સંબોધિત કરી હતી. આ દરમિયાન વડાપ્રધાને જર્મન કંપનીઓને ભારતમાં રોકાણ કરવા આમંત્રણ આપ્યું હતું.

વડાપ્રધાને કહ્યું કે હાલમાં 1800 થી વધુ જર્મન કંપનીઓ ભારતમાં કામ કરી રહી છે અને તેઓએ છેલ્લા વર્ષોમાં 15 અબજ ડોલરનું રોકાણ કર્યું છે. પીએમ મોદીએ આ કંપનીઓને ભારતમાં તેમનું રોકાણ વધારવા માટે પણ કહ્યું હતું.

જર્મની ભારતનું મુખ્ય ભાગીદાર છે

વડાપ્રધાન મોદીએ કહ્યું કે આજે વિશ્વ ભારત સાથે વિકાસ ભાગીદારી કરવા માંગે છે, જેમાં જર્મની ભારતના મહત્વપૂર્ણ ભાગીદારોમાંનું એક છે. વડાપ્રધાને જર્મન કંપનીઓને ભારત આવવાનું પણ કહ્યું કારણ કે આ યોગ્ય સમય છે.

જર્મની સાથે વેપાર વધશે

વડાપ્રધાને તેમના સંબોધનમાં કહ્યું કે ભારત અને જર્મની વચ્ચે 34 અબજ ડોલરનો દ્વિપક્ષીય વેપાર છે. વિશ્વાસ વ્યક્ત કરતા વડાપ્રધાને કહ્યું કે આવનારા દિવસોમાં આ વેપાર વધુ વધશે, કારણ કે આજે ભારત વિશ્વમાં સૌથી ઝડપથી વિકસતું અર્થતંત્ર છે. તેથી, વિશ્વના દરેક દેશ વિકાસ માટે ભારત સાથે ભાગીદારી કરવા માંગે છે.

ભારત-જર્મન ભાગીદારીનો નવો અધ્યાય

વડાપ્રધાન મોદીએ કહ્યું કે 2024માં દિલ્હીમાં આયોજિત ઈન્ડો-જર્મન સ્ટ્રેટેજિક પાર્ટનરશિપના 25 વર્ષ પૂર્ણ થયા છે, આ ભાગીદારી માટે આ વર્ષ ઐતિહાસિક રહ્યું છે. 12 વર્ષ બાદ દિલ્હીમાં જર્મન બિઝનેસની એશિયા પેસિફિક કોન્ફરન્સનું આયોજન કરવામાં આવ્યું હતું. જેમાં જર્મનીએ ફોકસ ઓફ ઈન્ડિયા ડોક્યુમેન્ટ બહાર પાડ્યું હતું. ભારત માટે સ્કીલ્સ લેબર સ્ટ્રેટેજી પણ બહાર પાડી.

ઉત્પાદન અને ટેકનોલોજીમાં સહકાર

પ્રધાનમંત્રીએ કહ્યું કે જર્મની અને ભારત વચ્ચે ઉત્પાદન, એન્જિનિયરિંગ અને ઈલેક્ટ્રોનિક મેન્યુફેક્ચરિંગ ક્ષેત્રે મજબૂત સહયોગની શક્યતાઓ છે. તેમણે કહ્યું, “અમે વિશ્વ માટે સમૃદ્ધ ભવિષ્યના નિર્માણમાં જર્મની સાથે સહયોગ કરવા માંગીએ છીએ.”

આ પણ વાંચો: News9 Global Summit: ભારત-જર્મનીના સંબંધો માટે આ વર્ષ મહત્વપૂર્ણ, સંબંધો નવી ઊંચાઈએ છે: PM મોદી