Breaking News: 16 મહિના પછી મુલાકાત… પીએમ મોદીએ ટ્રમ્પ સમક્ષ ઉઠાવ્યો ભારતીયોની સુરક્ષાનો મુદ્દો, જાણો બેઠકની મોટી વાતો

16 મહિના પછી ભારતના વડાપ્રધાન નરેન્દ્ર મોદી અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચે ફ્રાન્સના એવિયનમાં દ્વિપક્ષીય મુલાકાત થઈ. આ દરમિયાન પીએમ મોદીએ ટ્રમ્પ સમક્ષ ભારતીયોની સુરક્ષાનો મુદ્દો ઉઠાવ્યો.

તેમણે કહ્યું કે, ભારતીય નાવિકોની સુરક્ષા ખૂબ જ મહત્વપૂર્ણ છે. પીએમ મોદીએ હોર્મુઝ બંધ થવાથી આવનારી મુશ્કેલીઓથી પણ ટ્રમ્પને માહિતગાર કર્યા. પીએમ મોદીએ કહ્યું કે, હોર્મુઝ પર અમારી અને તમારી ચિંતા એક જ છે. હોર્મુઝનું ખૂલવું દુનિયા માટે જરૂરી છે.

ટ્રમ્પે પીએમ મોદીના વખાણ કર્યા

ટ્રમ્પે ઘણી તકો પર પીએમ મોદીના વખાણ કર્યા છે. ખાસ કરીને સત્તામાં તેમના લાંબા કાર્યકાળ, મોટા નિર્ણયો લેવાની ક્ષમતા અને મજબૂત નેતૃત્વને લઈને તેમની પ્રશંસા કરી હતી. આ મહિનાની શરૂઆતમાં, ટ્રમ્પે મોદીને સૌથી લાંબા સમય સુધી વડાપ્રધાન રહેવા બદલ અભિનંદન પણ આપ્યા હતા. ટ્રમ્પ અવારનવાર આંતરરાષ્ટ્રીય મંચો પર મોદી સાથેના પોતાના સારા સંબંધોનો ઉલ્લેખ કરે છે. તેઓ અવારનવાર હ્યુસ્ટનમાં યોજાયેલા ‘હાઉડી મોદી’ કાર્યક્રમને યાદ કરે છે.

પીએમ મોદીએ પોતાના સંબોધનમાં શું કહ્યું?

આ પહેલા વડાપ્રધાન નરેન્દ્ર મોદી મંગળવારે ફ્રાન્સના એવિયન શહેરમાં જી-7 સમિટમાં જોડાયા હતા. આ દરમિયાન તેમણે પશ્ચિમ એશિયામાં તણાવ અને દરિયાઈ માર્ગોની અસુરક્ષાનો મુદ્દો જોરદાર રીતે ઉઠાવ્યો. પીએમ મોદીએ પોતાના સંબોધનમાં કહ્યું કે, પશ્ચિમ એશિયામાં શાંતિ પ્રયાસોની પ્રગતિનું અમે સ્વાગત કરીએ છીએ.

આ સંઘર્ષના કારણે આ વિસ્તારમાં રહેલા અમારા મિત્ર દેશોમાં જાન-માલનું નુકસાન થયું છે. હોર્મુઝ જળડમરુમધ્યથી પસાર થનારા દરિયાઈ વ્યાપારમાં અવરોધ આવવાથી વૈશ્વિક અર્થતંત્ર પર ખરાબ અસર પડી છે.

તેમણે આગળ કહ્યું કે, ઘણા ભારતીય નાગરિકોના પણ જીવ ગયા છે. દરિયાઈ માર્ગથી દેશોને જોડનારા નાવિકોની સુરક્ષા સુનિશ્ચિત કરવી એ આપણી જવાબદારી છે. તેમણે એ વાત પર ભાર મૂક્યો કે, દરિયાઈ રસ્તાઓ સુરક્ષિત રહે અને નાવિકો કોઈપણ ડર વગર પોતાનું કામ કરી શકે.

ભારત-અમેરિકા વચ્ચે આ મુદ્દાઓ પર વાત થઈ

બંને દેશોના અધિકારીઓ આ બેઠકમાં વ્યાપાર સમજૂતી, ઊર્જા ક્ષેત્રમાં ભાગીદારી, વિઝા સંબંધિત મુદ્દાઓ અને જીઓ-પોલિટિકલ પડકારો પર પ્રગતિની આશા રાખી રહ્યા છે. વ્યાપાર પર વાતચીત પહેલાથી જ ચાલી રહી છે અને બંને પક્ષો વચગાળાની સમજૂતીની શક્યતાને લઈને આશાવાદી છે.

જી-7 શિખર સંમેલનમાં મોદી અને ટ્રમ્પ વચ્ચેની આ બેઠક માત્ર ભારત-અમેરિકાના સંબંધોની મજબૂતીને જ નથી દર્શાવતી પરંતુ બંને નેતાઓ વચ્ચે બનેલી ખાસ વ્યક્તિગત કૂટનીતિને પણ ઉજાગર કરે છે.

Breaking News: ડોનાલ્ડ ટ્રમ્પે લીધો મોટો યૂ-ટર્ન! ઈરાન સાથેની ડીલ પર પલટી મારીને કહ્યું કે, ‘વર્તન નહીં સુધરે તો યુદ્ધ પાકું’