Breaking News : ઈરાની IRGC એ બહેરીનમાં અમેરિકાના રડાર સ્ટેશન પર કર્યો ડ્રોન હુમલો, વીડિયો જાહેર કરી અમેરિકાને આપી ધમકી

ઈરાન અને અમેરિકા વચ્ચેનો તણાવ સતત વધી રહ્યો છે. આ દરમિયાન ઈરાનની ઇસ્લામિક રિવોલ્યુશનરી ગાર્ડ કોર્પ્સ (IRGC)એ બહેરીનમાં આવેલા અમેરિકાના એક લશ્કરી રડાર સ્ટેશન પર ડ્રોન હુમલો કર્યાનો દાવો કર્યો છે. આ હુમલાનો વીડિયો પણ જાહેર કરવામાં આવ્યો છે. સાથે જ IRGCએ ચેતવણી આપી છે કે જો અમેરિકા તરફથી કોઈ પણ પ્રકારની લશ્કરી કાર્યવાહી કરવામાં આવશે, તો તેનો વધુ આક્રમક અને જડબાતોડ જવાબ આપવામાં આવશે.

IRGCના જણાવ્યા અનુસાર, તેની એરોસ્પેસ ફોર્સે બહેરીનના અલ-રિફા હેલિકોપ્ટર બેઝ પર સ્થાપિત અમેરિકન એર ડિફેન્સ રડાર સિસ્ટમને નિશાન બનાવી હતી. આ કાર્યવાહી માટે કુલ છ ડ્રોનનો ઉપયોગ કરવામાં આવ્યો હોવાનો દાવો કરવામાં આવ્યો છે. ઈરાની સૈન્યએ આ હુમલાને અમેરિકાની લશ્કરી કાર્યવાહીના જવાબમાં હાથ ધરવામાં આવેલા આક્રમણના બીજા તબક્કાનો ભાગ ગણાવ્યો છે.

ઈરાની સરકારી મીડિયા પ્રેસ ટીવી દ્વારા આ વીડિયો જાહેર કરવામાં આવ્યો હતો. IRGCએ પોતાના નિવેદનમાં દાવો કર્યો હતો કે ડ્રોન દ્વારા કરવામાં આવેલા ચોક્કસ હુમલાના અવાજ બહેરીનના અનેક વિસ્તારોમાં સંભળાયા હતા. સંગઠનના મતે, આ કાર્યવાહી તેની લશ્કરી અને ઓપરેશનલ ક્ષમતાઓનું પ્રદર્શન છે. જોકે, આ હુમલાના દાવાની હજુ સુધી સ્વતંત્ર રીતે પુષ્ટિ થઈ નથી. અમેરિકી કે બહેરીની અધિકારીઓ તરફથી પણ રડાર સ્ટેશનને નુકસાન પહોંચ્યું હોવાની તાત્કાલિક કોઈ સત્તાવાર પુષ્ટિ કરવામાં આવી નથી.

IRGCએ અમેરિકાને આપી વધુ કડક જવાબની ચેતવણી

IRGCએ આ હુમલાને અમેરિકાના આક્રમણ સામેનો નિર્ણાયક અને મજબૂત જવાબ ગણાવ્યો છે. સંગઠનનો દાવો છે કે અગાઉના તબક્કાની સરખામણીમાં આ વખતે અમેરિકાના લશ્કરી ઠેકાણાઓને નિશાન બનાવવા માટે વધુ સંખ્યામાં ડ્રોનનો ઉપયોગ કરવામાં આવ્યો છે.

આ ઉપરાંત, ઈરાને અમેરિકી સરકાર પર એવો આરોપ પણ લગાવ્યો છે કે તે મર્યાદિત અને આડેધડ લશ્કરી કાર્યવાહી કરીને હોર્મુઝ સ્ટ્રેટ બંધ થવાના મુદ્દા પરથી આંતરરાષ્ટ્રીય સમુદાયનું ધ્યાન હટાવવાનો પ્રયાસ કરી રહી છે.

IRGC releases footage of drone strikes targeting a US air defense radar at Bahrain’s Al-Rifaa helicopter base.

Follow: https://t.co/oa9JV4ikYQ https://t.co/WBkyOvK9jq

— Press TV (@PressTV) November 15, 2026

IRGCએ પોતાના નિવેદનમાં સ્પષ્ટ કર્યું છે કે હોર્મુઝ સ્ટ્રેટ હજુ પણ બંધ છે અને અમેરિકી સૈન્ય તરફથી કરવામાં આવનારા કોઈપણ હુમલાનો અગાઉ કરતાં વધુ કડક જવાબ આપવામાં આવશે. ઈરાની સૈન્યએ ચેતવણી આપી છે કે તેની સામે કરવામાં આવતી કોઈપણ લશ્કરી કાર્યવાહીનો જવાબ સંપૂર્ણ તૈયારી અને ચોક્કસ વ્યૂહરચના સાથે આપવામાં આવશે.

બહેરીનમાં સુરક્ષા વ્યવસ્થા સઘન, નાગરિકોને એલર્ટ

બીજી તરફ, બહેરીનમાં પણ સુરક્ષાને લઈને ચિંતા વધી છે. બહેરીનના ગૃહ મંત્રાલયે રવિવારે નાગરિકો માટે બે સુરક્ષા ચેતવણીઓ જાહેર કરી હતી. આ ચેતવણીઓમાં લોકોને સંભવિત જોખમો અંગે સાવચેત રહેવા, શાંતિ જાળવવા અને જરૂર પડે ત્યારે સુરક્ષિત સ્થળોએ જવાની અપીલ કરવામાં આવી હતી.

રોઇટર્સના અહેવાલ મુજબ, સપ્ટેમ્બર પછી બહેરીનમાં આ પ્રકારની ચેતવણીઓ પ્રથમ વખત જાહેર કરવામાં આવી છે. ઈરાનના ડ્રોન હુમલાના દાવા અને અમેરિકાને આપવામાં આવેલી ખુલ્લી ચેતવણીને પગલે મધ્ય પૂર્વમાં લશ્કરી તણાવ વધુ ગંભીર બનવાની આશંકા વ્યક્ત કરવામાં આવી રહી છે.